Ek Din Chaand Se Bicharna Hai

Ek Din Chaand Se Bicharna Hai

Aankh, Taqdeer Aur Ta’aluq Jo

Jaane Kis Doosre Ke Bas Mai Hain

Saanp Ban Ban Ke Daste Rehte Hain

Apni Saanson Mai Dobte Dil Ko

Chaand Jis Tarz Ka Musafir Hai

Hijr Hi Hai Ke Jo Paraao Mai Hai

Bas Judaai Ko Hai Thehr Jana

Hum To Shikwa Bhi Kar Nahi Sakte

Aur Tanhaaiyon Se Shikwa Kiya

Chaand Be-Chainiyon Ka Mosam Hai

Beet Jane Pe Bhi Hamesha Hi

Apne Aasaar Chor Jata Hai

Yeh Meri Aankh Ke Sulagte Hue

Zard-Ro Aeinon Ki Nam-Naaki

Sab Issi Dard Ki Nishaani Hai

Yeh Mera Be-Sabab Hi Khush Rehna

Sab Issi Gham Ki Azmaish Hai

Ek Khuwahish Hai Jis Ko Marna Hai

Ek Jeewan Jise Ujarna Hai

Ek Din Chaand Se Bicharna Hai

Chup ki jheel main dukh na gholo

Chup ki jheel maindukh na gholo 

veerani aahista bolo

Thaam ke beete waqt ki ungli 

Serd hawa ke sang sang ho lo 

Mushkil jaan ke dour na bhaago 

Meri zaat ki girhain kholo 

Aaj ki shab tanha ho bilkul 

Aaj ki shab ji bher ker ro lo 

Dil ke gehre ganga jal main 

Khushiyon ke her paap ko dho lo 

Daikho kon aaya hai milne 

Lamha bher ko aankhain kholo

hamare bus main hota to

hamare bus main hota to....

tumhain banhon main bhar lete....

tumhain sub se chupa leta....

tumhain ankhon main rakh lete....

kabhi na rothne deta....

kabhi na tootne deta....

tumhain hum qaid kar lete....

bus apne dil ki duniya main....

kisi bhi haal main hum phir....

tumhain azad na karte....

sabhi duniya bhula dete....

tumhain apna bana lete....

hamare bus main hota to....

magar hai be'basi aesi....

hamara dil machalta hai....

tumhain he yad karta hai....

tumhara qurb chahta hai....

magar hum kia karain jana....

hamara bus nahi chalta.....!

diya khud se bhuja dena

diya khud se bhuja dena.....

hawa ko aur kia dena.....

kabhi is tor se hansna.....

ke duniya ko rula dena.....

kabhi is rang main rona....

ke khud per muskara dena.....

main teri dastaras chahon.....

mujhe aisi dua dena.....

main tera barmala mujrim....

mujhe khul kar saza dena.....

main tera munfarid sathi.....

mujhe hat kar jaza dena.....

mujhe acha lage mohsin.....

use pa kar ganwa dena.......!

Koi shikwa nahi kuch gila nahi

Koi shikwa nahi kuch gila nahi.

Bus tanhayi si lagti hai.

Jabse unke pyar me khoye hai.

Apni zindgi parayi si lagti hai.

Kabhi unka saath hame zamane se upar uthha deta tha.

Ab unki har baat me gahrayi si lagti hai.

Unhe na mile hamari bimari ka pata,

k wo bechain na ho.

Par sochte hai unhe hamari aas si lagti hai.

Bahut koshish karte hai is nadan dil ko bahlane ki.

Par ise to bas unki hi pyas si lagti hai.

Mujhe mohabbat ka nasha jab se hua hai.

Ye sharab udas si lagti hai...

Kya yu hame judayi k liye milaya tha.

Ab uss khuda ki duya fariyad si lagti hai.

Kyo chala do kadam sath nibha na saka.

Uski har chal me ik riyad si lagti hai.

Berukhi itni k na dekha mere janaje ko,

meri maut unhe ittefak si lagti hai.

Ab dekhiye chal pade wo naye safar k liye,

thamkar naya hath koi.

Main majboor sab dekhta raha,

kismat ki lakire behisab si lagti hai.

