Tuesday, January 4, 2011

Us kay chehray pe jab naqaab raha Aik girhan maiN aftaab raha


Us kay chehray pe jab naqaab raha
Aik girhan maiN aftaab raha

Haal apna sada kharaab raha
Phir bhi ye zarf lajawaab raha

Umr bhar narasaayee saath rahi
Haath se door maahtaab raha

Tangdasti zameeN pe lay aayee
AsmaaN per hamara khwaab raha

Tab-e-deedaar ham ko ho na saki
Wo bohot dair be-hijaab raha

Aik lamhay ki dil-lagi ke tufail
Umr bhar dil maiN izteraab raha

Band hoti kitab-e-hasti ka
An-khula haaye aik baab raha

Lazzat-e-dard kab uTha paatay
Roz ham par naya azaab raha

Khud ko darya to ye bhi samjha tha
Apnay dhokay maiN khud Saraab raha

ye zard chehray ye sard ankhain mohabbaton ki nishanian hain



ye zard chehray ye sard ankhain
mohabbaton ki nishanian hain

main jis taraf bhi dekhta hoon
mere char soo tanhaian hain

use mujh se jo hain shikayatain
mere undar ki khamian hain

udass rastoon pe chalna hai to
mujh main sari udasian hain

ishq_o_muhabat, peyar_o_wafa
gaye dino ki khanain hain

sar_e_sham mujhe ye khabar mili mujhe us ne dil se bhula dia


sar_e_sham mujhe ye khabar mili
mujhe us ne dil se bhula dia

mujhe kia khabar ye keyun huwa
mujhe khak kar ke ura dia

han meri be rukhi thi be waja
mere salook ka hi sila dia


main to tha tere qareeb tar
mujhe ajnabi keyun bana dia

Khaama ko bhigoti rahi ehsaas ki baarish


Khaama ko bhigoti rahi ehsaas ki baarish
Qirtaas pe hoti huwi akkaas ki baarish

BooNdooN ko tarasti rahi is shehr ki matti
Rukne pe nahiN aayi wo ban baas ki baarish

Hairat k falak par rahe afkaar kay badal
Izhaar k hoNtoN pe rahi pyaas ki baarish

Kuch bhaap uthi yaas kay dariyaa se achaanak
KhwaaboN ki hawaaoN se huwi aas ki baarish

Mahdood rahi un ki zameeN apni Gharaz tak
hoti rahi in aaNkhoN se iKhlaas ki baarish

AaNkhoN maiN utar jaaye hay! saaNsoN maiN basay hay!
Komal hay bohat WARD hasiN baas ki baarish

insaan nahi hain ye pathar ke putle hain



insaan nahi hain ye

pathar ke putle hain

be zarf bande hain

kia ye andhe hain

jo

kisi ki jaan lete hain

nahi maloom ye inko

kisi ki jaan lene se

koi janat nahi milti

ye jis ki jaan lete hain

unhi ke ghar ujarte hain

wohi barbaad hote hain

kisi ke bahi hote hain

kisi ke baap hote hain

magar ye na samjh bande

na jane kis tarah se ye

kisi ki jaan lete hain

Kuch nahin likhna hy ab to khali mairi bayaaz rehti hai


Kuch nahin likhna hy ab to khali mairi bayaaz rehti hai
Jee ko behlanay ke liye ab sath mairi hamsaaz rehti hai

Dil ki baat kehnay se dil ko aaram to mil hi jata hai
Per dekhna hy kab tak voh pas uskay raaz rehti hai

Ham kahan rehtay hain ye guman ham ko bhi rehta hai
Kiya bataaian ham ke aaj kal tabiyat bhi nasaaz rehti hai


Gardish e doran se dil ki dhadkanon se bhi dar lagta hai
Ham to chahtay hain aatay rahain per voh naraz rehti hai

Ab to khayal e husan ko bhi rok daiti hain hoorain
Youn bhi dunya ki runginion se tabiyat baaz rehti hai

Samad tu ne daikhay hain zindagi me badltay lamhaat
Ke kaanon mein aaj bhi voh goonjti aawaaz rehti hai

Meri aankhon ki nami kon chura sakta hai


Meri aankhon ki nami kon chura sakta hai
Yeh wo gohar hai jisay hum nay chupa rakha hai

Ye kesi rit hai Rahi K jis main dard aisa hai



Ye kesi rit hai Rahi
K jis main dard aisa hai
K jab mehsoos hota hai
Koi humdard nahi hota
Ye kesa khail dunya ka
K jis main jit bhi jaao
Safar Aakhir nahi hota
Sama chaahay badal jaaye
Faza zarroon main dhal jaaye
Nishaan Ki maut hay naa-paid
Fazaa-ay Soog hay barpa
Khushi zindan main hay qaid

