dil se teri nigah jigar tak utar gai

dil se teri nigah jigar tak utar gai
donon ko ik ada mein razamand kar gai

shaq ho gaya hai sina khusha lazzat-e-farag
takleef-e-pardadari-e-zakhm-e-jigar gai

wo bada-e-shabana ki saramastiyan kahan
uthiye bas ab k lazzat-e-khwab-e-sahar gai

urti phire hai khak meri ku-e-yar mein
bare ab ai hawa, hawas-e-bal-o-par gai

dekho to dil farebi-e-andaz-e-naqsh-e-pa
mauj-e-khiram-e-yar bhi kya gul katar gai

har bulahawas ne husn parasti shiar ki
ab abaru-e-shewa-e-ahal-e- nazar gai

nazzare ne bhi kam kiya wan naqab ka
masti se har nigah tere rukh par bikhar gai

farda-o-din ka tafarruqa yak bar mit gaya
kal tum gae k ham pe qayamat guzar gai

mara zamane ne 'Asadullah khan" tumhen
wo walwale kahan, wo jawani kidhar gai

dil hi to hai na sang-o-khisht dard se bhar na aye kyun

dil hi to hai na sang-o-khisht dard se bhar na aye kyun 

roenge ham hazar bar koi hamein sataye kyun 

dair nahi haram nahi dar nahi astan nahi 

baithe hain rahguzar pe ham gair hamein uthaye kyun 

jab wo jamal-e-dilfaroz, surat-e-mahr-e-nimaroz 

ap hi ho nazrasoz, parde mein munh chupaye kyun 

dashna-e-gamza jansitan, nawak-e-naz bepanah 

tera hi aks-e-rukh sahi, samane tere aye kyun 

qaid-e-hayat-o-band-e-gam asl mein donon ek hain 

maut se pahle admi gam se najat paye kyun 

husn aur us pe husn-e-zan rah gai bulahawas ki sharm 

apne pe etimad hai gair ko azamaye kyun 

wan wo guroor-e-izz-o-naz yan ye hijab-e-pas waza 

rah mein ham milen kahan, bazm mein wo bulayen kyun 

han wo nahi khudaparast, jao wo bewafa sahi 

jisko ho din-o-dil aziz, us ki gali mein jaye kyun 

"ghalib"-e-khasta k bagair kaun se kam band hain 

roie zar-zar kya, kijie haye-haye kyun

dil-e-nadan tujhe hua kya hai

dil-e-nadan tujhe hua kya hai 

akhir is dard ki dawa kya hai 

ham hain mushtaq aur wo bezar 

ya ilahi ye majara kya hai 

main bhi munh mein zaban rakhta hun 

kash pucho k mudda kya hai 

jab k tujh bin nahi koi maujud 

phir ye hangama, ai Khuda kya hai 

ye pari chehra log kaise hain 

gamaza-o-ishwa-o-ada kya hai 

shikan-e-zulf-e-ambari kyon hai 

nigah-e-chashm-e-surma sa kya hai 

sabza-o-gul kahan se aye hain 

abr kya chiz hai hawa kya hai 

hamko unse wafa ki hai ummid 

jo nahi jante wafa kya hai 

han bhala kar tera bhala hoga 

aur darwesh ki sada kya hai 

jan tum par nisar karta hun 

main nahi janta dua kya hai 

main ne mana k kuch nahi 'ghalib'