Kya tha unke dil main hamare liye,

meri har ummid beaas si lagti hai.

Meri aankhon k weera'n saahilo'n par

Meri aankhon k weera'n saahilo'n par,

In ashkon k machaltay sakht toofaa'n se,

Faqat ladnay ki bas tum ko ijazat hai.

Sanam tum ko ijazat hai....

Meray mann k iss ujday say bayaba'n main,

Gulo'n ko phir khilanay ki,

Faqat tum ko ijazat hai...

K apni khwaab raato'n main,

Meray sapnay sajanay ki,

Meri neendain churanay ki,

Ya phir shehr-e-tamanna main,

Adhori aarzoo ki ....

Koi unmit yaad bunnay ki..

Faqat tum ko ijazat hai,

K jab bhi khwahisho'n ka koi raila,

Tumhary iss khudi aur iss ana ko,

Baha k phir meri aankhon main lay aaye,

Ya phir....

Sawan ki koi ik jhadi ban kar...

Meray sookhay huay mann main...

Baras kar saaz ban jaye,

Tou phir itny guzarish hai...

K tum waapis nahin jana,

Meri inn ankhon main ya ...

Iss dil main kahin tum...

Phir apni yaad k is ghar main reh laina,

Magar waapis nahin jana,

K bin teray kahin ankhain ye meri,

In ashko'n k samandar main...

Kahin nah gharq hojayen.

Ye mera dil...

Jo barson say...

Tumhary aas k badal ki khwahish main...

Adhoori aarzoo ki dhoop sehta hai...

Kahin banjar na hojaye,

Tou bas tum ko ijazat hai...

K jab bhi lautna chaho...

Tou phir...

Meri ankhon main ya...

Iss dil main kahin bhi...

Jo ik pyaara sa ghar hai...

Usi main aa k reh jana,

Magar waapis nahin jana,

Tou bas phir laut anay ki,

Kahin waapis na janay ki,

Sanam tum ko ijazat hai...

Faqat tum ko ijazat hai!!!

Mohabbat mut kaho is ko

Ab is mien jhoot shaamiL ha

Mohabbat mut kaho is ko

imaarut diL ki girney do

taaluq toot jaaney do

ke ju deewaar apney boojh se girney pe aajaey

diiey ki lao se is deewaar ko phir thaamna kaisa

hawa ka saamna kaisa

buhat kumzoor sa such hai

isey ub bujh hi jaaney do

mohabbat mut kaho is ko

samjh lo surdiyoon ki dhoop jaisa such mohabbat hai

panaah zaat ki aagoosh mien simtey howe such mien

ajub si surd mehri hai

keh

ju thathray howe lufzoon ko hidut nahi dey sakti

sulagti raakh ko aatish ki shidut dey nahi sakti

mager such boLna tao hai

andheira phaiLna tao hai

ub is se paishtur keh munjamid taareekiyaan utrien

aur apne neelgoo'n honton ko si ker dhoop surma ki

kisi ki bolti ankhoon mein chumkey aur mur jaey

rutien weeraan kerjaey

osey ub laut jaaney do

mohabbat mut kaho is ko

mohabbat mut kaho is ko

ghaneeray jungloon ke raaste ka such m ohabbat hai

sunehri ghaas pe soti howi pugdandiyoon ka such

mujsm baankpun ashjaar se lipti howi badlien

keh ju apni namo ki gungunaahut hi se durti hai

dabey paaon guzarti hien

inhi ki aajzi ka such mohabbat hai

mager tehro zara soocho !