Hawaayen Saath main apnay
Hazaaron tir laati hain
Tabassum nooch leti hay
Khushi ki chooti chooti Mootiyon ko
Janay kesay khooj leti hain
haseen-o-dilnasheen pooday
Khizan K Waar sehtay hain
Sisaktay Hain, Bilaktay hain
Magar chup chaap rehtay hain
Darakhton per Udaasion ki
Jesay BAIL hay chaayi
YE KESA KHAIL HAY RAHI

Har ik chehray pe
teh dar teh
Kayi parday
Zubaan khamoosh hay sab ki
Koi aa ker dua ker day
Koi tu is sukoot-e-raftagan Ko
Toor k jaaye
Koi tu aaaye
Jo toota howa pull joor k jaye


Jidhar dekho hay maayosi
Jidhar jaao hay tanhaai
Na hi mausam suhaana hay
Na hi kalyoon main barnaai
Na hi afkaar tabinda
Na hi soochon main Raanai

Mazaar-e-Dil howa Khasta
Hay har ik nafs lab-basta
Bari mushkil main hain Maula
Tera Hi aasra hay ab
Tujhi sey maangtay hain Rab
Jahan dekhain wo daldal hay
Jahan Jaayen wahin Khaayi
YE KAISI RIT HAI RAHI

Gham e duniya se dil bharte nahi hain


Gham e duniya se dil bharte nahi hain.
GareebaN chaak ham phirte nahiN haiN.

YahaN Thokar to lagti hai sabhi ko,
Magar ahl e hunar girte nahiN haiN.

Kabhi bhi ahl e Haq baatil ke aage,
sar e tasleem kham karte nahiN haiN.

Khuda ka khauf ho jinke diloN meN,
Wo duniya se kabhi Darte nahiN haiN.

NaSeeHat waai'zoN ki kaon maane,
Wo jo kehte haiN khud karte nahiN haiN.

Fanaa ho jaayegi har cheez
Jo ahl e i'lm haiN marte nahiN haiN.

duaaein radd nahi hotiein


suno logo
gunaah saarey zameeN se aasmaaN tak
phail jaaiN or
falak ko daiN azaabooN ki agar dahwat
to aese me ndaamat ka koi qatraa
azaaboN k waseeh daryaa k rukh ko
morh deta hay, junooN ko torh detaa hay
agar ye haath uth jaeiN duhaa ko to
gunaahooN k pahaarhooN ko mitaa daalaiN
zameen-o-aasmaaN ko yeh hilaa daalaiN
chalo ham tum duhaa kar laiN
Khudaa se iltijaa kar laiN
khaloos-e-dil se maangaiN to
wafaaeN radd nahi hotiiN
duaaein radd nahi hotiein

wo roshni kyun bikher gaye


wo roshni kyun bikher gaye
wo andhiain keyun ujar gaye

mujhe hai pata ye keyun huwa
hain judain bhi to bharr gaye

wo jo chandni hai wisaal ki
wo hijr hi main hain mar gaye

mujhe chahton se hai gila
meri rahatain hain kidher gaye

ye ishq hai ya mera junoon
mujhe tu mila main jidher gaye

pyaari hai humko kis liye furkat na poochho


pyaari hai humko kis liye furkat na poochho
baad-e-judaai vasl ki lazzat na poochho

patthar pighhalne mein guzar jaati hai sadiyaan
hai butparasti kis kadar aafat na poochho

kuchh husn unka, kuchh jawani ka takaaza
kaise lagi deedaar ki ye lat na poochho

aashiqmijaazi ne kiya hai naam roshan
kaisi sharifon se mili izzat na poochho

thumri, gazal, mujre hazaaron sun chuke hain
besaaz lori ki magar rangat na poochho

Apna mat'lab sab ki Haajat par muqaddam ho gaya



Apna mat'lab sab ki Haajat par muqaddam ho gaya
Khud gharaz is daur meN har ibn e aadam ho gaya


Nafsa nafsi har taraf hai kaam aaye kis ke kaon,
Har bashar ko apna dam or apna hi gham ho gaya.


Bughz ka, keene ka, nafrat ka diloN par zang hai
Rang ulfat ka, wafaa ka pyaar ka kam ho gaya.


Kar liya sajdah khuda ko bhi jo dil meN aa gayi,
But jahaN aayaa nazar sar khud ba khud kham ho gaya.