muft hath aye to bura kya hai

dil mera soz-e-nihan se bemuhaba jal gaya

dil mera soz-e-nihan se bemuhaba jal gaya 

atish-e-khamosh k manind goya jal gaya 

dil mein zauq-e-wasl-o-yad-e-yar tak baki nahi 

ag is ghar mein lagi aisi k jo tha jal gaya 

main adam se bhi pare hun warna gafil! barha 

meri ah-e-atshin se bal-e-anqa jal gaya 

arz kije jauhar-e-andesha ki garmi kahan 

kuch khayal aya tha wehshat ka k sehra jal gaya 

dil nahi, tujh ko dikhta warna dagon ki bahar 

is charagan ka, karun kya, karfarma jal gaya 

main hun aur afsurdagi ki arazu "Ghalib"! k dil 

dekh kar tarz-e-tapak-e-ahl-e-duniya jal gaya

dhota hun jab main pine ko us simtan k paon

dhota hun jab main pine ko us simtan k paon 

rakhta hai zid se khench kar bahar lagan k paon 

di sadagi se jan parun kohkan k paon 

hai hat kyon na tut gae pirazan k paon 

bhage the ham bahut so usi ki saza hai ye 

hokar asir dabte hain rahzan k paon 

marham ki justaju mein phira hun jo dur-dur 

tan se siwa figar hain is khasta tan k paon 

Allah re zauq-e-dashtanwardi k baade-marg 

hilte hain khud-ba-khud mere andar kafan k paon 

hai josh-e-gul bahar mein yan tak k har taraf 

urte hue ulajhte hain murg-e-chaman k paon 

shab ko kisi k khwab mein aya na ho kahin 

dukhte hain aj us but-e-nazukbadan k paon 

'ghalib' mere kalam mein kyon kar maza na ho 

pita hun khusro-e-shirinsukhan k paon

dekhna qismat k ap apne pe rashk a jaye hai

dekhna qismat k ap apne pe rashk a jaye hai 

main use dekhun bhala kab mujhse dekha jaye hai 

hath dho dil se yahi garmi gar andeshe mein hai 

abgina tundi-e-sahaba se pighala jaye hai 

gair ko yarab wo kyon kar mana-e-gustakhi kare 

gar haya bhi usko ati hai to sharma jaye hai 

shauq ko ye lat k hardam nala khenche jaiye 

dil k wo halat k dam lene se ghabara jaye hai 

dur chashm-e-bad teri bazm-e-tarab se wah wah 

nagma ho jata hai wan gar nala mera jaye hai 

garche hai tarz-e-tagaful pardadar-e-raz-e-ishq 

par ham aise khoye jate hain k wo pa jaye hai 

uski bazmaraiyan sunkar dil-e-ranjur yan 

misl-e-naqsh-e-mudda-e-gair baitha jaye hai 

ho k ashiq wo parirukh aur nazuk ban gaya 

rang khulta jaye hai jitna k urata jaye hai 

naqsh ko us k musawwir par bhi kya kya naz hai 

khenchta hai jis qadar utna hi khinchta jaye hai 

saya mera mujhse misl-e-dud bhage hai ' 

pas mujh atishba-jan k kis se thahra jaye hai

dard se mere hai tujhko beqarari hae hae

dard se mere hai tujhko beqarari hae hae 

kya hua zalim teri gaflatashi'ari hae hae 

tere dil mein gar na tha ashob-e-gham ka hausla 

tu ne phir kyun ki thi meri gham-gusari hae hae 

kyun meri gham-khwaragi ka thujhko aya tha khayal 

dushmani apani thi meri dostdari hae hae 

umr bhar ka tune paiman-e-wafa bandha to kya 

umr bhar ko bhi to nahi hai paydari hae hae 

zahar lagti hai mujhe ab-o-hawa-e-zindagi 

yani tujhse thi ise nasazgari hae hae 

gulfishani hae naz-e-jalwa ko kya ho gaya 

khak par hoti hai teri lalakari hae hae 

sharm-e-ruswai se ja chupna naqab-e-khak mein 

khtam hai ulfat ki tujh par pardadari hae hae 

khak mein namus-e-paiman-e-muhabbat mil gai 

uth gai duniya se rah-o-rasm-e-yari hae hae 

hath hi tegzama ka kam se jata raha 

dil pe ik lagne na paya zakhmkari hae hae 

kis tarah kate koi shab hae tar-e-barshigal 

hai nazar khunkarda-e-akhtarshumari hae hae 

gosh mahjur-e-payam-o-chashm mahrum-e-jamal 

ek dil, tis par ye na-umidwari hae hae 

ishq ne pakra na tha "Ghalib" abhi wahshat ka rang 

rah gaya tha dil mein jo kuch zauq-e-khwari hae hae

dard minnat kashe-dawa na hua

dard minnat kashe-dawa na hua 

main na acha hua, bura na hua 

jama karte ho kyon raqibon ko 

ik tamasha hua gila na hua 

ham kahan qismat azmane jayen 

tu hi jab khanjar azma na hua 

kitne shirin hain tere lab k raqib 

galiyan khak bemaza na hua 

hai khabar garm un k ane ki 

aj hi ghar mein boriya na hua 

kya woh namrud ki khudai thi
bandagi mein mera bhala na hua

jan di, di hui usi ki thi 

haq to yun hai k haq ada na hua 

zakhm gar dab gaya lahu na thama 

kam gar ruk gaya rawa na hua 

rahzani hai k dilsitanee hai 

lek dil, dilsitan rawa na hua 

kuch to parhiye k log kahte hain 

aj 'ghalib' gazalsara na hua

dayam para hua tere dar par nahi hun main

dayam para hua tere dar par nahi hun main 

khak aisi zindagi pe k paththar nahi hun main 

kyun gardish-e-mudam se ghabra na jaye dil 

insan hun, pyala-o-sagar nahi hun main 

yarab! zamana mujh ko mitata hai kis liye 

lauh-e-jahan pe harf-e-mukarrar nahi hun main 

had chahiye saza mein uqubat k waste 

akhir gunahgar hun, kafir nahi hun main 

kis waste aziz nahi jante mujhe 

lal-o-zumarud-o-zar-o-gauhar nahi hun main 

rakhte ho tum qadam meri ankhon se kyun dareg 

rutbe mein mahr-o-mah se kamtar nahi hun main 

karte ho mujhko mana-e-qadambos kis liye 

kya asman k bhi barabar nahi hun main 

'ghalib' wazifakhwar ho, do shah ko dua 

wo din gaye ki kahte the "naukar nahi hun main"