ager yeh raaste pugdadiyaan

muhz harf-e-tasali hoon

kisi ki muskuraahut hoon

kisi k door jaate bhaagte qudmoon ki aahut hoon

hawa ki sursuraahut hoon

ya aisa khwaab jis ko aakhrish aankhien bhula daalien

ya aisa khut jisey likhien mager likh ker jala daalien

tao phir aey hum nufs ! yeh maan lo yeh such nahi kyunkeh

ub is mein jhoot shaamil hai

MOHABBAT MAT KAHO IS KO

Mohabbat Naam Hai Mera

Mohabbat Naam Hai Mera

Agar Chaho`Ga y Tum Mujh Ko

Tumhari Saans Say Pehlay

Tumhari Jaan Ban Jaon

Agar Dekho`Gay Tum Mujh Ko

Tumhari Aankh Say Pehlay

Tumhare Khuwab Ban Jaon

Agar Socho`Gay Tum Mujh Ko

Tumhare Paon Say Pehlay

Tumhari Raah Ban Jaon

Mohabbat Naam Hai Mera

Mujhe Tum Soch Ke Dekho

Bin tere ab koi Chahat nahi

Bin tere ab koi Chahat nahi

Zindagi ki bhi koi khuwahish nahi

Tum nahi the to Zindagi main kuch kami thi

Ab hoker bhi tum mere nahi

Sab kuch paas hai magar

Ek tu hi to mere paas nahi

Hazaron ne hamain Chaha lekin

Ek tujh hi ko hamari Chahat nahi

Hum tere beghair bhi Jeene ki koshish karenge

Kyun ki ab hamain kisi aur ki zaroorat nahi

Tu Kisi Aur Ki Jageer Hai Ai Jaan-e-gazal

Tu Kisi Aur Ki Jageer Hai Ai Jaan-e-gazal

Log Tufaan Utha Denge Mere Saath Na Chal

Pehele Haq Tha Teri Chahat Ke Chaman Par Mera

Pehele Haq Tha Teri Khushbu-e-badan Par Mera

Ab Mera Pyaar Tere Pyaar Ka Haqdar Nahi

Main Tere Gesu-o-rukhsar Ka Haqdar Nahi

Ab Kisi Aur Ke Shano Pe Hai Tera Aanchal

Log Tufaan Utha Denge Mere Saath Na Chal...

Main Tere Pyaar Se Ghar Apna Basaun Kaise

Main Teri Maang Sitaron Se Sajaun Kaise

Meri Kismat Men Nahi Pyaar Ki Khushboo Shayad

Mere Haathon Ki Lakeeron Men Nahi Tu Shayad

Apni Taqdeer Bana Mera Muqaddar Na Badal

Log Tufaan Utha Denge Mere Saath Na Chal...

Mujhse Kehtin Hain Ye Khamosh Nigahen Teri

Meri Parvaaz Se Oonchi Hain Panahen Teri

Aur Gairat-e-ehsaas Pe Sharminda Hun

Ab Kisi Aur Ki Bahon Men Hain Bahen Teri

Ab Kahan Mera Thikana Hai Kahan Tera Mahal

Log Tufaan Utha Denge Mere Saath Na Chal...

mere maula ye haseen hath salamt rakhna

mere maula ye haseen hath salamt rakhna

aisa lagta hai jo ye hath dua ko uthen

khud farishte chale atey hein zameen ki janib

sonp kar marmareen hathon ki hatheli ko hina

jo bhi manga ho wo chup chap diye jate hon

mere maula ye haseen hath salamt rakhna

in ki khushbo se moatar hai mera sara wajood

inhi hathon mein mere khwab chupe hein maula

ungliyan mujh ko mohabbat mein bhigo deti hein

inhi poron ne mere dard chune maula

is ki rag rag mein mohabbat hi mohabbat rakhna

mere maula ye haseen hath salamat rakhna

inhi hathon ki lakeeron mein muqadar hai mera

yeh jo kone mein sitara hai sikander hai mera

khwab se narm khayalon ki tarha nazuk hein

in ke har lams mein mere liye chahat rakhna

mere maula ye haseen hath salamat rakhna

sard kamray me zard aahain...

sard kamray me zard aahain... 

hum se har dam kehna chahain...

khushi k mosam me gham hain kese??

khili khili sitara aankhain aaj yunhi nam hain kese??

laraztay haathon se kaaghaz ko lapeta... 

kinaaron se pakartay huay chaadar ko sameta...

dil k khadshon ko zair kar k...

nazar uthanay me dair kar k...

dehleez pe aaya or aahon ko bulaya...

kya haal he dil ka ye un ko btaya...