Zakhm e dil ke dard ka iHsaas hota tha kabhi,
Dard e dil ab khud hi zakhm e dil ka marham ho gaya.


Aaj dil meN yaar ke kya Husn aaraayi ki thi,
Tha ghazab haTna nigaahoN ka wo barham ho gaya.


Girya e aHbaab meN ham hi na ho paaye shareek,
Tab huyi ham ko khabar jab ham pe maatam ho gsaya.


ChhoR do khuda ke waaste ye shae'ri,
Bas tumhaari shae'ri se naak meN dam ho gaya

hawa duniya ki aisi hai nahi tum se gila koi


hawa duniya ki aisi hai nahi tum se gila koi
riwaaj bhool jane ki yahan adat sabhi ki hai

Hum ko manzil ka kuch pata bhi nahi Laut jaane ka raasta bhi nahi


Hum ko manzil ka kuch pata bhi nahi
Laut jaane ka raasta bhi nahi

Hum faqeeroN ke paas dil ke siwa
Pesh karne ko kuch bacha bhi nahi

Phir se dasht-e-junuN pukaare hai
Chaak-e-daaman abhi sila bhi nahi


Kuch tu milta humein zamanay se
Kia yehaN piyar ka sila bhi nahi?

Us ka milna tha khawaab ke maani'Nd
Jo ke mil bhi gaya, mila bhi nahi

Bin kahe baat ban nahi sakti
Aur kehne ka hosla bhi nahi

Milna chaho tu dau gharoN ke beech
Hai, magar itna faasla bhi nahi

bijlee si lapaktee ho, taktay yeh samaan hum hon


bijlee si lapaktee ho, taktay yeh samaan hum hon
palkon ki ridaa uthay, aur sirf wahaan hum hon

woh aankh uthaa dekhain, hum doob kay phir ubhrain
manzil ka nishaan gum ho , ik aisay jahaan hum hon

palkon say nazar tuk ka , lamhon main saffar tay ho
sahil say samunder ko, pal bhar main rawaan hum hon

woh sub ko bhulaa dalain. bus zikr karain meraa
lub jub bhi khulain un kay, aiy kaash bayaan hum hon

andaaz anokha hai , magroor nazar un ki
taskheer unhain kar lain, woh bankay jawaan hum hon

azhar ji chalo khud ko chahet say sajjatay hain
woh shaad rahain jis main, ik aisaa makaan hum hon

Khuli aankhoon se soney ki aziyaat maar deti hai


Khuli aankhoon se soney ki aziyaat maar deti hai
Hamain tu neeNd ki be-manwiyat maar deti hai

Samar ki kokh mein ik zaiqa mehfooz honey tak
Shajar ko mosamooN ki barbariyat maar deti hai

Saharey k liye mazboot bunyadain hi kafi hain
Magar deewar ko pani ki niyat maar deti hai

KaheiN varsey mein aNdhi khawhishain parwan chaRti hain
Kahein zindooN ko murdooN ki wasiyat maar deti hai

Kisi ko umr bhar ki aashnaai kuch naheiN deti
Kisi sey lamha bhar ki ajnabiyat maar deti hai

Ana par boojh hooti hain kaheiN be-shakl awazain
Kahein khamoshiyooN ki aksariyat maar deti hai

mohabbat cheez kya hai tum kabhi mujh ko jo batlao


mohabbat cheez kya hai tum kabhi mujh ko jo batlao
meri her soch kis liye bas tum se he mansoob rehti hai?
batao kis liye jana?
na meri soch sathi si,
na mera pyar sathi sa,
na mai pagal sa majnu hun,na mai kasa liye gada
toh phir mai kiun aseer-e-dard hun?
batao kis liye jana?
kabhi jab shaakh se ik phool juda ho,
kabhi jab shaam ko suraj dheere se tuloo ho,
kabhi jab ankh se be-kal sa aansoo tapak jaye,
kabhi barish ki rim jhim mai achanak dhoop a jaye
toh tum kiun bin bulaye mehmaan ban k chale ate ho?
batao kis liye jana?
muhabbat cheez kya hai tum kabhi mujh ko jo batlao
keh mai anjaan hun iss dard ki pur-kaif lazat se
hosake toh itna kaam ker dena
mujhe qaidi parindon ko abhi azad kerna hai...