chahiye achon ko jitna chahiye

chahiye achon ko jitna chahiye

ye agar chahen to phir kya chahiye

sohbat-e-rinda se wajib hai hazar

ja-e-mai apne ko khencha chahiye

chahne ko tere kya samjha tha dil

bare ab is se bhi samjha chahiye

chak mat kar jeb be ayyam-e-gul

kuch udhar ka bhi ishara chahiye

dosti ka parda hai beganagi

munh chupana ham se chora chahiye

dushmani main meri khoya gair ko

kis qadar dushman hai dekha chahiye

apni ruswai main kya chalti hai sai

yar hi hangama ara chahiye

munhasir marne pe ho jis ki umid

naumidi us ki dekha chahiye

gafil in mah talaaton k waste

chahne wala bhi acha chahiye

chahte hain khubruon ko asad

ap ki surat to dekha chahiye

bas k dushwar hai har kam ka asan hona

bas k dushwar hai har kam ka asan hona 

admi ko bhi mayassar nahi insan hona 

giriya chahe hai kharabi mere kashane ki 

dar-o-diwar se tapak hai bayaban hona 

wa-e-diwangi-e-shauq k har dam mujh ko 

ap jana udhar aur ap hi hairan hona 

jalwa azbas k taqaza-e-nigah karta hai 

jauhar-e-aina bhi chahe hai mizagan hona 

ishrat-e-qatlgah-e-ahal-e-tamanna mat puch 

id-e-nazzara hai shamshir ka uriyan hona 

le gaye khak mein ham dag-e-tamanna-e-nishat 

tu ho aur ap basadrang-e-gulistan hona 

ishrat-e-para-e-dil, zakhm-e-tamannakhana 

lazzat-e-rish-e-jigar garq-e-namakdan hona 

ki mere qatl k bad us ne jafa se tauba 

haye us zodpasheman ka pasheman hona 

haif us char girah kapre ki qismat 'ghalib' 

jis ki qismat mein ho ashiq ka gareban hona

bazicha-e-atfal hai duniya mere age

juz nam nahi surat-e-alam mujhe manzur 

juz waham nahi hasti-e-ashiya mere age 

hota hai nihan gard mein sehra mere hote 

ghista hai jabin khak pe dariya mere age 

mat puch k kya hal hai mera tere piche 

tu dekh k kya rang hai tera mere age 

sach kahte ho khudbin-o-khudara hun na kyon hun 

baitha hai but-e-aina sima mere age 

phir dekhiye andaz-e-gulafshani-e-guftar 

rakh de koi paimana-e-sahba mere age 

nafrat ka guman guzre hai main rashk se guzra 

kyon kar kahun lo nam na us ka mere age 

iman mujhe rok hai jo khinche hai mujhe kufr 

kaba mere piche hai kalisa mere age 

ashiq hun pe mashuqfarebi hai mera kam 

majnun ko bura kahti hai laila mere age 

khush hote hain par wasl mein yun mar nahi jate 

ai shab-e-hijaran ki tamanna mere age 

hai maujzan ik qulzum-e-khun kash! yahi ho 

ata hai abhi dekhiye kya-kya mere age 

go hath ko jumbish nahi ankhon mein to dam hai 

rahne do abhi sagar-o-mina mere age 

hampesha-o-hammasharab-o-hamraz hai mera 

'ghalib' ko bura kyon kaho acha mere age

amad-e-khat se hua hai sard jo bazar-e-dost

amad-e-khat se hua hai sard jo bazar-e-dost 

dud-e-shama-e-kushta tha shayad khat-e-rukhsar-e-dost 

ai dil na aqabat andesh zabt-e-shauq kar 

kaun la sakta hai tab-e-jalwa-e-didar-e-dost 

khana wiransazi-e-hairat tamasha kijiye 

surat-e-naqsh-e-qadam hun rafta-e-raftar-e-dost 

ishq main bedad-e-rashq-e-gair ne mara mujhe 

kushta-e-dushman hun akhir garche tha bimar-e-dost 

chashm-e-may raushan k us bedard ka dil shad hai 

dida-e-pur-khun hamara sagar-e-sar-shar-e-dost

aina kyun na dun k tamasha kahen jise

aina kyun na dun k tamasha kahen jise 

aisa kahan se laun k tujhsa kahen jise 

hasrat ne la rakha teri bazm-e-khayal mein 

guldasta-e-nigah suweda kahen jise 

phunka hai kisne goshe muhabbat mein ai Khuda 

afsun-e-intazar tamanna kahen jise 

sar par hujum-e-dard-e-garibi se daliye 

wo ek musht-e-khak k sahra kahen jise 

hai chashm-e-tar mein hasrat-e-didar se nihan 

shauq-e-inan gusekhta dariya kahen jise 

darkar hai shiguftan-e-gul haye aish ko 

subh-e-bahar panba-e-mina kahen jise 

"ghalib" bura na man jo waiz bura kahe 

aisa bhi koi hai k sab acha kahen jise

ah ko chahiye ik umr asar hone tak

ah ko chahiye ik umr asar hone tak 

kaun jita hai teri zulf k sar hone tak 

dam har mauj mein hai halqa-e-sadkam-e-nahang 

dekhen kya guzare hai qatre pe gauhar hone tak 

ashiqi sabr-talab aur tamanna betab 

dil ka kya rang karun khun-e-jigar hone tak 

ham ne mana k taaful na karoge lekin 

khak ho jayenge ham tum ko khabar hone tak

aa k meri jan mein qarar nahi hai

aa k meri jan mein qarar nahi hai 

taqat-e-bedad-e-intazar nahi hai 

dete hain jannat hayat-e-dahar ke badle 

nasha ba andaza-e-Khumar nahi hai 

giriya nikle hai teri bazm se mujh ko 

haye! k rone pe ikhtiyar nahi hai 

ham se abas hai guman-e-ranjish-e-khatir 

khak mein ushshaq ki gubar nahi hai 

dil se utha lutf-e-jalwa haye mani 

gair-e-gul aina-e-bahar nahi hai 

qatl ka mere kiya hai ahad to bare 

waye! agar ahad ustawar nahi hai 

tu ne qasam maikashi ki khai hai 'Ghalib' 