"naazuki labon se chand baatain sun kar

kya mila hum ko kai sapnay bun kar

phir waqt ki gehraai me phaink diey

bepanah chahat k wo lamhay chun kar......!!!!

yar tha gulzar tha bad-e-saba thi main na tha

yar tha gulzar tha bad-e-saba thi main na tha 

layaq-e-pa-bos-e-jan kya hina thi main na tha 

hath kyon bandhe mere chala agar chori hua 

ye sarapa shokhi-e-rang-e-hina thi main na tha 

main ne pucha kya hua wo ap ka husn-o-shabab 

hans k bola wo sanam shan-e-Khuda thi main na tha 

main sisakta rah gaya aur mar gaye farahad-o-qais 

kya unhin donon k hisse mein qaza thi main na tha

ya mujhe afsar-e-shaha na banaya hota

ya mujhe afsar-e-shaha na banaya hota 

ya mera taj gadaya na banaya hota 

khaksari k liye garche banaya tha mujhe 

kash khak-e-dar-e-janan na banaya hota 

nasha-e-ishq ka gar zarf diya tha mujh ko 

umr ka tang na paimana banaya hota 

apna diwana banaya mujhe hota tune 

kyon khirdmand banaya na banaya hota 

shola-e-husn chaman mein na dikhaya us ne 

warna bulbul ko bhi parwana banaya hota 

roz-e-mamura-e-duniya mein kharabi hai 'Zafar' 

