gul tera rang chura laye hain gulzaro main

gul tera rang chura laye hain gulzaro main
jal raha hun bhari barasat ki baucharo main

mujh se katra ke nikal ja magar ai jan-e-haya
dil ki lau dekh raha hun tere rukhsaron main

husn-e-begana-e-ehasas-e-jamal acha hai
gunche khilte hain to bik jate hain bazaron main

zikr karte hain tera mujh se baunavan-e-jafa
charagar phul piro laye hain talvaron main

zaKhm chup sakate hain lekin mujhe fun ki saugandh
Gam ki daulat bhi hai shamil mere shahakaron main

mujh ko nafrat se nahin pyar se maslob karo
main to shamil hun mohabbat ke gunahgaron main

ab tak to noor-o-niKhat-o-rang-o-sada kahun

ab tak to noor-o-niKhat-o-rang-o-sada kahun
main tujh ko chu sakun to Khuda jane kya kahun

lafzon se un ko pyar hai mafhum se mujhe
wo gul kahen jise main tera naqsh-e-pa kahun

ab justaju hai teri jafa ke jawaz ki
ji chahata hai tujh ko wafa ashna kahun

sirf is ke liye ke ishq isi ka zahur hai
main tere husn ko bhi sabut-e-wafa kahun

tu chal diya to kitne haqaiq badal gaye
najm-e-sahar ko marqad-e-shab ka diya karun

kya jabr hai ke butt ko bhi kahna pare Khuda
wo hai Khuda to mere Khuda tujh ko kya kahun

jab mere munh men meri zuban hai to kyun na main
jo kuch kahun yaqin se kahun barmala kahun

kya jane kis safar pe rawan hun azal se main
har intaha ko ek nai ibtida kahun

ho kyun na mujh ko apne mazaq-e-suKhan pe naz
Galib ko kainat-e-suKhan ka Khuda kahun

zakhm ko phul to sar sar ko saba kahte hain

zakhm ko phul to sar sar ko saba kahte hain
jane kya daur hai kya log hain kya kahte hain

kya qayamat hai ke jin ke liye ruk ruk ke chale
ab vahi log hamain abalapa kahte hain

koi batalao ke ik umr ka bichara mahabub
ittefaqan kahin mil jaye to kya kahte hain

ye bhi andaz-e-sukhan hai ke jafa ko teri
gamza-o-ishva-o-andaz-o-ada kahte hain

jab talak dur hai tu teri parastish kar lain
ham jise chu na sakain us ko khuda kahte hain

kya tajjub hai ke ham ahl-e-tamanna ko 'Faraz'
wo jo maharum-e-tamanna hain bura kahte hain

ye kya k sab se bayan dil ki halaten karni

ye kya k sab se bayan dil ki halaten karni
'Faraz' tujh ko na ain muhabbaten karani

ye qurb kya hai k tu samane hai aur hamain
shumar abhi se judai ki sa'aten karani

koi khuda ho k patthar jise bhi ham chahen
tamam umr usi ki ibadaten karni

sab apne apne qarine se muntazir us k
kisi ko shukr kisi ko shikayaten karani

ham apne dil se hain majabur aur logon ko
zara si bat pe barpa qayamaten karani

milen jab un se to mubaham si guftagu karna
phir apne ap se sau-sau vazahaten karani

ye log kaise magar dushmani nibhaten hain
hamin ko ras na ain muhabbaten karani

kabhi 'Faraz' naye mausamon main ro dena
kabhi talash purani raqabaten karani

ye aalam shauq kaa dekhaa na jaaye

ye aalam shauq kaa dekhaa na jaaye
wo but hai yaa Khudaa dekhaa na jaaye

ye kin nazaron se tum ne aaj dekhaa
ke teraa dekhanaa dekha naa jaaye

hameshaa ke liye mujh se bichhar jaa
ye manzar baarahaa dekhaa na jaaye

Galat hai jo sunaa par aazamaa kar
tujhe ai baavafaa dekhaa na jaaye

ye maharuumii nahiin paas-e-vafaa hai
koii tere sivaa dekhaa na jaaye

yahii to aashnaa banate hain aaKhir
koii naaaashnaa dekhaa na jaaye

'Faraz' apane sivaa hai kaun teraa
tujhe tujh se judaa dekhaa na jaaye

us ne kaha sun

us ne kaha sun
ahad nibhane ki khatir mat ana
ahad nibhane vale aksar majaburi ya
mahajuri ki thakan se lauta karte hain
tum jao aur dariya dariya pyas bujhao
jin ankhon main dubo
jis dil main bhi utaro
meri talab avaz na degi
lekin jab meri chahat aur meri Khvahish ki lau
itni tez aur itni unchi ho jaye
jab dil rode
tab laut ana

vafa k khvab muhabbat ka asara le ja

vafa k khvab muhabbat ka asara le ja
agar chala hai to jo kuch mujhe diya le ja

maqam-e-sud-o-ziyan a gaya hai phir janan
ye zakhm mere sahi tir to utha le ja

yahi hai qismat-e-sahara yahi karam tera
k bund bund ata kar ghata ghata le ja

gurur-e-dost se itna bhi dilshikasta na ho
phir uth k samane daman-e-iltaja le ja

nadamaten hon to sar bar-e-dosh hota hai
'Faraz' jan k evaz abaru bacha le ja

us ne sukuut-e-shab main bhii apanaa payaam rakh diyaa

us ne sukuut-e-shab main bhii apanaa payaam rakh diyaa
hijr kii raat baam par maah-e-tamaam rakh diyaa

aamad-e-dost kii naviid kuu-e-vafaa main aam thii
main ne bhii ik chiraaG-saa dil sar-e-shaam rakh diyaa

dekho ye mere Khvaab the dekho ye mere zaKhm hain
main ne to sab hisaab-e-jaan barsar-e-aam rakh diyaa

us ne nazar nazar main hii aise bhale suKhan kahe
main ne to us ke paanon main saaraa kalaam rakh diyaa

shiddat-e-tishnagii main bhii Gairat-e-maikashii rahii
us ne jo pher lii nazar main ne bhii jaam rakh diya

aur 'Faraz' chaahiiye kitanii muhabbatain tujhe
ke maaon ne tere naam par bachchon ka naam rakh diyaa

