YOUN AKELAY MAIN USEY EHD-E-WAFA YAAD AAEY

YOUN AKELAY MAIN USEY EHD-E-WAFA YAAD AAEY,
JAISAY BANDAY KO MUSEEBAT MAIN KHUDA YAAD AAEY.

JAISAY BHATKAY HUAY PANCHI KO NASEEMAN APNA,
JAISAY APNON K BICHARNAIN PAY DUA YAAD AAEY.

JAISAY DHALTI HUEE SHAAMON KO SAWAIRA KOI,
JAISAY PINJRAY MAIN PARINDON KO FIZA YAAD AAEY.

JAISAY BOORHAY KO KHIYALAAT MAIN BACHPAN APNA,
JAISAY BACHEY KO SHARARAT PAY SAZA YAAD AAEY.

JAISAY UJRI HUI BASTI KO ZAMANA APNA,
JAISAY TOOFAN K THEHRNAIN PAY DIYA YAAD AAEY.

YOUN AKELAY MAIN USEY EHD-E-WAFA YAAD AAEY
YOUN AKELAY MAIN USEY EHD-E-WAFA YAAD AAEY