aisi basti se to wirana banaya hota

tum na aye ek din ka wada kar do din talak

tum na aye ek din ka wada kar do din talak

ham pare tarpa kiye do do pahar do din talak

dard-e-dil apna sunta hun kabhi jo ek din

rahta hai us naznin ko dard-e-sar do din talak

dekhte hain khwab mein jis din kisu ki chashm-e-mast

rahte hain ham do jahan se bekhabar do din talak

gar yaqin ho ye hamein ayega tu do din k bad

to jiyen ham aur is ummid par do din talak

kya sabab kya wasta kya kam tha batlaiye

ghar se jo nikle na apne tum "Zafar" do din talak

the kal jo apne ghar mein wo mahman kahan hain

the kal jo apne ghar mein wo mahman kahan hain 

jo kho gaye hain ya rab wo ausan kahan hain 

ankhon mein rote rote nam bhi nahin ab to 

the maujzan jo pahle wo tufan kahan hain 

kuch aur dhab ab to hamein log dekhte hain 

pahle jo ai "Zafar" the wo insan kahan hain

pas-e-marg mere mazar par jo chirag kisi ne jala diya

pas-e-marg mere mazar par jo chirag kisi ne jala diya 

use ah daman-e-bad ne sare sham hi se bujha diya 

mujhe dafn karna tu jis ghari to ye us se kahna k ai pari 

wo jo tera ashiq-e-zar tha tah-e-khak use daba diya 

dam-e-gusl se mere peshtar use hamdamon ne ye soch kar 

kahin jawe us ka na dil dahal meri lash par se hata diya 

meri ankh jhapki thi ek pal mere dil ne chaha k uth k chal 

dil-e-beqarar ne o miyan wahin chutki le k jaga diya 

zara un ki shokhi to dekhiye liye zulf-e-khamshuda hath mein 

mere piche aye dabe-dabe mujhe sanp kah k dara diya 

main ne dil diya main ne jan di magar ah! tune na qadr ki 

kisi bat ko jo kaha kabhi use chutkiyon mein ura diya

na kisi ki ankh ka nur hun na kisi k dil ka qarar hun

na kisi ki ankh ka nur hun na kisi k dil ka qarar hun 

jo kisi k kam na a sak main wo ek musht-e-gubar hun 

na to main kisi ka habib hun na to main kisi ka raqib hun 

jo bigar gaya wo nasib hun jo ujar gaya wo dayar hun 

mera rang-rup bigar gaya mera yar mujh se bichar gaya 

jo chaman fizan mein ujar gaya main usi ki fasl-e-bahar hun 

paye fateha koi aye kyun koi char phul charhaye kyun 

koi ak shamma jalaye kyun main wo bekasi ka mazar hun 

main nahin hun nagma-e-janfishan mujhe sun k koi karega kya 

main bare barog ki hun sada main bare dukh ki pukar hun

kije na das mein baith kar apas ki bat chit

kije na das mein baith kar apas ki bat chit 

pohnchegi das hazar jagah das ki bat chit 

kab tak rahen khamosh k zahir se ap ki 

ham ne bahut suni kas-o-nakas ki bat chit 

muddat k bad hazrat-e-naseh karam kiya 

farmaye mizaj-e-muqaddas ki bat chit 

par tark-e-ishq k liye izhar kuch na ho 

main kya karun nahin ye mere bas ki bat chit 

kya yad a gaya hai "Zafar" panja-e-nigar 

kuch ho rahi hai band-o-mukhmmas ki bat chit

khulta nahin hai hal kisi par kahe bagair

khulta nahin hai hal kisi par kahe bagair 

par dil ki jan lete hain dilbar kahe bagair 

main kyunkar kahun tum ao k dil ki kashish se wo

ayenge daure ap mere ghar kahe bagair 

kya tab kya majal hamari k bosa len 

lab ko tumhare lab se milkar kahe bagair 

bedard tu sune na sune lek dard-e-dil 

rahta nahin hai ashiq-e-muztar kahe bagair 

taqdir k siwa nahin milta kahin se bhi 

dilawata ai "Zafar" hai muqaddar kahe bagair