Dard Be-Karaa'n Hai Dil Mein Jo Rawa'n Hai



Dard Be-Karaa'n Hai
Dil Mein Jo Rawa'n Hai
Jaanta Hai Woh Magar
Usko Yeh Gumaa'n Hai

Baarishon Ke Aane Tak
Zabt Ker Hee Jaoonga
Jis Tarah Bhi Ban Paraa
Hansoonga, Muskuraoonga

Mujh Pe Hai Bahut Yaqee'n
Usko Yeh Khabar Nahin
Ashk Tou Aazad Hain
Dil Pe Tou Jabr Nahin

Baarishon Ke Aanay Tak
Ashk Ruk Na Paayen Ge
Jaanta Hoon Zabt Ke
Bandd Toot Jaayen Ge

Phir Bhi Yeh Khayal Hai
Uska Maan Rakhna Hai
Ashk Na Woh Dekh Lay


Yeh Dhayan Rakhna Hai

Surkh, Namm Aankhain Liye
Dekhta Hoon Aasman
Aur Sawaal Karta Hoon
Ae Khaaliq-E-Do-Jahan
.
.
Baarishain Kab Aayengi?
.
Baarishain Kab Aayengi?

Na Roye Ab Kyun Keh Meray Dil Ko Teri Wafaa Per Yaqee'n Bahut Tha


Na Roye Ab Kyun Keh Meray Dil Ko Teri Wafaa Per Yaqee'n Bahut Tha
Bikhar Gaya Jis Ke Haatho'n, Guul Ko Ussi Hawaa Per Yaqee'n Bahut Tha

Yeh Kya Keh Darr Ke Bhan'war Se Ab Tum Talaash Mein Na-Khuda Ki Guum Ho
Chalay Thay Saahil Se Yaaro Jab Tum, Tumhain Khudaa Per Yaqee'n Bahut Tha

Woh Kehh Raha Tha Keh TU Dua Kar, "Kabhi Milain Na Bichharr Ke Ab Hum"
Woh Jaanta Tha Qubool HoGi, Meri Duaa Per Yaqee'n Bahut Tha

Hai Ab Yaqee'n Keh Sadaayen Dil Ki Kisi Ke Dil Tak Nahin Pohanchtie'n
Ussay Pukaara Nahin Tha Jab Tak, Har Ik Sadaa Per Yaqee'n Bahut Tha

Bahut Barasnay Ki Iss Baras Bhi, Hamaari Aankho'n Ne Baazi Jeeti
Hamain Yaqee'n Tha Inn Aansoo'o'n Per, Ussay Ghataa Per Yaqee'n Bahut Tha

Jo Baat Nikli Thi Teri Chuup Se, Shehr Ke Har Aik Ghar Mein Goonji
Hamain To Hona Tha Yun Bhi Ruswaa, Har Aashna Per Yaqee'n Bahut Tha


Payaam Koi Na Pohanchaa Uss Tak, Magar Gilaa Ab Karain Bhi Kis Se
Na Likhay Do Lafz Uss Ko Hum Ne, Hamain Sabaa Per Yaqee'n Bahut Tha

Wafaa Ki Aadat Bahut Pasand Thi, Wafaa Ki Aadat Ne Jaan Le Li
Dil-e-Hazee'n Ab Zara Bataa Tu, Kya Iss Adaa Per Yaqee'n Bahut Tha

Ussay Bhi Rasto'n Ne Poochha HoGa, "Kaha'n Pe Chhorr Aaye HamSafar Ko?"
Hamain Bhi Poochha Kaha'n Hai Woh Dil, Jissay RAZA Per Yaqee'n Bahut Tha

Saans ban jao or bus jao mairy saanson mein


Saans ban jao or bus jao mairy saanson mein
Bov laingay baramasi ko dil ke makinon mein

Insaan ki fitrat me hy kabhi badal jana
doston ko chod detay hain baton baton mein

Jahan se na kehtay phira karo ke dua karna
Kitnay aisay bhi hain achcha nahin hota duaon mein

Aankh tak hi ki bat hoti to rastah kar laitay
Ootar gayi hy bat jo seel gayi hy sinon mein

Faqat dikhavay per hi haq ko na pehchanay koi
Bahot insann badal jatay hain raton raton mein

Piyas meri na bujhi mooft me bhigna parah
Dost istrah ke bhi miltay hain barstay badlon mein

To phir kisnay khushbu ki phelai hogi jal?
Ham to aksar raha karay kagaz ke phoolon mein

Is se barh kar bhi hain andhairay dil ke under bhi
Nh matam karain koi yahan vahan, andheron mein

Doston ke chakkar me phansnay ki khair ho
Kashti phans ke bhanvar se nh nikli kinaron mein

Bhap ban kar samandar se barsay badal, banay jharnay
Kar sakta hy insan sairab, shireen zubanon mein