us ko juda hue bhi zamana bahut hua

us ko juda hue bhi zamana bahut hua
ab kya kahen ye qissa purana bahut hua

dhalti na thi kisi bhi jatan se shab-e-firaq
ai marg-e-nagahan tera ana bahut hua

ham khuld se nikal to gaye hain par ai khuda
itne se vaqaye ka fasana bahut hua

ab ham hain aur sare zamane ki dushmani
us se zara rabt barhana bahut hua

ab kyon na zindagi pe muhabbat ko var den
is ashiqi main jan se jana bahut hua

ab tak to dil ka dil se tarruf na ho saka
mana k us se milna milana bahut hua

kya kya na ham kharab hue hain magar ye dil
ai yad-e-yar tera thikana bahut hua

kahta tha nasehon se mere munh na aio
phir kya tha ek hu ka bahana bahut hua

lo phir tere labon pe usi bevafa ka zikr
ahmad 'Faraz' tujh se kaha na bahut hua

tere hote hue mahfil main jalte hain chirag

tere hote hue mahfil main jalte hain chirag
log kya sada hain suraj ko dikhate hain chirag

apni mahrumiyo pe sharminda hain
Khud nahi rakhte to auro k bujhate hain chirag

bastiyan chand sitaro pe basane vale
kurra-e-arz bujhate jate hain chirag

kya Khabar hai un ko k daman bhi bharak uthte hain
jo zamane ki havaon se bachte hain chirag

aisi tarikiyan ankho main basi hain 'Faraz'
rat to rat ham din ko jalate hain chirag

tarap uthun bhi to zalim teri duhai na dun

tarap uthun bhi to zalim teri duhai na dun
main zakhm zakhm hun phir bhi tujhe dikhai na dun

tere badan main dharakne laga hun dil ki tarah
ye aur bat k ab bhi tujhe sunai na dun

khud apne ap ko parakha to ye nadamat hai
k ab kabhi use ilzam-e-bevafai na dun

mujhe bhi dhundh kabhi mahv-e-ainadari
main tera aqs hun lekin tujhe dikhai na dun 

sholaa thaa jal-bujhaa hon havaayain mujhe na do

sholaa thaa jal-bujhaa hon havaayain mujhe na do
main kab kaa jaa chukaa hon sadaayain mujhe na do

jo zahar pii chukaa hon tumhiin ne mujhe diyaa
ab tum to zindagii kii duaayain mujhe na do

aisaa kahiin na ho ke palaTakar na aa sakon
har baar duur jaa ke sadaayain mujhe na do

kab mujh ko aiteraaf-e-muhabbat na thaa 'Faraaz'
kab main ne ye kahaa thaa sazaayain mujhe na do

kuch muhtasibon k khilwat main kuch waiz k ghar jati hai

kuch muhtasibon k khilwat main kuch waiz k ghar jati hai
ham bada-kashon k hise ko ab jam main kam kam ati hai

yun arz-o-talab se kab ai dil patthar-dil pani hote hain
tum lakh raza k khu dalo kab khu-e-sitamgar jati hai

bedad-garon ki basti hai yan dad kahan fariyad kahan
sar phorti phirti hai nadan fariyad jo dar dar jati hai

han ji k zayan k ham ko bhi tashwish hai lekin kya kjiye
har rah jo udhar ko jati hai maqtal se guzar kar jati hai

ab kucha-e-dilbar ka rah-rau rahzan bhi bane to bat bane
pahre se udu talte hi nahin aur rat barabar jati hai

ham ahal-e-qafas tanha bhi nahin har roz nasim-e-subah-e-watan
yadon se muattar ati hai ashkon se munawwar jati hai

sakut-e-sham-e-Khizan hai qarib a jao

sakut-e-sham-e-Khizan hai qarib a jao
bara udas saman hai qarib a jao

na tum ko Khud pe bharosa na ham ko zom-e-vafa
na aitabar-e-jahan hai qarib a jao

rah-e-talab main kisi ko dhyan nahin
hujum-e-hamsafaran hai qarib a jao

jo dasht-e-ishq main bichren vo umr bhar na mile
yahan yahan dhuan hi dhuan hai qarib a jao

ye andhian hain to shahar-e-vafa ki Khair nahin
zamana khakfashan hai qarib a jao

faqih-e-shahar ki majalis nahin k dur raho
ye bazm-e-pir-e-magan hai qarib a jao

'Faraz' dur k suraj garub samajhe gaye
ye daur-e-kamnazara hai qarib a jao

sab log liye sang-e-malamat nikal aye

sab log liye sang-e-malamat nikal aye
kis shahar main ham ahal-e-muhabbat nikal aye

ab dil ki tamanna hai to ai kash yahi ho
ansu ki jagah ankh se hasrat nikal aye

har ghar ka diya gul na karo tum k na jane
kis bam se khurshid-e-qayamat nikal aye

jo darpa-e-pindar hain un qatlgahon se
jan dek bhi samjho k salamat nikal aye

ai hamnafaso kuch to kaho ahad-e-sitam ki
ik harf se mumkin hai hikayat nikal aye

yaro mujhe maslub karo tum k mere bad
shayad k tumhara qad-o-qamat nikal aye

qurbaton main bhi judai ke zamane mange

qurbaton main bhi judai ke zamane mange
dil wo bemehar ki rone ke bahane mange

apana ye hal ke ji har chuke lut bhi chuke
aur muhabbat vahi andaz purane mange

ham na hote to kisi aur ke charche hote
khalqat-e-shahar to kahane ko fasane mange

dil kisi hal pe mane hi nahin jan-e-'Faraz'
mil gaye tum bhi to kya aur na jane mange

phir usi rahguzar par shayad

phir usi rahguzar par shayad
ham kabhi mil sakain magar shayad

jan pahachan se kya hoga
phir bhi ai dost gaur kar shayad

muntazir jin ke ham rahe tum ho
mil gaye aur hamsafar shayad

jo bhi bichare hain kab mile hain 'Faraz'
phir bhi tu intazar kar shyad

payam aye hain us yar-e-bevafa k mujhe

payam aye hain us yar-e-bevafa k mujhe
jise qarar na aya kahi bhula k mujhe

nashe se kahun to nahin yad-e-yar ka alam
k la ura hai koi dosh par hava k mujhe

judaiyan hon to aisi ki umr bhar na mile
fareb to do zara silsile bara k mujhe

main Khud ko bhul chuka tha magar jahan vale
udas chor gaye aina dikha k mujhe

muttafavatain hain mere khuda ki ye tu nahin koi aur hai

muttafavatain hain mere khuda ki ye tu nahin koi aur hai
ki tu asaman pe ho to ho pisar-e-zamin koi aur hai