ja kahyio un se nasim-e-sahar mera chain gaya

ja kahyio un se nasim-e-sahar mera chain gaya meri nind gai 

tumhen meri na mujh ko tumhari khabar mera chain gaya meri nind gai 

na haram mein tumhare yar pata na surag dair mein hai milta 

kahan ja k dekhun main jaun kidhar mera chain gaya meri nind gai 

ai badshah-e-khuban-e-jahan teri mohni surat pe qurban 

k main ne jo teri jabin pe nazar mera chain gaya meri nind gai

hui bad-e-bhari chaman mein ayan gul buti mein baqi rahi na fiza 

meri shakh-e-ummid na lai sanwar mera chain gaya meri nind gai

ai barq-e-tajalli bahar-e-Khuda na jala mujhe hijr mein shamma sa 

meri zist hai misl-e-chirag-e-sahar mera chain gaya meri nind gai

kehta hai yahi ro ro k "Zafar" meri ah-e-rasa ka hua na asar 

teri hijr mein maut na ai abhi mera chain gaya meri nind gai

yahi khana tha shero k aj "Zafar" meri ah-e-rasa mein hua na asar 

tere hijr mein maut na ai magar mera chain gaya meri nind gai

humne duniya mein aa k kya dekha

humne duniya mein aa k kya dekha 

dekha jo kuch so khwab-sa dekha 

hai to insan khak ka putla 

le k pani ka bul-bula dekha 

khub dekha jahan k khuban ko 

ek tujh sa na dusara dekha 

ek dam par hawa na bandh habab 

dam ko dam bhar mein yan hawa dekha 

na huye teri khak-e-pa ham ne 

khak mein ap ko mila dekha 

ab na dije "Zafar" kisi ko dil 

ki jise dekha bewafa dekha

hum to chalte hain lo Khuda hafiz

hum to chalte hain lo Khuda hafiz 

butkada ka buton Khuda hafiz 

kar chuk tum nasihaten ham ko 

jao bas naseho Khuda hafiz 

aj kuch aur tarah par un ki 

sunte hain guftagu Khuda hafiz 

bar yahi hai hamesha zakhm pe zakhm 

dil ka charagaron Khuda hafiz 

aj hai kuch ziyada betabi 

dil-e-betab ko Khuda hafiz 

kyon hifazat ham aur ki dhundhen 

har nafas jab ki hai Khuda hafiz 

chahe rukhsat ho rah-e-ishq mein aql 

ai "Zafar" jane do Khuda hafiz

dil ki meri beqarari mujh se kuch pucho nahin

dil ki meri beqarari mujh se kuch pucho nahin 

shab ki meri ah-o-zari mujh se kuch pucho nahin 

bar-e-gam se mujh pe roz-e-hijr mein ik ik ghari 

kya kahun hai kaisi bhari mujh se kuch pucho nahin 

meri surat hi se bas malum kar lo ham-damo 

tum haqiqat meri sari mujh se kuch pucho nahin 

sham se ta-subah jo bistar pe tum bin rat ko 

main ne ki akhtar-shumari mujh se kuch pucho nahin 

ai "Zafar" jo hal hai mera karunga gar bayan 

hogi un ki sharm-sari mujh se kuch pucho nahin

bich mein parda dui ka tha jo hayal uth gaya

bich mein parda dui ka tha jo hayal uth gaya 

aisa kuch dekha k duniya se mera dil uth gaya 

shama ne ro ro k kati rat suli par tamam 

shab ko jo mahfil se teri ai zeb-e-mahfil uth gaya 

meri ankhon mein samaya us ka aisa nur-e-haq 

shauq-e-nazara ai badr-e-kamil uth gaya 

ai Zafar kya puchta hai begunah-o-bar-gunah 

uth gaya ab jidhar ko waste qatil uth gaya

wo bulayen to kya tamasha ho

wo bulayen to kya tamasha ho

ham na jayen to kya tamasha ho

ye kinaron se khelne wale

dub jayen to kya tamasha ho

bandaparwar jo ham pe guzri hai

ham batayen to kya tamasha ho

aj ham bhi teri wafaon par

muskurayen to kya tamasha ho

teri surat jo ittefaq se ham

bhul jayen to kya tamasha ho

waqt ki chand satein 'Sagar'