Khiltay rahay phool khizan ke aanay tak
Rung va bu chorh jatay hain fizaon mein

Sans ban kar rahay mehboob cha- hay chahnay wala
Taza dam rahay har pal voh dil ke makinon mein

Ab nh khat koi phool khushbu or giton me milaiga
Pahocha karega pegham mera garm garm sanson mein

Dubta suraj or dhundla sa milnay ka sama
Voh khushnuma manzar bhejunga apnee yadon mein

Samad na tamam hy ghazal tamam ho kar bhi
Bahot si un kahee rah gayee baton baton mein

main uski zaat tak hi mahdood raha


main uski zaat tak hi mahdood raha
mujhe wo yaad bicherne ke baad raha

khana badoshi ki adat nahi hai mujh ko
main jis jaga bhi ruka wohain abaad raha

mere malik teri rehmat ki bohtaat bahut hai
jise ho gya yaqeen wo hamesha shaad raha

mere fun ka ura mazak to koi baat nahi
wo bhi jahan giya barbaad raha

uski mehfil main suniye jo ghazal
deta her shahks mujhe daad raha

Hawaa se phir koi khushbu nayi kasheed karain


Hawaa se phir koi khushbu nayi kasheed karain
Nayi rutoN kay liye taazgi kasheed karaiN

Umid ki koi koNpal kabhi na murjhaaye
KhizaaN raseeda shajar se nami kasheed karaiN

Tamaam aablay kaaNtoN se chhaid hi daalaiN
Par aik lamha ko aasoodgi kasheed karaiN

Wo sab hawaalay jo dil maiN mere dhaRkte haiN
Ab un se kaisay hawaalaa koi kasheed karaiN

Kabhi tau jugnu ki soorat andhairi raatoN maiN
Safar ko khwab karaiN roshni kasheed karaiN

Kanaar-e-bahr-e-khyaal-e-hajoom-e-mauj-e-rawaaN
Sha'oor-e-raig se kuch aagahi kasheed karaiN

NikhaaraiN WARD kay pehlu maiN mosim-e-dil ko
Mahak churaayeN tau raNgat kabhi kasheed karaiN

Harf-e-tauba hamaiN sikha phir se


Harf-e-tauba hamaiN sikha phir se
HamaiN dikhla rah-e-hudaa phir se

Lay kar apni panaah maiN yaa rab
HamaiN shaitaan se bachaa phir se

Phir sunaa de hamaiN naveed-e-bahisht
Naar-e-dozaKh se bhi draa phir se

Ham bhataknay lage haiN dikhla day
Ae khuda seedha raasta phir se

Apnay Ghaiz-o-Ghazab se kar mahroom
HamaiN inaam ho ataa phir se

Jaisay ki thi mere bazurgoN ki
Kar qabool aise hi dua phir se

Shaamil-e-haal ho agar mehnat
NaKhl-e-ummid ho haraa phir se

Ae khuda kar koi sabab aisa
Jal uThay deep aas ka phir se

Fikr taaza ho jis ki Khushbu se
WARD gulshan maiN wo khila phir se

Aalmi bank kay mulaazim ko phir wazaarat mili khazaanay ki


Aalmi bank kay mulaazim ko phir wazaarat mili khazaanay ki
Door se hukmraaniyaaN haoN gi, kya zaroorat hay un ko aanay ki

Tail ki qeemataiN baRhaayeN ge, sharh-e-afraat-e-zar baRhay tau baRhay
Oxygen pe tax lag jaaye hay zaroorat unhaiN bahaanay ki

Laug soye haiN Khwaab-e-Ghaflat maiN, Din dehaaRay yahaaN paraiN shab KhooN
Koi uftaad bhaij de maula, hay zaroorat inhaiN jagaanay gi

Qaum ki ijtimaai kotaahi waqt karta nahiN moaaf kabhi
Sar jhukaaya hay kiyuN jawaaN mardo ye ghaRi tau hay sar uthaanay ki


Ban kay hamdard paas baiThay haiN,meer jaefar bhi meer saadiq bhi
DushmanoN ne hisaar khaincha hay,Khair ho WARD aashiyaanay ki

