ham k magub-e-guman the pahle
phir wahin hain k jahan the pahle
khwahishen jhurriyan ban kar ubhrin
zakhm sine main nihan the pahle
ab to har bat pe ro dete hain
waqif-e-sud-o-ziyan the pahle
dil se jaise koi kanta nikla
ashk ankhon se rawan the pahle
ab faqat anjumanarai hain
aitabar-e-dil-o-jan the pahle
dosh pe sar hai k hai barf jami
ham to sholon ki zuban the pahle
ab to har taza sitam hai taslim
hadse dil pe garan the pahle
meri hamzad hai tanhai meri
aise rishte bhi kahan the pahle
No comments:
Post a Comment