laut ayen to kya tamasha ho

teri dunya mein ya rab zist ke saman jalte hain

teri dunya mein ya rab zist ke saman jalte hain 

fareb-e-zindagi ki ag mein insan jalte hain 

dilon mein azmat-e-tauhid k dipak fasurda hain 

jabinon par riya-o-kubr k saman jalte hain 

hawas ki baryabi hai khird-mandon ki mahfil mein 

rupahli tikaliyon ki ot mein iman jalte hain 

hawadis raqs-farma hain qayamat muskurati hai 

suna hai nakhuda k nam se tufan jalte hain 

shagufe jhulte hain is chaman mein bhuk k jhule 

baharon mein nasheman to bahar-e-unwan jalte hain 

kahin azeb ki chan-chan mein majburi tarapti hai 

riya dam tor deti hai sunehre dan jalte hain 

manao jashn-e-may-noshi bikhrao zulf-e-maykhana 

ibadat se to "Sagar" dahar k shaitan jalte hain

tere daman ki hawa mangte hain

tere daman ki hawa mangte hain 

ham bhi jine ki dua mangte hain 

mutribo koi achuta nagma 

saz ahang-o-sada mangte hain 

mah-o-anjum k jharoke aksar 

kisi k ariz ki dua mangte hain 

phir patangon mein Khudai jagi 

shole hashr-numa mangte hain 

banda-parwar koi khairat nahin 

ham wafaon ka sila mangte hain 

maikada ho k kalisa Sagar 

sari duniya ka bhala mangte hain

rudad-e-muhabbat kya kahye kuch yad rahi kuch bhul gaye

rudad-e-muhabbat kya kahye kuch yad rahi kuch bhul gaye 

do din ki masrrat kya kahye kuch yad rahi kuch bhul gaye 

jab jam diya tha saqi ne jab daur chala tha mahfil mein 

wo hosh k sath kya kahye kuch yad rahi kuch bhul gaye 

ehsas k maikhane mein kahan ab fikr-o-nazar ki qandilen 

alam ki shiddat kya kahye kuch yad rahi kuch bhul gaye 

ab apni haqiqat bhi "Sagar" berbt kahani lagti hai 

dunya ki haqiqat kya kahye kuch yad rahi kuch bhul gaye

hai dua yad magar harf-e-dua yad nahin

hai dua yad magar harf-e-dua yad nahin 

mere nagmat ko andaz-e-nawa yad nahin 

main ne palkon se dar-e-yar pe dastak di hai 

main wo sahil hun jise koi sada yad nahin 

main ne jin k liye rahon mein bichaya tha lahu 

ham se kahte hain wahi ahd-e-wafa yad nahin 

kaise bhar ain sar-e-sham kisi ki ankhen 

kaise tharrae charagon ki ziya yad nahin 

sirf dhundhlai sitaron ki chamak dekhi hai 

kab hua kaun hua kis se khafa yad nahin 

zindagi jabr-e-musalasal ki tarah katti hai 

jane kis jurm ki pai hai saza yad nahin 

ao ik sajda karen alam-e-madhoshi mein 

kahte hain k "Sagar" ko Khuda yad nahin

ek muddat hui ek zamana hua

ek muddat hui ek zamana hua 

khak-e-gulshan mein jab ashiyana hua 

zulf-e-barham ki jab se shanasai hui 

zindagi ka chalan mujremana hua 

phul jalte rahe chand hanste raha 

arzu ka muqammal fasana hua 

dag dil k shahanshah k sike bane 

dil ka muflis-kada jab khazana hua 

rahbar ne palat kar na dekha kabhi 

rahr-o-raste ka nishana hua 

ham jahan bhi gaye zauq-e-sajda liye 

har jagah ap ka astana hua 

dekh mizarab se khun tapkane laga 

saz ka tar marg-e-tarana hua 

pahle hoti thi koi wafa-parawari 

ab to "Sagar" ye qissa purana hua

dukh dard ki saugat hai dunya teri kya hai

dukh dard ki saugat hai dunya teri kya hai 

ashkon se bhari rat hai dunya teri kya hai 

kuch log yahan nur-e-sahar dhundh rahe hain 

tarik si ik rat hai dunya teri kya hai 

paband-e-mashiyat hai tanaffus bhi nazar bhi 

ik jazya-e-lamhat hai dunya teri kya hai 

taqdir k chehre ki shikan dekh raha hun 

aina-e-halat hai dunya teri kya hai 

majruh-e-taqaddus hai taqaddus ki haqiqat 

rudad-e-kharabat hai dunya teri kya hai 

"Sagar" mein chalkate hain samawat k israr 

saqi ki karamt hai dunya teri kya hai

chupaye dil mein gamon ka jahan baithe hain

chupaye dil mein gamon ka jahan baithe hain

tumhari bazm mein ham bezaban baithe hain

ye aur bat k manzil pe ham pahunch na sake

magar ye kam hai k rahon ko chan baithe hain

fugan hai dard hai soz-o-firaq-o-dag-e-alam

abhi to ghar mein bahut mehrban baithe hain

ab aur gardish-e-taqdir kya satayegi

luta k ishq mein nam-o-nishan baithe hain

wo ek lafz-e-mohabbat hi dil ka dushman hai

jise shariat-e-ehsas man baithe hain

hai maikadon ki baharon se dosti 'Sagar'

