Tuesday, August 25, 2009

Harf harf satar satar baab baab likh diya

Harf harf satar satar baab baab likh diya
Uss ke naam zindagii kaa intesaab likh diya

Puchhta thaa mujh se wo husool-e-zindagii hai kyaa
Ashk aankh se girey zamiin pe khawaab likh diya

Uss kii jab misaal dii saamne kii baat kii
Chaand likh diya kabhii, kabhii gulaab likh diya

Jiss qadar wo hai , usse bayaan kiya ussii qadar
Kab huaa ke main uss ko laajawaab likh diya

Goshwara-e-gham-e-hayaat likh rahaa thaa jab
Dil pe haath rakh ke main ba-hisaab likh diya

Hijraton ke baad bhii hai hijraton kaa silsila
Kis ne mere bakht main ye inqelaab likh diya

Yuun karam kiyaa hai mujh pe Rab-e-kaainaat ne
Sochne se qabil mujh ko kaamiyaab likh diya

No comments:

Popular Posts