teri qasm ka kuch aitabar nahi hai

ye kis khalish ne phir is dil main ashiyana kya

ye kis khalish ne phir is dil main ashiyana kya 

phir aj kis ne sukhan ham se gayebana kya 

gam-e-jahan ho, rukh-e-yar ho k dast-e-udu 

salook jis se kya hamane ashiqana kya

the khak-e-rah bhi ham log qahar-e-tufan bhi 

saha to kya na saha aur kya to kya na kya 

khusha k aj har ik muddai k lab par hai 

wo raz jis ne hamain rand-e-zamana kya 

wo hilagar jo wafaju bhi hai jafakhu bhi 

kya bhi "Faiz" to kis but se dostana kya

ye dag dag ujala, ye shabgazida sahar

ye dag dag ujala, ye shabgazida sahar 

wo intazar tha jis ka, ye wo sahar to nahin 

ye wo sahar to nahin jis ki arzu lekar 

chale the yar k mil jayegi kahin na kahin 

falak k dasht main taron ki akhari manzil 

kahin to hoga shab-e-sust mauj ka sahil 

kahin to ja k rukga safina-e-gam-e-dil 

jawan lahu ki pur-asrar shaharahon se 

chale jo yar to daman pe kitne hath pare 

dayar-e-husn ki be-sabr khwab-gahon se 

pukarati rahin bahen, badan bulate rahe 

bahut aziz thi lekin rukh-e-sahar ki lagan 

bahut qarin tha hasinan-e-nur ka daman 

subuk subuk thi tamanna, dabi dabi thi thakan 

suna hai ho bhi chuka hai firaq-e-zulmat-e-nur 

suna hai ho bhi chuka hai wisal-e-manzil-o-gam 

badal chuka hai bahut ahl-e-dard ka dastur 

nishat-e-wasl halal-o-azab-e-hijr-e-haram 

jigar ki ag, nazar ki umang, dil ki jalan 

kisi pe chara-e-hijran ka kuch asar hi nahin 

kahan se ai nigar-e-saba, kidhar ko gai 

abhi chirag-e-sar-e-rah ko kuch khabar hi nahin 

abhi garani-e-shab main kami nahin ai 

najat-e-dida-o-dil ki ghari nahin ai 

chale chalo k wo manzil abhi nahin ai

wo buton ne dale hain waswase k dilon se khauf-e-Khuda gaya

wo buton ne dale hain waswase k dilon se khauf-e-Khuda gaya 

wo pari hain roz qayamaten k khayal-e-roz-e-jaza gaya 

jo nafas tha khar-e-gul bana jo utha to hath qalam huye 

wo nishat-e-ah-sahar gai wo wiqar-e-dast-e-dua gaya 

na wo rang fasl-e-bahar ka na rawish wo abr-e-bahar ki 

jis ada se yar the ashna wo mizaj-e-bad-e-saba gaya 

abhi badban ko tah rakho abhi muzatarib hai rukh-e-hawa 

kisi raste main hain muntazir wo sukun jo aa k chala gaya

tumhari yad k jab zakhm bharne lagte hain

tumhari yad k jab zakhm bharne lagte hain 

kisi bahane tumhen yad karne lagte hain 

hadis-e-yar k unwan nikharne lagte hain 

to har harim main gesu sanwarne lagte hain 

har ajanabi hamain mahram dikhai deta hai 

jo ab bhi teri gali gali se guzarne lagte hain 

saba se karte hain gurbat-nasib zikr-e-watan 

to chashm-e-subah main ansu ubharne lagte hain 

wo jab bhi karte hain is nutq-o-lab k bakhiyagari 

faza main aur bhi nagmain bikharne lagte hain 

dar-e-qafas pe andhere k muhar lagti hai 

to "Faiz" dil main sitare utarne lagte hain

teri ummid tera intazar jab se hai

teri ummid tera intazar jab se hai 

na shab ko din se shikayat na din ko shab se hai 

ksi ka dard ho karte hain tere nam raqam 

gila hai jo bhi kisi se teri sabab se hai 

hua hai jab se dil-e-nasabur beqabu 

kalam tujhse nazar ko bari adab se hai 

agar sharar hai to bharak, jo phul hai to khile 

tarah tarah k talab tere rang-e-lab se hai 

kahan gaye shab-e-furqat k jagnewale 

sitara-e-sahar ham-kalam kab se hai

tere gam ko jan k talash thi tere jan-nisar chale gaye

tere gam ko jan k talash thi tere jan-nisar chale gaye 

teri rah main karte the sar talab sar-e-rah-guzar chale gaye 

teri kaj-adai se har k shab-e-intazar chali gai 

mere zabt-e-hal se ruth kar mere gam-gusar chale gaye 

na sawal-e-wasl na arz-e-gam na hikayaten na shikayaten 

tere ahad main dil-e-zar k sabhi ikhtiyar chale gaye 

ye hamin the jin k libas par sr-e-rah siyahi likhi gai 

yahi dag the jo saja k ham sar-e-bazm-eyar chale gaye 

na raha junun-e-rukh-e-wafa ye rasan ye dar karoge kya 

jinhen jurm-e-ishq pe naz tha wo gunahagar chale gaye

tum mere pas raho

tum mere pas raho 

mere qatil, mere dildar, mere pas raho 