wo jo raste the vafa ke the ye jo manzilain hain saza ki hain
mera hamsafar koi aur tha mera hamnashin koi aur hai

mere jism-o-jan main tere siva aur koi bhi dusra
mujhe phir bhi lagta hai is tarah ki kahin kahin koi aur hai

main asir apne gazal ka main faqir dasht-e-visal ka
jo hiran ko bandh ke le gaya wo subuktagin koi aur hai

muntazir kab se tahayyur hai teri taqrir ka

muntazir kab se tahayyur hai teri taqrir ka
bat kar tujh par guman hone laga tasvir ka

rat kya soye k baqi umr ki nind ur gai
Khvab kya dekha ki dharka lag gaya tabir ka

jane tu kis alam main bichara hai ki tere bagair
aj tak har lafz fariyadi meri tahrir ka

jis tarah badal ka saya pyas bharakta rahe
main ne vo alam bhi dekha hai teri tasvir ka

kis tarah paya tujhe phir kis tarah khoya tujhe
mujh sa munkir bhi to qail ho gaya taqdir ka

ishq main sar phorna bhi kya k ye be-meher log
ju-e-Khun ko nam dete hain ju-e-shir ka

jis ko bhi chaha use shidat se chaha hai 'Faraz'
sil-sila tuta nahin dard ki zanjir ka

main to avara shayar hon meri kya vaqat

main to avara shayar hon meri kya vaqat
ek do git pareshan se ga leta hon

gahe gahe kisi nakam sharabi ki tarah
ek do zahar ke sagar bhi charha leta hon

tu ke ik vadi-e-gulrang ki shahzadi hai
ek bekar se insan ke liye vaqf na ho

tere khvabon ke jaziron main bari raunaq hai
ek anjan se tufan ke liye vaqf na ho

himmat-e-iltija nahin baqi

himmat-e-iltija nahin baqi
zabt ka hausla nahin baqi

ik teri did chin gai mujh se
warna duniya main kya nahin baqi

apni mashq-e-sitam se hath na khench
main nahin ya wafa nahin baqi


teri chashm-e-alamnawaz ki khair
dil main koi gila nahin baqi

ho chuka khatm ahad-e-hijr-o-wisal
zindagi main maza nahin baqi

Khamosh ho kyon daad-e-jafaa kyon nahin dete

Khamosh ho kyon daad-e-jafaa kyon nahin dete
bismil ho to qaatil ko duaa kyon nahin dete

vahashat kaa sabab ruuzan-e-zindaan to nahin hai
mahar-o-maah-o-anjum ko bujhaa kyon nahin dete

ik ye bhi to andaaz-e-ilaaj-e-Gam-e-jaan hai
ai chaaraagaro dard barhaa kyon nahin dete

munsif ho agar tum to kab insaaf karoge
mujarim hai agar ham to sazaa kyon nahin dete

rahazan ho to haazir hai mataa-e-dil-o-jaan bhi
rahabar ho to manzil kaa pataa kyon nahin dete

kyaa bit gai ab ke 'Faraz' ahal-e-chaman par
yaaraan-e-qafas mujh ko sadaa kyon nahin dete

karon na yad agar kis tarah bhulaon use

karon na yad agar kis tarah bhulaon use
gazal bahana karon aur gungunaon use

wo khar-khar hai shakh-e-gulab ki manind
main zakhm-zakhm hon phir bhi gale lagaon use

ye log tazakare karate hain apne logon se
main kaise bat karon aur kahan se laon use

magar wo zudfaramosh zud ranj bhi hai
ke ruth jaye agar yad kuch dilaon use

vahi jo daulat-e-dil hai vahi jo rahat-e-jan
tumhari bat pe ai nasiho ganvaon use

jo hamsafar sar-e-manzil bichar raha hai 'Faraz'
ajab nahin ki agar yad bhi na aon use

is qadar musalsal thin shidaten judai ki

is qadar musalsal thin shidaten judai ki
aj pahali bar main ne us sa bevafai ki

varana ab talak yun tha khvahishon ki barish main
ya to tut kar roya ya gazalsarai ki

taj diya tha kal jin ko ham ne teri chahat main
aj un se majburan taza ashanai ki

ho chala tha jab mujh ko ikhtilaf apne se
tune kis ghari zalim meri hamnavai ki

tanz-o-tana-o-tohmat sab hunar hain naseh k
ap se koi puche ham ne kya burai ki

phir qafas main shor utha qaidiyon ka aur sayyad
dekhrna ura dega phir khabar rihai ki

is daur-e-bejunun ki kahani koi likho

is daur-e-bejunun ki kahani koi likho
jismon ko barf khun ko pani koi likho

koi kaho k hath qalam kis tarah hue
kyun ruk gai qalam ki ravani koi likho

kyon ahal-e-shauq sar-va-gareban hain dosto
kyon khun-ba-dil hai ahad-e-javani koi likho

kyon surma-dar-gulu hai har ek tayar-e-sukhan
kyon gulsitan qafas ka hai sani koi likho

han taza sanehon ka kare kaun intazar
han dil ki varadat purani koi likho

inhin khushgumaniyon main kahin jan se bhi na jao

inhin khushgumaniyon main kahin jan se bhi na jao
vo jo charagar nahin hai use zaKhm kyun dhikhao

ye udasiyon k mausam kahin rayegan na jayen
kisi zaKhm ko kuredo kisi dard ko jagao

vo kahaniyan adhuri jo na ho sakaingi puri
unhen main bhi kyun sunaun unhen tum bhi kyun sunao

mere hamsafar purane mere ab bhi muntazir hain
tumhen sath chorna hai to abhi se chor jao

ye judaiyon k raste bari dur tak gaye hain
jo gaya vo phir na lauta meri bat man jao

kisi bevafa ki khatir ye junun 'Faraz' kab tak
jo tumhen bhula chuka hai use tum bhi bhul jao