Chobaara daikhne ki aarzu hai Dil aara daikhne ki aarzu hai


Chobaara daikhne ki aarzu hai
Dil aara daikhne ki aarzu hai

Shab-e-zulmat chunida maiN sapida
Ishara daikhne ki aarzu hai

Samundar phailta hi jaa rha hai
kinaara daikhne ki aarzu hai

Sar-e-raahay jise ik baar daikhaa
Doobaara daikhne ki aarzu hai

HamaiN ehsaas ki taarikiyoN maiN
Sitaara daikhne ki aarzu hai

Tere dil ki har ik dhaRkan pe apna
Ijaara daikhne ki aarzu hai

Muhabat ki talab hay phir se, jaise
Khasaara daikhne ki aarzu hai

JahaaN se ishq raanjhay ka uTha tha
hazaara daikhne ki aarzu hai

bachaa le doobte ko jo bil aakhir
sahaara daikhne ki aarzu hai

Huway haiN khwaab saare raakh laikin
Sharaara daikhne ki aarzu hai

KaraiN shabnam kay qatray WARD bosi
nazaara daikhne ki aarzu hai

Nigaah-e-naaz ka gar intiKhaab ho jaaon


Nigaah-e-naaz ka gar intiKhaab ho jaaoN
syaah zulf maiN saj kar gulaab ho jaaoN

Ho is tarah se bhi chashm-e-tamaash beeN hairaaN
Tu aik chehra bane main naqaab ho jaaoN

MaiN lams-e-dast-e-haseeN har ghaRi karooN mahsoos
Jo tairay haath rahay wo kitaab ho jaaoN

Tu misl-e-noor jo ho jaaye mun'akis mujh par
Shab-e-Chahaar daham maahtaab ho jaaoN

Mera khuloos tere dil pe mukashif ho jaaye
Har ik sawaal-e-Khafi ka jwaab ho jaaoN

DiloN maiN raah bnaata hay aarzu ka safar
MaiN is safar maiN tere ham raqaab ho jaaoN!

MaiN WARD-e-ehd-e-khizaaN, or tu shabnam-e-taaza
Jo mujh pe barso tau rashk-e-shabaab ho jaaoN

Aao tu zara socho Koi taghayyur ho


Aao tu zara socho
Koi taghayyur ho
HaaN kuch tu naya socho


Kehnay ko kahoN Zinda
Sard hay wo shu'la
Dil jis say hay taabinda


Mehroom e hunar kab tak
Phirtay raheingay yooN
Hum khaak basar kab tak


Afsoos tu hota hay
Log jo be-his hoN
Dil dard say rota hay


Dil ghamzada , afsurda
Shu'la nihaN is main
Samjho na isay murda

Meri soch main,mere haal maiN bara farq hai


Meri soch main,mere haal maiN bara farq hai
Mere ehd mere khyaal maiN baRa farq hai

Tah-e-maslehat,mera gham nihaaN tera gham ayaaN
Mere karb tairay malaal maiN baRa farq hai

Mere hamnasheeN , mera hamsafar na tu ban saka
Meri lay maiN aur teri taal maiN baRa farq hai


Abhi saaz-e-Gham nahiN laaya aalam-e-haal-o-qaal
abhi jism-o-jaaN ki dhamaal maiN baRa farq hai

Tera husn zaaheri ishq-e-WARD hay bateni
Tere husn is kay jamaal maiN baRa farq hai

Aanchal se mera khoon utarta bhi tau kaisay


Aanchal se mera khoon utarta bhi tau kaisay
Wo kar kay mujhay qatl mukarta bhi tau kaisay

YaadoN ki hawaa aankh se takra kay jo guzri
Baadal ne barasna tha thahartaa bhi tau kaisay

Jo waqt kay saath aur bhi ho jaata hay Gehra
Wo zakhm-e-nehaaN waqt se bharta bhi tau kaisay

ShaakhoN maiN meri Ashk bahaaroN ne piroye
Phir aisi bahaaroN pe maiN marta bhi tau kaisay

Ambar bhi bhula daita hay TooTay huway taaray
MaiN kya hooN mujhay yaad wo karta bhi tau kaisay

NaadaaN thay hameeN sar pe kafan baandh kay aaye
Fahmida tha wo jaaN se guzarta bhi tau kaisay

Jo WARD rha fasl-e-khizaaN maiN bhi shagufta
wo baad-e-bahaari se bikharta bhi tau kaisay

be chiragh aankhain hain kyun udass aankhain hain



be chiragh aankhain hain

kyun udass aankhain hain

dil nawaz aankhain hain

be hijaab aankhain hain

be khumaar aankhain hain

pur khiyaal aankhain hain

be khuwab aankhain hain

be qaraar aankhain hain

pur sawaal aankhain hain

keyun meri aankhoon main

ajj

us ki aankhain hain......!

