Hum kay thehray ajnabi kitni mulaqatoon kay baad
Phir banain gai aashna kitni madaratoon kay baad
Kab nazar main aaiy gi bay-daagh sabzay ki bahaar
Khoon kay dhab’bay dhulain gai kitni barsatoon kay baad
Thay bohut bay-dard lamhay khatm-e-dard-e-ishq kay
Theen bohut bay-mehar subhain meharbaan ratoon kay baad
Dil to chaha par shikast-e-dil nay mohlat hi na di
Kuch gilay shikway bhi kar laitay munajatoon kay baad
Un say jo kehnay gaiy thay faiz jaan sadqa kiyay
Unkahi hi reh gai wo baat sab baton kay baad
No comments:
Post a Comment