hava k zor se pindar-e-bam-o-dar bhi gaya

hava k zor se pindar-e-bam-o-dar bhi gaya
chirag ko jo bachate the un ka ghar bhi gaya

pukarte rahe mahafuz kishtiyon vale
main dubte hua dariya k par utar bhi gaya

ab ehtiyat ki divar kya uthate ho
jo chor dil main chupa tha vo kam kar bhi gaya

main chup raha k is main thi afiyat jan ki
koi to meri tarah tha jo dar par bhi gaya

sulagate sochte viran mausamon ki tarah
kara tha ahad-e-javani magar guzar bhi gaya

jise bhula na saka us ko yad kya rakhta
jo nam dil main raha zehan se utar bhi gaya

phati-phati hui ankhon se yun na dekh mujhe
tujhe talash hai jis ki vo shaKhs mar bhi gaya

magar falak ki adavat usi k ghar se na thi
jahan 'Faraz' na tha sail-e-gam udhar bhi gaya

har tamashai faqat sahil se manzar dekhta

har tamashai faqat sahil se manzar dekhta
kaun dariya ko ulatata kaun gauhar dekhta

wo to duniya ko meri divangi khush a gai
tere hathon main vagarna pahala patthar dekhta

ankh main ansu jare the par sada tujh ko na di
is tavaqqo par ki shayad tu palat kar dekhta

meri qismat ki lakirain mere hathon main na thin
tere mathe par koi mera muqaddar dekhta

zindagi phaili hui thi sham-e-hijran ki tarah
kis ko itana hausala tha kaun ji kar dekhta

dubane vala tha aur sahil pe cheharon ka hujum
pal ki mohalat thi main kis ko ankh bhar ke dekhta

tu bhi dil ko ik lahu ki bond samajha hai 'Faraz'
ankh gar hoti to qatre main samandar dekhta

gile fuzul the ahad-e-vafa k hote hue

gile fuzul the ahad-e-vafa k hote hue
so chup raha sitam-e-narava k hote hue

ye qurbaton main ajab fasle pare k mujhe
hai ashna ki talab ashna k hote hue

vo hilagar hain jo majburiyan shumar karain
chirag ham ne jalayen hava k hote huye

na kar kisi pe bharosa k kashtiyan dubin
khuda k hote huye nakhuda k hote huye

kaise khabar hai k kasa-ba-dast phirte hain
bahut se log saron par huma k hote hue

'Faraz' aise bhi lamhen kabhi kabhi aye
k dil girifta raha dilruba k hote hue

'Faraz' ab koi sauda koi junun bhi nahin

'Faraz' ab koi sauda koi junun bhi nahin
magar qarar se din kat rahe hon yun bhi nahin

lab-o-dahan bhi mila guftagu ka fun bhi mila
magar jo dil pe guzarati hai kah sakun bhi nahin

meri zuban ki luknat se badguman na ho
jo tu kahe to tujhe umr bhar milun bhi nahin

'Faraz' jaise koi diya turbat-e-hava chahe hai
tu pas aye to mumkin hai main rahun bhi nahin

chere main ne kabhi lab-o-rukhsar ke qisse

chere main ne kabhi lab-o-rukhsar ke qisse
gahe gul-o-bulbul ki hikaayat ko nikhaaraa

gahe kisi shahazaade ke afsane sunaaye
gahe kyaa duniyaa-e-paristaan kaa nazaaraa

main khoyaa rahaa jin-o-malaik ke jahaan main
har lahajaa agarche mujhe aadam ne pukaaraa

barason yon hi diljami-e-aurang ki khaatir
sau phuul khilaaye kabhi sau zakhm kharide

main likhataa rahaa hijv bagaavat manshon ki
main parhataa rahaa qasrnashinon ke qaside

ubharaa bhi agar dil main koi jazabaa-e-sarkash
is khauf se chup thaa ke koi honTh na si de

lekin ye tilismaat bhi taa der na rah paaye
aakhir mai-o-minaa-o-daf-o-chang bhi TuutTe

yon dast-o-garebaan huaa insan-o-khudaaband
nakhachir to tarape qafas-e-rang bhi TuuTe

is kashmakash-e-zarraa-o-anjum ki fizaa main
kashkol to kyaa afsar-o-aurang bhi TuuTe

main dekh rahaa thaa mere yaaron ne barhakar
qaatil ko pukaaraa kabhi maqtal ko sadaa di

gahe rasn-o-daar ke aagosh main jhuule
gahe haram-o-dair ki buniyaad hilaa di

jis aag se bharpuur thaa maahaul kaa sinaa
wo aag mere lauh-o-qalam ko bhi pilaa di

aur aaj shikastaa huaa har tauq-e-talaai
ab fan meraa darbaar ki jagir nahin hai

ab meraa hunar hai mere jamahuur ki daulat
ab meraa junon kaif-e-taazir nahin hai

ab dil pe jo guzaregi be-Tok kahongaa
ab mere qalam main koi zanjir nahin hai

badan main aag si cheharaa gulaab jaisaa hai

badan main aag si cheharaa gulaab jaisaa hai
ke zahar-e-gam kaa nashaa bhi sharaab jaisa hai


kahaan wo qurb ke ab to ye haal hai jaise
tere firaaq kaa aalam bhi khvaab jaisa hai

magar kabhi koi dekhe koi parhe to sahi
dil aainaa hai to cheharaa kitaab jaisa hai

wo samane hai magar tishnagi nahin jaati
ye kyaa sitam hai ke dariyaa saraab jaisa hai