Khulli aankhon se jub daikha to ta had-e-nazer aaya



Khulli aankhon se jub daikha to ta had-e-nazer aaya
Jo aankhain moond lee'n to phir nazer her khusk-o-ter aaya

Howa kaya jo gharay per aik dariya par ker dala
Main ik khaghaz ki kashti mein samundar par ker aaya

Hawaain khailti rehti hain akser ub bhi tinkon se
Parindah laut ker laikun na phir us shakh per aaya

Khudaya yeh bata keh kaya kami thi teri jannat mein
Keh aadam tuj ke jannat ko zamee'n per hi utter aaya

Yeh hain batain mohabbat ki wahee'n ja oontni behthi
Galli mein jis jagah per aik deewanay ka gher aaya


Najanay ye khathun itna safar kyun hai fazaoun ka
Parindah jo urra wo laut ker baibal-o-per aaya

Chalo Afzal paharon mein kahin roo posh ho jaain
Keh lashker us ki yadon ka hai dariya se guzer aaya.

Ro raha hoon or na muskura raha hoon main


Ro raha hoon or na muskura raha hoon main
SaaNs laina rasm hay nibha rha hooN maiN

Munhadim huwi hay masjid aetibaar ki
Phir bhi ye jubeeN hay jo jhukaa rha hooN maiN

Dard ho rha hay be shaoor bhi nahiN
Chaut gaam gaam phir bhi kha rha hooN maiN

Sirf kaandha wo de jo wafa sarisht ho
Apne kaandhay apni laash utha rha hooN maiN

Kho gyi hay shehr ki samaaetoN ki hiss
Phir bhi apni raagni suna rha hooN maiN

Jis nagar maiN daikh hi na paaye koi bhi
Us nagar maiN aainay bna rha hooN maiN

Koi bhi na aaye jaanib-e-wafa nadeem
Zor-o-shor se magar bula rha hooN maiN

Jis diyaar maiN wo mairay saath saath thi
Us diyaar se akailay jaa rha hooN maiN

yaad-e-be wafaa ne khaimay gaaRay har taraf
Shehr ki hadood ko baRha rha hooN maiN

Shaayed is jahaaN ki tiragi maiN ho kami
Apna khoon apna dil jalaa rha hooN maiN

Us ne raastay badal liye tamaam tar
WARD raastoN maiN kiyuN bicha rha hooN maiN

Yun khara tha ser jhokaay mere gher jane ke baad


Yun khara tha ser jhokaay mere gher jane ke baad
Laut ker mein aa gaya tha jaise mer jane

Teri zulfain bhi khulain gi daikh le gi kainaat
Zindgani ka mirra sooraj utter jane ke baad

Mere rone ka sabab poocha ye us ne soch ker
Rukh badal jaay kahin dariya na bher jane ke baad

Hasrat-e-dedar kehte hain kissi ko daikhna
Ik nazer aane se pehle ik nazer jane ke baad

Pal mein sara hi to aangun jugnoowo'n se bher gaya
Teri zulfain tere shano'n per bikher jane ke baad


Ja rahe ho ub kahan mujh ko utha ker dosto
Zindgani qaid khane mein guzzer jane ke baad

Paniyun mein kho diya hai tum ne Afzal jane kaya
Phir palat aate ho dariya par ker jane ke baad

Adawat Ko Sinoo'n Mai'n Bowe'y Huway


Adawat Ko Sinoo'n Mai'n Bowe'y Huway
Tamad'dun Mai'n Gairoo'n Kay Khow'ey Huway

Taqad'dus Ki Toheen Hoati Rahi
Magar Ehal-E-Mehfil Thy Sowe'y Huway

Muqad'dar Kw Sahil Pe Matam Zad'da
Khar'ay Hai'n Safinay Dabowe'y Huway

Khuddi Aur Khuddai Say Koasoo'n Paray
Sitam Apni Janoo'n pe Dhowe'y Huway

Baghawat Karai'n Bhi to Kiss Say Karai'n
Hai'n Sab ik Lar'Hi Mai'n Pirowe'y Huway

Illahi Khar'ay Hai'n Tairray Ru-Ba-Ru
Nidamat Say Palkai'n Bhigowe'y Huway

kia khabar muhabat ne kia haal karna hai


kia khabar muhabat ne kia haal karna hai
chahane walon ko hi la zawal karna hai

khushi ke lamhon main sogwar rehna hai
isi tarah se khud ko ba kamal karna hai

jo ache guzre un dino ki haseen yadain
unhe bhi aise bhula kar kamal karna hai

na tha waqif main muhabat ke asoloon se
khudi ko mar kar phir khud hi malal karna hai

mujhe hoti jo khabar uski adat ki imran
main na sochta ke rabt phir se bahal karna hai

