Saturday, June 26, 2010

Dukh kee leher nay chheRa hoga


Dukh kee leher nay chheRa hoga
Yaad nay kankar phainka hoga

Aaj to mera dil kehta hai
Tu is waqt akayla hoga

Meray choomay hooay hathoN say
Aoron ko KHat likhta hoga

Bheeg chaleeN ab raat kee palkaiN
Tu ab thak kar soya hoga

Rail kee gehree seetee sun kar
Raat ka jangal goonja hoga

Sheher kay khalee station par
Koi musafir utra hoga

Aangan maiN phir chiRyaaN boleeN
Tu ab so kar utha hoga

YadoN kee jaltee shabnam say
Phool sa mukhRa dhoya hoga

Motee jaisee shakl bana kar
Aeenay ko takta hoga

Shaam hooee ab tu bhee shayad
Apnay ghar ko lauta hoga

Neelee dhundlee khamoshi maiN
Taron kee dhun sunta hoga

Mera saathi shaam ka taaraa
Tujh say aankh milata hoga

Shaam kay chaltay haath nay tujh ko
Mera salaam to bhaija hoga

Pyasee kurlaatee koonjon nay
Mera dukh to sunaya hoga

MaiN to aaj bohot roya hooN
Tu bhee shayad roya hoga

'Nasir' tera meet purana
Tujh ko yaad to aata hoga

No comments:

Popular Posts