'Faraz' sang-e-malaamat se zakhm zakhm sahi
hamain aziz hai khaanaakharaab jaisa hai

ab naye sal ki mohlat nahin milne vali

ab naye sal ki mohlat nahin milne vali
a chuk ab to shab-o-roz azabon vale

ab to sab dashna-o-khanjar ki zuban bolte hain
ab kahan log muhabbat k nisabon vale

zinda rahne ki tamanna ho to ho jate hain
fakhtaon k bhi kirdar uqabon vale

na mere zakhm khile hain na tera rang-e-hina
mausam aye hi nahin ab k gulabon vale

ab kis ka jashn manate ho us des ka jo taqsim hua

ab kis ka jashn manate ho us des ka jo taqsim hua
ab kis k git sunate ho us tan-man ka jo do-nim hua

us khvab ka jo reza reza un ankhon ki taqdir hua
us nam ka jo tukra tukra galiyon main be-tauqir hua

us parcham ka jis ki hurmat bazaron main nilam hui
us mitti ka jis ki hurmat mansub udu k nam hui

us jang ko jo tum har chuk us rasm ka jo jari bhi nahin
us zakhm ka jo sine pe na tha us jan ka jo vari bhi nahin

us khun ka jo badqismat tha rahon main bahaya tan main raha
us phul ka jo beqimat tha angan main khila ya ban main raha

us mashriq ka jis ko tum ne neze ki ani marham samajha
us magrib ka jis ko tum ne jitna bhi luta kam samajha

un masumon ka jin k lahu se tum ne farozan raten kin
ya un mazlumon ka jis se khanjar ki zuban main baten kin

us mariyam ka jis ki iffat lutti hai bhare bazaron main
us isa ka jo qatil hai aur shamil hai gamkhvaron main

in nauhagaron ka jin ne hamain khud qatl kiya khud rote hain
aise bhi kahin damsaz hue aise jallad bhi hote hain

un bhuk nange dhanchon ka jo raqs sar-e-bazar karain
ya un zalim qazzaqon ka jo bhes badal kar var karain

ya un Jhute iqraron ka jo aj talak aifa na hue
ya un bebas lacharon ka jo aur bhi dukh ka nishana hue

is shahi ka jo dast-ba-dast ai hai tumhare hisse main
kyon nang-e-vatan ki bat karo kya rakha hai is qisse main

ankhon main chupaye ashkon ko honthon main vafa k bol liye
is jashn main bhi shamil hun nauhon se bhara kashkol liye

koi chehra hua roshan na ujagar ankhain

koi chehra hua roshan na ujagar ankhain
aina dekh rahi thin meri pathar ankhain

le uri waqt ki andhi jinhen apne hamrah
aj phir dhund rahi hain wahi manzar ankhain

phut niklin to kai shahar-e-tamanna dube
ek qatre ko tarasati hui banjar ankhain

us ko dekha hai to ab shauq ka wo alam hai
apne halakon se nikal ai hain bahar ankhain

tu nigahon ki zuban Khub samajhata hoga
teri janib to utha karati hain aksar ankhain

log marte na dar-o-bam se takara ke kabhi
dekh lete jo 'Kamal' us ki samandar ankhain

ajnabi khauf fizaon main basa ho jaise

ajnabi khauf fizaon main basa ho jaise
shahar ka shahar hi aseb zada ho jaise

rat ke pichle pahar ati hain avazain si
dur shahara main koi chiKh raha ho jaise

dar-o-divar pe chai hai udasi aisi
aj har ghar se janaza sa utha ho jaise

muskurata hun pa-e-Khatir-e-ahabab magar
dukh to chehre ki lakiron pe saja ho jaise

ab agar dub gaya bhi to marunga na 'Kamal'
bahte pani pe mera nam likha ho jaise

tum aur fareb khao bayan-e-raqib se

tum aur fareb khao bayan-e-raqib se
tum se to kam gila hai ziyada nasib se

goya tumhari yad hi mera ilaj hai
hota hai pahron zikr tumhara tabib se

barbad-e-dil ka akhri saramaya thi umid
vo bhi to tum ne chhin liya mujh garib se

dhundla chali nigah dam-e-wapasi hai ab
a pas a ke dekh lu tujh ko qarib se

su-e-maikada na jate to kuchh aur bat hoti

su-e-maikada na jate to kuchh aur bat hoti
wo nigah se pilate to kuchh aur bat hoti

go hava-e-gulistan ne mere dil ki laj rakh li
wo naqab Khud uthate to kuch aur bat hoti

ye baja kali ne khil kar kiya gulistan muattar
magar ap muskurate to kuchh aur bat hoti

ye khule khule se gesu, inhen lakh tu sanware
mere hath se sanwarate, to kuch aur bat hoti

go haram ke raste se wo pohanch gaye Khuda tak
teri rahguzar se jate to kuchh aur bat hoti

kat hi gai judai bhi kab yun hua ke mar gaye

kat hi gai judai bhi kab yun hua ke mar gaye
tere bhi din guzar gaye mere bhi din guzar gaye

tu bhi kuch aur aur hai ham bhi kuch aur aur hain
jane wo tu kidhar gaya jane wo ham kidhar gaye

rahon main hi mile the ham rahen nasib ban gain
tu bhi na apne ghar gaya ham bhi na apne ghar gaye

wo bhi gubar-e-Khak tha ham bhi gubar-e-khak the
wo bhi kahin bikhar gaya ham bhi kahin bikhar gaye

koi kinar-e-ab-e-ju baitha hua hai sarnigun
kashti kidhar chali gai jane kidhar bhanwar gaye

tere liye chale the ham tere liye thehar gaye
tu ne kaha to ji uthe tu ne kaha to mar gaye

waqt hi kuch judai ka itna tavil ho gaya
dil men tere firaq ke jitne the zaKhm bhar gaye

barish-e-vasl wo hui sara gubar dhul gaya
wo bhi nikhar nikhar gaya ham bhi nikhar nikhar gaye

itne qarib ho gaye itne raqib ho gaye
wo bhi "Adeem" dar gaya ham bhi "Adeem" dar gaye

dil ajab gumbad k jis main ik kabutar bhi nahin

dil ajab gumbad k jis main ik kabutar bhi nahin
itna viran to murdaron ka muqaddar bhi nahin

Dabati jati hain mitti main badan ki kashtiyan
dekhane main ye zamin koi samandar bhi nahin

jitne hangame the sukhi tahaniyon se jhar gaye
per par phal bhi nahin angan main patthar bhi nahin