mujhe chahaton se hai gila inhi chahaton se jana


mujhe chahaton se hai gila

inhi chahaton se jana

meri rahatain ujar gaen

meri arzoaen bikher gaen

meri khuwahishain kidher gaen

mere marz ki koi dawa nahi

mere zakhm ko hawa hai di

meri talkhioun ko bhara dia

mujhe hijr main hai jala dia

mujhe khak kar ke ura dia

meri zaat ko hai mita dia

mujhe chahaton se hai gila

inhi chahaton se jana

meri rahatain hain ujar gaen

Musafir na ghabra maze le safar ke


Musafir na ghabra , maze le safar ke
zara haath mal le keh kuchh barf pighle

jo thahra raha to ye imkaan hai ke
koi tujh ko harf e ghalat sa mita de

na bandho safar men ye kam khaab o atlas
hain kaafi safar ke liye zarf kachche

ye manzil nahin hai, jo ahsaas hota
to hum waqt ko apne zaya na karte

karam tujh pe azhar jo rab ka na hota
to hote na tujh men kai wasf aise

mujhe talash hai chahatoon ki


mujhe talash hai chahatoon ki
mujhe gham se keyun mila dia

meri khata hai kia, qasoor kia
mujhe hijr main keyun jala dia

tujhe chahna meri bhool thi
mujhe bhool ka hai sila dia

wo meri dil lagi wo meri aashqi
usy kaise to ne hai bhula dia

mujhe to ishq tha teri zaat se
meri zaat ko keyun mita dia

Ek weham sa bankar reh gaya hai dard



Ek weham sa bankar, reh gaya hai dard
Dard mano sara, seh gaya hai dard

Charagar mere, karu tera shukriyaa.N
Zakhm bhar gaye, reh gaya hai dard

Poonji yahi kamaiee, sauda_e_mohabbat me
Meri hasi ke badle, koi de gaya hai dard

Kash tum na roti, yeh hadsa na hota
Sath aasuo ke mere, beh gaya hai dard

Na aah na shikwa, khamoshiyo ke avez
Sabr tera azeem Ghayel, keh gaya hai dard

purane bamo-dar saare, har ik kamraa purana hai



purane bamo-dar saare, har ik kamraa purana hai
humara ghar bujurgoN ke samay jaisa purana hai.

dareechoN se sadaa aaye, sehan meiN khushbooeN bikhreN
guzishtaa mausmoN ka mujh pe ye qarzaa purana hai.

naye bhi haiN purane bhi, kai qismeN haiN seene meiN
ziyada lutf hai usmeiN jo gham jitna purana hai.

khare hothoN kii manzil aaj bhi daaro-rasan hii hai
sadi badlii magar sach ke liye imzaa purana hai.

kabhi tum jaR pakaRte ho kabhi shakhoN ko ginte ho
hawaa chhookar bataa degi shajar kitna purana hai.

maraasim vaise hii qaayam haiN apne thokroN se bhi
mera rastaa, mera chalnaa, mera girnaa purana hai.

samay thehraa hua-sa hai humaare gaaoN meiN ab tak
wahi paayal, wahi chham-chham, wahi dariya purana hai.

bahut dhooNdha magar mujhko mila na phir mera bachpan
faqat ab maaN kii aaNkhoN meiN mera qashkaa purana hai.

zamaane ne adaavat ke saleeqe tak nahiN badle
wahi tera, wahi mera, wahi jhagRaa purana hai.

sanam se guftgU to aaj bhi hoti hii rehti hai
magar aksar ye lagtaa hai ki har iimaa purana hai.

kahaaN mansoob rehta hai kisi se umr bhar koii
bichhaRne waloN ka aaNkhoN meiN bas khaaqa purana hai.

lahoo meiN roshni ban kar utar jaye to kya kehne
kalaame-meer meiN shaamil jo deewaana purana hai.

Chand kabhi aata hy nazar kabhi chup jata hai


Chand kabhi aata hy nazar kabhi chup jata hai
Apni marzi se nikalta hy aur phir chup jata hai


Oon ke andaz ne kuch mosamon ki ada sikha hai
Varna vo to roz kuch naya andaz le kar aata hai


Kiya ham ne koi baat chedi khud ko sanvar jane ki
Waqt e aakhirat me her shakhs khud ko badlta hai


Na hy ab apna raah gir koi jo ham ko raah sahi batlayae
Der haqiqat doston ki achi baton se hi dost raah pata hai


Zamana bahot kathin hy her tarf afra tafri hai
Zindagi me thokrain kha ker hi koi sambhalta hai


Samad kiya kisi per zor apna dikhayega jamayega
Yeh to Allah ka nek bunda hi nek hidayat pata hai

Popular Posts