jis ghari rat chale 

asmanon k lahu pi kar siyah rat chale 

marham-e-mushk liye nashtar-e-almas chale 

bain karti hui, hansti hui, gati nikle 

dard k kasani pazeb bajti nikle 

jis ghari sinon main dubate huye dil 

astinon main nihan hathon k rah takne nikle 

is liye 

aur bachon k bilakne ki tarah qul-qul-e-may 

bahr-e-nasudagi machle to manaye na mane 

jab koi bat banaye na bane 

jab na koi bat chale 

jis ghari rat chale 

jis ghari matami, sun-san, siyah rat chale 

pas raho

mere qatil, mere dildar, mere pas raho

sunane ko bhir hai sar-e-mahshar lagi hui

sunane ko bhir hai sar-e-mahshar lagi hui

tohmat tumhare ishq ki ham par lagi hui

rindon k dam se atish-e-mai k bagair bhi

hai maikade main ag barabar lagi hui

abad kar k shahar-e-khamoshan har ek su

kis khoj main hai teg-e-sitamgar lagi hui

jite the yun to pahle bhi ham jan pe khel kar

bazi hai ab ye jan se barh kar lagi hui

lao to qatlnama mera main bhi dekh lun

kis kis k muhar hai sar-e-mahzar lagi hui

akhir ko aj apne lahu par hui tamam

bazi miyan-e-qatil-o-khanjar lagi hui

shaikh sahab se rasm-o-rah na ki

shaikh sahab se rasm-o-rah na ki

shukr hai zindagi tabah na ki

tujh ko dekha to ser-e-chashm hue

tujh ko chaha to aur chah na ki

tere dast-e-sitam ka ajz nahin

dil hi kafir tha jis ne ah na ki

the shab-e-hijr kam aur bahut

ham ne fikr-e-dil-e-tabah na ki

kaun qatil bacha hai shahar main 'Faiz'

jis se yaron ne rasm-o-rah na ki

sham-e-firaq ab na puch ai aur aa k tal gai

sham-e-firaq ab na puch ai aur aa k tal gai 

dil tha k phir bahal gaya, jan thi k phir sambhal gai 

bazm-e-khayal main tere husn k shama jal gai 

dard ka chand bujh gaya, hijr k rat dhal gai 

jab tujhe yad kar liya, subha mahak mahak uthi 

jab tera gam jaga liya, rat machal machal gai 

dil se to har muamala kar k chale the saf ham 

kahne main un k samane bat badal badal gai 

akhir-e-shab k ham safar 'Faiz' na jane kya hue 

rah gai kis jagah saba, subha kidhar nikal gai

sach hain hamin ko ap k shikwe baja na the

sach hain hamin ko ap k shikwe baja na the 

beshak sitam janab k sab dostana the 

han jo jafa bhi ap ne ki qayede se ki 

han ham hi karband-e-usul-e-wafa na the 

aye to yun to k jaise hamesha k meharban 

bhule to yun k goya kabhi ashna na the 

kyon dad-e-gam ham ne talab ki, bura kiya 

ham se jahan main kushta-e-gam aur kya na the 

gar fikr-e-zakhm ki to khatawar hain k ham 

kyon mahw-e-madh-e-khubi-e-teg-e-ada na the 

har charagar ko charagari se gurez tha 

warna hamain jo dukh the bahut ladawa na the 

lab par hai talkhi-e-may-e-ayyam warna "Faiz" 

ham talkhi-e-kalam par mail zara na the

sabhi kuch hai tera diya hua sabhi rahaten sabhi kalafaten

sabhi kuch hai tera diya hua sabhi rahaten sabhi kalafaten 

kabhi sohbaten kabhi furqaten kabhi duriyan kabhi qurbaten 

ye sukhan jo ham ne raqam kiye ye hain sab waraq teri yad k 

koi lamha subah-e-wisal ka, kai sham-e-hijr ki qurbaten 

jo tumhari man len nasiha to rahega daman-e-dil main kya 

na kisi udu ki adawaten na kisi sanam ki murawwaten 

chalo ao tum ko dikhayen ham jo bacha hai maqtal -e-shahar main 

ye mazar ahal-e-safa k hain ye hain ahal-e-sidq ki turbaten 

meri jan aj ka gam na kar, k na jane katib-e-waqt ne 

kisi apne kal main bhi bhul kar kahin likh rakhi ho masaraten

raushan kahin bahar k imkan huye to hain

raushan kahin bahar k imkan huye to hain 

gulashan main chak chand gareban huye to hain 

ab bhi khizan ka raj hai lekin kahin kahin 

goshe rah-e-chaman main gazal-khwan huye to hain 

thahari huyi hai shab ki siyahi wahin magar 

kuch kuch sahar k rang par-afshan huye to hain 

in main lahu jala ho hamara k jan-o-dil 

mahfil main kuch chirag farozan huye to hain 

han kaj karo kulah k sab kuch luta k ham 

ab be-niyaz-e-gardish-e-dauran huye to hain 

ahal-e-qafas ki subah-e-chaman main khulegi ankh 

bad-e-saba se wada-e-paiman huye to hain 

hai dasht ab abhi dasht magar khun-e-pa se "Faiz" 