Khushk tahani par parinda hai ki patta hai 'Adeem'
ashiyana bhi nahin jis ka koi par bhi nahin

jitni pyari hain meri dharati jo zanjirain 'Adeem'
itana pyara to kisi dulhan ko zevar bhi nahin

shayad abhi hai rakh main koi sharar bhi

shayad abhi hai rakh main koi sharar bhi
kyon varna intazar bhi hai iztirar bhi

dhyan a gaya hai marg-e-dil-e-namurad ka
milane ko mil gaya hai sukun bhi qarar bhi

ab dhundhane chale ho musafar ko dosto
hadd-e-nigah tak na raha jab gubar bhi

har astan pe nasiyafarsa hain aj vo
jo kal na kar sake the tera intazar bhi

ik rah ruk gai to thithak kyon gai 'Ada'
abad bastiyan hain paharon ke par bhe

na gubar main na gulab main mujhe dekhana

na gubar main na gulab main mujhe dekhana
mere dard ki ab-o-tab main mujhe dekhana

kisi waqt sham malal main mujhe sochana
kabhi apane dil ki kitab main mujhe dekhana

kisi dhun main tum bhi jo bastiyon ko tyag do
isi rah-e-KhanaKharab main mujhe dekhana

kisi rat mah-o-najuum se mujhe puchhana
kabhi apani chashm purab main mujhe dekhana

isi dil se ho kar guzar gaye kai karavan
ki hijraton ke zab main mujhe dekhana

main na mil sakun bhi to kya hua ke fasana hun
nai dastan naye bab main mujhe dekhana

mere Khar Khar saval main mujhe Dhundna
mere git main mere Khvab main mujhe dekhana

mere ansuon ne bujhai thi meri tashnagi
isi bargzida sahab main mujhe dekhanaa

wohe ik lamha deed tha ke ruka raha
mere roz-o-shab ke hisab main mujhe dekhana

jo tarap tujhe kisi aine main na mil sake
to phir aine ke javab main mujhe dekhana

har ek harf-e-arazu ko dastan kiye hue

har ek harf-e-arazu ko dastan kiye hue
zamana ho gaya hai un ko mahaman kiye hue

surur-e-aish talKhi-e-hayat ne bhula diya
dil-e-hazin hai bekasi ko hijr-e-jan kiye hue

kali kali ko gulistan kiye hue vo ayenge
vo ayenge kali kali ko gulistan kiye hue

sukun-e-dil ki rahaton ko un se mang loon
sukun-e-dil ki rahaton ko bekaran kiye hue

vo ayenge to ayenge junun-e-shauq ubharane
vo jayenge to jayenge tabahiyan kiye hue

main un ki bhi nigah se chhupa ke un ko dekh loon
k un se bhi hai aj rashk bad_guman kiye hue

akhiri Tis azamane ko

akhiri Tis azamane ko
ji to chaha tha muskurane ko

yad itni bhi sakht jan to nahin
ik gharaunda raha hai dahane ko

sangrezon main dhal gaye ansu
log hansate rahe dikhane ko

zaKhm-e-nagma bhi lau to deta hai
ik diya rah gaya jalane ko

jalane vale to jal bujhe akhir
kaun deta Khabar zamane ko

kitne majbur ho gaye honge
ankahi bat munh pe lane ko

khul ke hansana to sab ko ata hai
log tarasate rahe ik bahane ko

reza reza bikhar gaya insan
dil ki viraniyan jatane ko

hasraton ki panahgahon main
kya thikane hain sar chhupane ko

hath kanTon se kar liye zakhmi
phul balon main ik sajane ko

as ki bat ho ki sans 'Ada'
ye Khilaune hain tuT jane ko

dil hai ainaa-e-hairat se do-chaar aaj kii raat

dil hai ainaa-e-hairat se do-chaar aaj kii raat
Gam-e-dauran main hai aks-e-Gam-e-yaar aaj kii raat

aatish-e-gul ko daaman se havaa detii hai
diidanii hai ravish-e-mauj-e-bahaar aaj kii raat

aaj kii raat kaa mahamaa hai malbuus-e-hariir
is chaman-zaar main ugate hain sharar aaj kii raat

main ne farahad kii aaGosh main shiriain dekhii
main ne paravez ko dekhaa sar-e-daar aaj kii raat

jo chaman sarf-e-Khizaan haain vo bulaate hain mujhe
mujhe fursat nahe ai jaan-e-bahaar aaj kii raat

dar-e-yazadain pe bhii jhukatii nahiain is vaqt jabiain
mujh se ankhain na lara aaj kii raat

mashaal-e-sher kaa laayaa hun charhavaa "Abid"
jagamagaatain haain shahiidon ke mazaar aaj kii raat

ye aarazuu thii tujhe gul ke ruu-ba-ruu karate

ye aarazuu thii tujhe gul ke ruu-ba-ruu karate
ham aur bul bul-e-betaab guftaguu karte

payaam bar na mayassar huaa to Khuub huaa
zabaan-e-Gair se kyaa shar kii aarazuu karate

merii tarah se maah-o-mahar bhii hain avara
kisii habiib ko ye bhii hain justajuu karate

jo dekhate terii zanjeer-e-zulf kaa aalam
asiir hone ke aazaad aarazuu karate

na puuchh aalam-e-baragashtaa taali-e-"Aatish"
barasatii aag main jo baaraaN kii aarazuu karate

yaar ko main ne mujhe yaar ne sone na diyaa

yaar ko main ne mujhe yaar ne sone na diyaa
raat bhar taali-e-bedaar ne sone na diyaa

ek shab bul bul-e-betaab ke jaage na nasiib
pahaluu-e-gul main kabhii Khaar ne sone na diyaa

raat bhar kii dil-e-betaab ne baatain mujh se
mujh ko is ishq ke biimaar ne sone na diyaa

yaar ko main ne mujhe yaar ne sone na diyaa
raat bhar taali-e-bedaar ne sone na diyaa

ek shab bul bul-e-betaab ke jaage na nasiib
pahaluu-e-gul main kabhii Khaar ne sone na diyaa

raat bhar kii dil-e-betaab ne baatain mujh se
mujh ko is ishq ke biimaar ne sone na diyaa

sun to sahii jahaan main hai teraa fasaanaa kyaa

sun to sahii jahaan main hai teraa fasaanaa kyaa
kahti hai tujh se Khalq-e-Khudaa Gaibanaa kya

zina saba kaa Dhundati hai apni musht-e-Khaak
baam-e-baland yaar ka hai astana kya

ati hai kis tarah se meri kabz-e-ruuh ko
dekhun to maut dhund rahe hai bahana kya

betab hai kamal hamara dil-e-aziim
mahmaan saray-e-jism ka hoga ravana kya

tum meri ankh k tewar na bhula paoge

tum meri ankh k tewar na bhula paoge
ankahi bat ko samjhoge to yad aunga

ham ne khushyon ki tarah dukh bhi ikathe dekhe
safah-e-zist ko paltoge to yad aunga

