Baad Muda'at ussay dekha, logo

Baad Muda'at ussay dekha, logo
Wo Zara bhi nahi badla, logo

Khuch na thaa mujh say bichart ker wo bhi
Uss kay cheray pay likha thaa, logo

Uss ki ankhain bhi kah deti theen
Raat bher wo bhi na soya, logo

Ajnabi ban kay jo guzra hay abhi
Thaa kisi waqat main apna, logo

Doost tu khair koi kiss ka hay
Uss nay dushman bhi na samjha, logo

Raat wo dard mray dil main uthaa
Subh tuk chain na aya, logo

Piyaas sehraoon ki phir teaz hoi
Abar phir tut kay barsa, logo