sairab chand khar-e-mugelan huye to hain

phir koi aya dil-e-zar nahin koi nahin

phir koi aya dil-e-zar nahin koi nahin 

rahrau hoga kahin aur chala jayega 

dhal chuki rat bikharne laga taron ka gubar 

lrkharane lage aewanon main khwabida chirag 

so gai rasta tak tak k har ek rahguzar 

ajnabi khak ne dhundala diye qadamon k surag 

gul karo shamain bara do mai-o-mina-o-ayag 

apne bekhwab kiwaron ko muqaffal kar lo 

ab yahan koi nahin, koi nahin ayega

nisar main teri galiyon k ae watan, k jahan

nisar main teri galiyon k ae watan, k jahan 

chali hai rasm k koi na sar utha k chale 

jo koi chahanewala tawaf ko nikle 

nazar chura k chale, jism-o-jan bacha k chale 

hai ahl-e-dil k liye ab ye nazm-e-bast-o-kushad 

k sang-o-khisht muqayyad hain aur sag azad 

bahot hain zulm k dast-e-bahana-ju k liye 

jo chand ahl-e-junun tere nam leva hain 

bane hain ahl-e-hawas muddai bhi, munsif bhi 

kise wakil karen, kis se munsifi chahen 

magar guzaranewalon k din guzarte hain 

tere firaq main yun subh-o-sham karae hain 

bujha jo rauzan-e-zindan to dil ye samajha hai 

k teri mang sitaron se bhar gai hogi 

chamak uthe hain salasil to hamane jana hai 

k ab sahar tere rukh par bikhar gai hogi 

garaz tasavvur-e-sham-o-sahar main jite hain 

giraft-e-saya-e-diwar-o-dar main jite hain 

yun hi hamesha ulajhti rahi hai zulm se khalq 

na unki rasm nai hai, na apani rit nai 

yun hi hamesha khilaye hain hamne ag main phul 

na unki har nai hai na apani jit nai 

isi sabab se falak ka gila nahin karte 

tere firaq main ham dil bura nahin karte 

gar aj tujhse juda hain to kal baham honge 

ye rat bhar ki judai to koi bat nahin 

gar aj auj pe hai tala-e-raqib to kya 

ye char din ki khudai to koi bat nahin 

jo tujhase ahd-e-wafa ustavar rakhte hain 

ilaj-e-gardish-e-lail-o-nihar rakhte hain

na ganvao navak-e-nim-kash, dil-e-reza reza ganva diya

na ganvao navak-e-nim-kash, dil-e-reza reza ganva diya 

jo bache hain sang samet lo, tan-e-dag dag luta diya 

mere charagar ko naved ho, saf-e-dushmanan ko khabar karo 

wo jo qarz rakhte the jan par, wo hisab aj chuka diya 

karo kaj jabin pe sar-e-kafan, mere qatilon ko guman na ho 

ki gurur-e-ishq ka bankpan, pas-e-marg hamne bhula diya 

udhar ek harf ki kushtani, yahan lakh uzr tha guftani 

jo kaha to sun k ura diya, jo likha to parh k mita diya 

jo ruke to koh-e-garan the ham, jo chale to jan se guzar gaye 

rah-e-yar hamne qadam qadam, tujhe yadagar bana diya

nasib azmane k din a rahe hain

nasib azmane k din a rahe hain 

qarib un k ane k din a rahe hain 

jo dil se kaha hai jo dil se suna hai 

sab un ko sunane k din a rahe hain 

abhi se dil-o-jan sar-e-rah rakh do 

k lutne lutane k din a rahe hain 

tapakne lagi un nigahon se masti 

nigahen churane k din a rahe hain 

saba phir hamain puchti phir rahi hai 

chaman ko sajane k din a rahe hain 

chalo "Faiz" phir se kahin dil lagayen 

suna hai thikane k din a rahe hain

nahin nigah main manzil to justaju hi sahi

nahin nigah main manzil to justaju hi sahi 

nahin wisal mayasar to arzu hi sahi 

na tan main khun faraham na ashk ankhon main 

namaz-e-shauq to wajib hai be-wazu hi sahi 

kisi tarah to jame bazm maikade walo 

nahin jo bada-o-sagar to ha-o-hu hi sahi 

gar intazar kathin hai to jab talak ai dil 

kisi k wada-e-farda ki guftagu hi sahi 

dayar-e-gair main mahram agar nahin koi 

to 'Faiz' zikr-e-watan apne ru-ba-ru hi sahi

mujh se pahli si mohabbat meri mahbub na mang

mujh sa pahli si mohabbat meri mahbub na mang

main ne samjha tha k tu hai to darakhshan hai hayat