isi andaz mein hote the mukhatib mujh se
khat kisi aur ko likhoge to yad aunga

sard raton k mahkate hue sannaton mein
jab kisi phul ko chumoge to yad aunga

ab tere ashk main honthon se chura leta hun
hath se khud inhen ponchoge to yad aunga

shal pahnayega ab kaun decembar mein tumhen
barishon mein kabhi bhigo ge to yad aunga

aj tum mahfil-e-yaran pe ho magrur bahut
jab kabhi tut k bikhroge to yad aunga

hadse ayenge jiwan mein to tum ho k nidhal
kisi diwar ko thamoge to yad aunga

is mein shamil hai meri bakht ki tariki bhi
tum siyah rang jo pahnoge to yad aunga

kash main tere hasin hath ka kangan hota

kash main tere hasin hath ka kangan hota

tu bare pyar se bare chao se bare arman k sath
apni nazuk si kalai mein charhati mujh ko
aur betabi se furqat k khizan lamhon mein
tu kisi soch mein dubi jo ghumati mujh ko
main tere hath ki khushbu se mahak sa jata
jab kabhi mud mein a kar mujhe chuma karti
tere honthon ki shiddat se main dahak sa jata

rat ko jab bhi tu nindon k safar par jati
marmari hath ka ik takya banaya karti
main tere kan se lag kar kai baten karta
teri zulfon ko tere gal ko chuma karta
jab bhi tu band qaba kholne lagti janan
apni ankhon ko tere husn se khera karta
mujh ko betab sa rakhta teri chahat ka nasha
main teri ruh k gulshan mein mahakta rahta
main tere jism k angan mein khanakta rahta
kuch nahin to yahi benam sa bandhan hota

kash main tere hasin hath ka kangan hota

wafa k shish mahal mein saja liya main ne

wafa k shish mahal mein saja liya main ne
wo ek dil jise patthar bana liya main ne

ye soch kar k na ho tak mein khushi koi
gamon ki ot mein khud ko chupa liya main ne

kabhi na khatm kiya main ne roshani ka muhaz
agar chirag bujha, dil jala liya main ne

kamal ye hai k jo dushman pe chalana tha
wo tir apne kaleje pe kha liya main ne

'Qateel' jiski adawat mein ek pyar bhi tha
us admi ko gale se laga liya main ne

ulfat ki nai manzil ko chala, tu banhen dal k banhon mein

ulfat ki nai manzil ko chala, tu banhen dal k banhon mein
dil torne wale dekh k chal, ham bhi to pare hain rahon mein

kya kya na jafayen dil pe sahin, par tum se koi shikwa na kiya
is jurm ko bhi shamil kar lo, mere masum gunahon mein

jahan chandni raton mein tum ne khud hamse kiya iqarar-e-wafa
phir aj hain ham kyon begane, teri beraham nigahon mein

ham bhi hain wahin, tum bhi ho wahi, ye apni-apni qismat hai
tum khel rahe ho khushiyon se, ham dub gaye hain ahon mein

sham k sanwale chehre ko nikhra jaye

sham k sanwale chehre ko nikhra jaye
kyon na sagar se koi chand ubhra jaye

ras aya nahin taskin ka sahil koi
phir mujhe pyas k dariya mein utra jaye

meharban teri nazar, teri adayen qatil
tujhko kis nam se ai dost pukara jaye

mujhko dar hai tere wade pe bharosa kar k
muft mein ye dil-e-khushfaham na mara jaye

jiske dam se tere din-rat darakhshan the "Qateel"
kaise ab us k bina waqt guzara jaye

sadma to hai mujhe bhi ki tujhse juda hun main

sadma to hai mujhe bhi ki tujhse juda hun main
lekin ye sochta hun k ab tera kya hun main

bikhra para hai tere hi ghar mein tera wajud
bekar mahfilon mein tujhe dhundta hun main

main khudkashi k jurm ka karta hun aitaraf
apne badan ki qabr mein kabse gara hun main

kis-kiska nam laun zaban par k tere sath
har roz ek shakhs naya dekhta hun main

na jane kis ada se liya tune mera nam
duniya samajh rahi hai k sab kuch tera hun main

le mere tajurbon se sabak ae mere raqib
do char sal umr mein tujhse bara hun main

jaga hua zamir wo aina hai "Qateel"
sone se pahale roz jise dekhta hun main

rachi hai ratjago ki chandani jin ki jabinon mein

rachi hai ratjago ki chandani jin ki jabinon mein
'Qateel' ek umr guzri hai hamari un hasinon mein

wo jin k anchalon se zindagi takhlik hoti hai
dharakta hai hamara dil abhi tak un hasinon mein

zamana parsai ki hadon se ham ko le aya
magar ham aj tak ruswa hain apne hamnashinon mein

talash un ko hamari to nahin puch zara un se
wo qatil jo liye phirte hain khanjar astinon mein

pyas wo dil ki bujhane kabhi aya bhi nahin

pyas wo dil ki bujhane kabhi aya bhi nahin
kaisa badal hai jiska koi saya bhi nahin

berukhi is se bari aur bhala kya hogi
ek muddat se hamein us ne sataya bhi nahin

roz ata hai dar-e-dil pe wo dastak dene
aj tak hamne jise pas bulaya bhi nahin

sun liya kaise Khuda jane zamane bhar ne
wo fasana jo kabhi hamne sunaya bhi nahin

tum to shayar ho 'Qateel' aur wo ik am sa shakhs
us ne chaha bhi tujhe aur jataya bhi nahin

pareshan rat sari hai sitaro tum to so jao

pareshan rat sari hai sitaro tum to so jao
sukut-e-marg tari hai sitaro tum to so jao

hanson aur hanste-hanste dubte jao khalaon mein
hamein ye rat bhari hai sitaro tum to so jao

tumhen kya aj bhi koi agar milne nahin aya
ye bazi ham ne hari hai sitaro tum to so jao

kahe jate ho ro-ro k hamara hal duniya se
ye kaisi razdari hai sitaro tum to so ja

hamein to aj ki shab pau phate tak jagna hoga
yahi qismat hamari hai sitaro tum to so jao