tera gam hai to gam-e-dahar ka jhagra kya hai

teri surat se hai alam main baharon ko sabat

teri ankhon k siva duniya main rakha kya hai 

tu jo mil jaye to taqdir nigun ho jaye

yun na tha main ne faqat chaha tha yun ho jaye

aur bhi dukh hain zamane main mohabbat k siva

rahaten aur bhi hain vasl ki rahat k siva

mujh se pahli si mohabbat meri mahbub na mang

anginat sadiyon k tarik bahimana talism

resham-o-atalas-o-kamkhvab main bunavaye huye

ja-ba-ja bikte huye kucha-o-bazar main jism

khak main lithte huye khun main nahlaye huye

jism nikle huye amaraz k tannuron se

pip bahati hui galte huye nasuron se

laut jati hai udhar ko bhi nazar kya kije

ab bhi dilkash hai tera husn magar kya kije

aur bhi dukh hain zamane main mohabbat k siva

rahaten aur bhi hain vasl ki rahat k siva

mujh se pahli si mohabbat meri mahbub na mang

mera dard nagma-e-besada

mera dard nagma-e-besada 

meri zat zara-e-benishan 

mere dard ko jo zuban mile 

mujhe apna nam-o-nishan mile 

meri zat ko jo nishan mile 

mujhe raz-e-nazm-e-jahan mile 

jo mujhe ye raz-e-nihan mile 

meri khamoshi ko bayan mile 

mujhe qayanat ki sarwari 

mujhe daulat-e-do-jahan mile

meri teri nigah main jo lakh intazar hain

meri teri nigah main jo lakh intazar hain 

jo mere tere tan badan main lakh dil figar hain 

jo meri teri ungliyon ki behisi se sab qalam nazar hain 

jo mere tere shahar k har ik gali main 

mere tere naqsh-e-pa k be-nishan mazar hain 

jo meri teri rat k sitare zakhm zakhm hain 

jo meri teri subah k gulab chak chak hain 

ye zakhm sare be-dawa ye chak sare be-rafu 

kisi pe rakh chand k kisi pe os ka lahu 

ye hain bhi ya nahin bata 

ye hai k mahaz jal hai 

mere tumhare ankabut-e-waham ka buna hua 

jo hai to is ka kya karen 

nahin hai to bhi kya karen 

bata, bata, bata, bata

kuch pahale in ankhon age kya kya na nazara guzra tha

kuch pahale in ankhon age kya kya na nazara guzra tha 

kya raushan ho jati thi gali jab yar hamara guzra tha 

the kitne ache log k jinko apne gam se fursat thi 

sab puchen the ahawal jo koi dard ka mara guzra tha 

ab k to khizan aisi thahari wo sare zamane bhul gaye 

jab mausam-e-gul har phere main a a k dubara guzra tha 

thi yaron k buhtat to ham agyar se bhi bezar na the 

jab mil baithe to dushman ka bhi sath gawara guzra tha 

ab to hath sujhai na dewe lekin ab se pahle to 

ankh uthate hi ek nazar main alam sara guzra tha

kuch muhtasibon k khilwat main kuch waiz k ghar jati hai

kuch muhtasibon k khilwat main kuch waiz k ghar jati hai 

ham bada-kashon k hise ko ab jam main kam kam ati hai 

yun arz-o-talab se kab ai dil patthar-dil pani hote hain 

tum lakh raza k khu dalo kab khu-e-sitamgar jati hai 

bedad-garon ki basti hai yan dad kahan fariyad kahan 

sar phorti phirti hai nadan fariyad jo dar dar jati hai 

han ji k zayan k ham ko bhi tashwish hai lekin kya kjiye 

har rah jo udhar ko jati hai maqtal se guzar kar jati hai 

ab kucha-e-dilbar ka rah-rau rahzan bhi bane to bat bane 

pahre se udu talte hi nahin aur rat barabar jati hai 

ham ahal-e-qafas tanha bhi nahin har roz nasim-e-subah-e-watan 

yadon se muattar ati hai ashkon se munawwar jati hai

wo muzmahil haya jo kisi ki nazar main hai

kuch din se intazar-e-sawal-e-digar main hai
wo muzmahil haya jo kisi ki nazar main hai


sikhi yahin mere dil-e-kafir ne bandagi
rabb-e-karim hai to teri rahguzar main hai


mazi main jo maza meri sham-o-sahar main tha
ab wo faqat tasawwur-e-sham-o-sahar main hai


kya jane kis ko kis se hai ab dad ki talab
wo ghum jo mere dil main hai teri nazar main hai

is waqt to yun lagta hai ab kuch bhi nahin hai

is waqt to yun lagta hai ab kuch bhi nahin hai 

mahtab na suraj na andhera na sawera 

ankhon k dariche main kisi husn k jhalkan 

aur dil k panahon main kisi dard ka dera 

mumkin hai koi waham ho mumkin hai suna ho 

galiyon main kisi chap ka ek akhiri phera 

shakhon main khayalon k ghane per k shayad 

ab ak karega na koi khwab basera 

ik bair na ik mahar na ik rabt na rishta 

tera koi apna na paraya koi mera 

mana k ye sun-san ghari sakht bari hai 

lekn mere dil ye to faqat ek ghari hai 

himmat karo jine ko abhi umr pari hai

kyun mera dil shad nahin hai kyun khamosh raha karta hun

kyun mera dil shad nahin hai kyun khamosh raha karta hun 

choro meri ram kahani main jaisa bhi hun acha hun 

mera dil gamgin hai to kya gamgin ye duniya hai sari 

ye dukh tera hai na mera ham sab ki jagir hai pyari 

tu gar meri bhi ho jaye duniya k gam yun hi rahenge 

pap k phande, zulm k bandhan apne kahe se kat na saknge 

gam har halat main mohlik hai apna ho ya aur kisi ka 

rona dhona, ji ko jalana yun bhi hamara, yun bhi hamara 

kyun na jahan ka gam apna len bad main sab tadbiren sochen 

bad main sukh k sapne dekhen sapnon ki tabiren sochen 

be-fikre dhan daulat wale ye akhir kyun khush rahte hain 

inka sukh apas main banten ye bhi akhir ham jaise hain 

ham ne mana jung kari hai sar phutenge,khun bahega 

khun main gam bhi bah jayenge ham na rahen, gam bhi na rahega

aj k din na pucho mere dosto

aj k din na pucho mere dosto 

dur kitne hain khushiyan manane k din 

khul k hansne k din git gane k din 

pyar karne k din dil lagane k din 

aj k din na pucho mere dosto 

zakhm kitne abhi bakht-e-bismil main hain 

dasht kitne abhi rah-e-manzil main hain 

tir kitne abhi dast-e-qatil main hain 

aj k din zubun hai mere dosto 

aj k din to yun hai mere dosto 

jaise dard-o-alam k purane nishan 

sab chale su-e-dil karwan karwan 

hath sine pe rakho to har ustakhwan 

se uthe nala-e-al'aman al'aman 

aj k din na pucho mere dosto 

kab tumhare lahu k darida alam 

farq-e-khurshid-e-mahshar pe honge raqam 

az karan ta karan kab tumhare qadam 

le k uthega wo bahar-e-khun yam-ba-yam 

jis dil main dhul jayega aj k din ka gam 

sare dard-o-alam sare jaur-e-sitam 

dur kitani hai khurshid-e-mahshar ki lau 

aj k din na pucho mere dosto

Khuda wo waqt na laye k sogawar ho tu

Khuda wo waqt na laye k sogawar ho tu 

sukun ki nind tujhe bhi haram ho jaye 

teri masarrat-e-paiham tamam ho jaye 

teri hayat tujhe talkh jam ho jaye 

gamon se aina-e-dil gudaz ho tera 

Hujum-e-yas se betab ho k rah jaye 

wafur-e-dard se simab ho k rah jaye 

tera shabab faqat khwab ho k rah jaye 

gurur-e-husn sarapa niyaz ho tera 

tawil raton main tu bhi qarar ko tarse 

teri nigah kisi gamgusar ko tarae 

khizan rasida tamanna bahar ko tarse 

koi jabin na tere sang-e-astan pe jhuke 

k jins-e-ijz-o-aqidat se tujh ko shad kare 

fareb-e-wada-e-farda pe aetamad kare 

Khuda wo waqt na laye k tujh ko yad aye 

wo dil k tere liye be-qarar ab bhi hai 

wo ankh jis ko tera intazar ab bhi ha

kabhi kabhi yad main ubharte hain naqsh-e-mazi mite mite se

kabhi kabhi yad main ubharte hain naqsh-e-mazi mite mite se 

wo azmaish si dil-o-nazar ki, wo qurabaten si wo fasale se 

kabhi arzu k sehara main a k rukte hain qafile se 

wo sari baten lagaw ki si wo sare unwan wisal k se 

nigah-o-dil ko qarar kaisa nishat-o-gam main kami kahan ki 

wo jab mile hain to un se har bar ki hai ulfat naye sire se 

bahut giran hai ye aish-e-tanha kahin sabukatar kahin gawara 

wo dard-e-pinhan k sari duniya rafiq thi jiske waste se 

tumhin kaho rind-o-muhtasib main ho aj shab kaun farq aisa 

ye as k baithe hain maikade main wo uth k aye hain maikade se

kab yad main tera sath nahin kab hath main tera hath nahin

kab yad main tera sath nahin kab hath main tera hath nahin 

sad shukr k apni raton main ab hijr ki koi rat nahin 

mushkil hain agar halat wahan dil bech ayen jan de ayen 

dil walo kucha-e-janan main kya aise bhi halat nahin 

jis dhaj se koi maqtal main gaya wo shan salamat rahti hai 

ye jan to ani jani hai is jan ki to koi bat nahin 

maidan-e-wafa darbar nahion yan nam-o-nasab k puch kahan 

ashiq to kisi ka nam nahin kuch ishq kisi ki zat nahin 

gar bazi ishq ki bazi hai jo chaho laga do dar kaisa 

gar jit gae to kya kahna hare bhi to bazi mat nahin

kab tak dil ki khair manayen, kab tak rah dikhaoge

kab tak dil ki khair manayen, kab tak rah dikhaoge 

kab tak chain k mohlat doge, kab tak yad na aoge 

bita did ummid ka mausam, khak urti hai ankhon main 

kab bhejoge dard ka badal, kab barkha barasaoge 

ahad-e-wafa aur tark-e-muhabbat jo chaho so ap karo 

apne bas k bat hi kya hai, hamse kya manwaoge 

kisne wasl ka suraj dekha, kis par hijr k rat dhali 

gesuon wale kaun the, kya the, un ko kya jatlaoge 

'Faiz' dilon k bhag main hai ghar basana bhi lut jana bhi 

tum us husn k lutf-o-karam par kitne din itraoge

himmat-e-iltija nahin baqi

himmat-e-iltija nahin baqi

zabt ka hausla nahin baqi

ik teri did chin gai mujh se

warna duniya main kya nahin baqi

apni mashq-e-sitam se hath na khench

main nahin ya wafa nahin baqi

teri chashm-e-alamnawaz ki khair

dil main koi gila nahin baqi

ho chuka khatm ahad-e-hijr-o-wisal

zindagi main maza nahin baq

har haqiqat majaz ho jaye

har haqiqat majaz ho jaye

kafiron ki namaz ho jaye

minnat-e-charasaz kaun kare

dard jab jan nawaz ho jaye

ishq dil main rahe to ruswa ho

lab pe aye to raz ho jaye

lutf ka intazar karta hun

jor ta hadd-e-naz ho jaye

umr besud kat rahi hai 'Faiz'

kash afsha-e-raz ho jaye

ham parawarish-e-lauh-o-qalam karte rahenge

ham parawarish-e-lauh-o-qalam karte rahenge 

jo dil pe guzarti hai raqam karte rahenge 

asbab-e-gam-e-ishq baham karte rahenge 

wirani-e-dauran pe karam karte rahenge 

han talkhi-e-ayyam abhi aur bharegi 

han ahl-e-sitam mashq-e-sitam karte rahenge 

manzur ye talkhi ye sitam ham ko gawara 

dam hai to madawa-e-alam karte rahenge 

maikhana salamat hai to ham surkhi-e-may se 

tazin-e-dar-o-bam-e-haram karte rahenge 

baqi hai lahu dil main to har ashk se paida 

rang-e-lab-o-rukhsar-e-sanam karte rahenge 

ek tarz-e-tagaful hai so wo un ko mubarak 

ek arz-e-tamanna hai so ham karte rahenge