hamein bhi nind a jayegi ham bhi so hi jayenge
abhi kuch beqarari hai sitaro tum to so jao

pahle to apne dil ki raza jan jaiye

pahle to apne dil ki raza jan jaiye
phir jo nigah-e-yar kahe man jaiye

pahle mizaj-e-rahguzar jan jaiye
phir gard-e-rah jo bhi kahe man jaiye

kuch kah rahi hai ap k sine ki dharakane
meri sunen to dil ka kaha man jaiye

ik dhup si jami hai nigahon k as pas
ye ap hain to ap pe qurban jaiye

shayad huzur se koi nisbat hamein bhi ho
ankhon mein jhank kar hamein pahchan jaiye

milkar juda hue to na soya karenge ham

milkar juda hue to na soya karenge ham
ek dusre ki yad mein roya karenge ham

ansu chalak chalak ke satayenge rat bhar
moti palak palak mein piroya karenge ham

jab duriyon ki ag dilon ko jalayegi
jismon ko chandani mein bhigoya karenge ham

gar de gaya daga hamein tufan bhi 'Qateel'
sahil pe kashtiyon ko duboya karenge ham

jo bhi guncha tere honton par khila karta hai

jo bhi guncha tere honton par khila karta hai
wo meri tangi-e-daman ka gila karta hai

der se aj mera sar hai tere zanon par
ye wo rutba hai jo shahon ko mila karta hai

main to baitha hun dabaye huye tufanon ko
tu mere dil ke dharakne ka gila karta hai

rat yon chand ko dekha hai nadi mein raksan
jaise jhumar tere mathe pe hila karta hai

kaun kafir tujhe ilzam-e-tagaful dega
jo bhi karta hai muhabbat ka gila karta hai

ik-ik patthar jor k main ne jo diwar banai hai

ik-ik patthar jor k main ne jo diwar banai hai
jhanku us ke pichhe to ruswai hi ruswai hai

yon lagta hai sote jagte auron ka mohtaj hun main
ankhen meri apni hain par un mein nind parai hai

dekh rahe hain sab hairat se nile-nile pani ko
puche kaun samandar se tujh mein kitni gahrai hai

sab kahte hain ik jannat utri hai meri dharti par
main dil mein sochun shayad kamzor meri binai hai

bahar sahan mein peron par kuch jalte bujhte jugnu the
hairat hai phir ghar k andar kis ne ag lagai hai

aj hua malum mujhe is shahar k chand sayanon se
apni rah badalte rahna sabse bari danai hai

tor gaye paiman-e-wafa is daur mein kaise kaise log
ye mat soch 'Qateel' k bas ik yar tera harjai hai

hijr ki pahli sham k saye dur ufaq tak chaye the

hijr ki pahli sham k saye dur ufaq tak chaye the
ham jab us k shahar se nikle sab raste sanwlaye the

jane wo kya soch raha tha apne dil mein sari rat
pyar ki baten karte karte us k nain bhar aye the

mere andar chali thi andhi thik usi din patjhar ki
jis din apne jure mein usne kuch phul sajaye the

usne kitne pyar se apna kufr diya nazrane mein
ham apne iman ka sauda jis se karne aye the

kaise jati mere badan se bite lamhon ki khushbu
khwabon ki us basti mein kuch phul mere ham-saye the

kaisa pyara manzar tha jab dekh ke apne sathi ko
per pe baithi ik chiriya ne apne par phailaye the

rukhsat k din bhigi ankhon us ka wo kahna ha "Qateel"
tum ko laut hi jana tha to is nagri kyun aye the

har bezaban ko sholanawa kah liya karo

har bezaban ko sholanawa kah liya karo
yaro sukut hi ko sada kah liya karo

khud ko fareb do k na ho talkh zindagi
har sangdil ko jane-e-wafa kah liya karo

gar chahte ho khush rahen kuch bandagan-e-khas
jitne sanam hain un ko khuda kah liya karo

insan ka agar qad-o-qamat na barh sake
tum is ko nuqs-e-ab-o-hawa kah liya karo

apne liye ab ek hi rah-e-nijat hai
har zulm ko raza-e-khuda kah liya karo

le de k ab yahi hai nishan-e-ziya "Qateel"
jab dil jale to us ko diya kah liya karo

guzre dinon ki yad barsati ghata lage

guzre dinon ki yad barsati ghata lage
guzrun jo us gali se to thandi hawa lage

mehman banke aye kisi roz agar wo shakhs
us roz bin sajaye mera ghar saja lage

main is liye manta nahin wasl ki khushi
mere raqib ki na mujhe baddua lage

wo qahat dosti ka para hai k in dinon
jo muskura k bat kare ashna lage

tark-e-wafa k bad ye us ki ada 'Qateel'
mujhko sataye koi to us ko bura lage

garmi-e-hasrat-e-nakam se jal jate hain

garmi-e-hasrat-e-nakam se jal jate hain

ham charagon ki tarah sham se jal jate hain

bach nikalate hain agar atih-e-sayyad se ham

shola-e-atish-e-gulfam se jal jate hain

khudnumai to nahin shewa-e-arbab-e-wafa

jin ko jalna ho wo aram se jal jate hain

shama jis ag mein jalti hai numaish k liye

ham usi ag mein gumnam se jal jate hain

jab bhi ata hai mera nam tere nam ke sath

jane kyun log mere nam se jal jate hain

rabta baham pe hamein kya na kahenge dushman

ashna jab tere paigam se jal jata hai

duniya ne ham pe jab koi ilzam rakh diya

duniya ne ham pe jab koi ilzam rakh diya
ham ne muqabil us k tera nam rakh diya

ik khas had pe a gai jab teri berukhi
nam us ka ham ne gardish-e-ayyam rakh diya

main larkhara raha hun tujhe dekh-dekh kar
tune to mere samne ik jam rakh diya

kitna sitamzarif hai wo sahib-e-jamal
us ne diya jala k lab-e-bam rakh diya

insan aur dekhe bagair us ko man le
ik khauf ka bashar ne Khuda nam rakh diya

ab jis k ji mein aye wahi paye raushani
ham ne to dil jala k sar-e-am rakh diya

kya maslahatshanas tha wo adami 'Qateel'
majburiyon ka jis ne wafa nam rakh diya