baraye had-e-yaqin-o-guman baithe hain

chandni ko rusul kahta hun

chandni ko rusul kahta hun

bat ko bausul kahta hun

jagmagate hue sitaron ko

tere pairon ki dhul kahta hun

jo chaman ki hayat ko das le

us kali ko babul kahta hun

ittefaqan tumhare milne ko

zindagi ka husul kahta hun

ap ki sanwali si surat ko

zauq-e-yazdan ki bhul kahta hun

jab mayassar ho sagar-o-mina

barqparon ko phul kahta hun

bhuli hui sada hun mujhe yad kijiye

bhuli hui sada hun mujhe yad kijiye 

tum se kahin mila hun mujhe yad kijiye 

manzil nahin hun khizr nahin rahzan nahin 

manzil ka ranta hun mujhe yad kijiye 

meri nigah-e-shauq se har gul hai dewta 

main ishq ka khuda hun mujhe yad kijiye 

nagmon ki ibtida thi kabhi mere nam se 

ashkon ki intaha hun mujhe yad kijiye 

gum-sum khari hain donon jahan ki haqiqaten 

main un se kah raha hun mujhe yad kijiye 

"Sagar" kisi ke husn-e-tagaful shar ki 

bahki hui ada hun mujhe yad kijiye

bargashta-e-yazdan se kuch bhul hui hai

bargashta-e-yazdan se kuch bhul hui hai

bhatke hue insan se kuch bhul hui hai

ta hadd-e-nazar shole hi shole hain chaman mein

phulon k nigehban se kuch bhul hui hai

jis ahad mein lut jaye faqiron ki kamai

us ahad ke sultan se kuch bhul hui hai

hanste hain meri surat-e-maftun pe shagufe

mere dil-e-nadan se kuch bhul hui hai

huron ki talab aur mai-o-sagar se hai nafrat

zahid tere irfan se kuch bhul hui hai

baat phulon ki suna karte the

baat phulon ki suna karte the 

ham kabhi sher kaha karte the 

mashalen leke tumhare gam ki 

ham andheron mein chala karte the 

ab kahan aisi tabiyat wale 

chot kha kar jo dua karte the 

tark-e-ehsas-e-muhabbat mushkil 

han magar ahl-e-wafa karte the 

bikhri bikhri zulfon wale 

qafile rok liya karte the 

aj gulshan mein shaguf-e-sagar 

shikawe bad-e-saba se karte the

azmat-e-zindagi ko bech diya

azmat-e-zindagi ko bech diya

ham ne apni khushi ko bech diya

chashm-e-saqi k ik ishare pe

umr ki tishnagi ko bech diya

rind jam-o-subu pe hanste hain

shaikh ne bandagi ko bech diya

rahguzaron pe lut gai radha

sham ne bansuri ko bech diya

jagmagate hain wehshaton k dayar

aql ne adami ko bech diya

lab-o-rukhsar ke iwaz ham ne

sitwat-e-khusrawi ko bech diya

ishq behrupiya hai ai 'Sagar'

ap ne sadgi ko bech diya

ye jo diwane se do char nazar ate hain

ye jo diwane se do char nazar ate hain 

in mein kuch sahib-e-asrar nazar ate hain

teri mahfil ka bharam rakhte hain so jate hain 

werna ye log to bedar nazar ate hain

dur tak koi sitara hai na koi jugnu

marg-e-ummid k asar nazar ate hain

mere daman mein shararon k siwa kuch bhi nahin

ap phulon k kharidar nazar ate hain

kal jise chu nahin sakti thi farishton ki nazar

aj wo raunaq-e-bazar nazar ate hain

hashr mein kaun gawahi meri dega 'Sagar'

sab tumhare hi tarafdar nazar ate hain

log har mor pe ruk ruk k sambhalte kyun hain

log har mor pe ruk ruk k sambhalte kyun hain 

itna darte hain to phir ghar se nikalte kyun hain 

main na jugnu hun diya hun na koi tara hun 

roshni wale mere nam se jalte kyun hain 

nind se mera talluq hi nahin barson se 

khwab a a k meri chat pe tahalte kyun hain 

mor hota hai jawani ka sambhalne k liye 

aur sab log yahin ak phisalte kyun hain

kitni pi kaise kati rat mujhe hosh nahin

kitni pi kaise kati rat mujhe hosh nahin 

rat k sath gai bat mujhe hosh nahin 

mujh ko ye bhi nahin malum k jana hai kahan

tham le koi mera hath mujhe hosh nahin 

anson aur sharabon mein guzri hai ab to 

main ne kab dekhi thi barsat mujhe hosh nahin 

jane kya tuta hai paimana k dil hai mera 

bikhre bikhre hain khayalat mujhe hosh nahin

dosti jab kisi se ki jaye

dosti jab kisi se ki jaye 

dushmanon ki bhi rae li jaye 

maut ka zahr hai fizaon mein 

ab kahan ja k sans li jaye 

bas isi soch mein hun duba hua 

ye nadi kaise par ki jaye 

mere mazi k zakhm bharne lage 

aj phir koi bhul ki jaye 

botlen khol k to pi barson 

aj dil khol k bhi pi jaye

kisi ka ho k taire shar se chala bhe gia

kisi ka ho k taire shar se chala bhe gia
woh khud ko kho k taire sahr se chala bhe gia

bahoot uddas thein aankhein esi liye un main
aazab bo k taire shar se chala bhe gia

havaown ne tuje sandaisa de diya ho ga
kabi ka ho k taire shar se chala bhe gia

guman samait k damen main un gint ek din
yaqeen kho k taire shar se chala bhe gia

sada jo hansne ka arman dil main rakhta tha
woh aaj ro k taire shar se chala bhe gia

khun se jab jala diya ek diya bujha hua

khun se jab jala diya ek diya bujha hua 

phir mujhe de diya gaya ek diya bujha hua 

ek hi dastan-e-shab ek hi silsila to hai 

ek diya jala hua ek diya bujha hua 

mahfil-e-rang-o-nur ki phir mujhe yad a gai 

phir mujhe yad a gaya ek diya bujha hua 

mujh ko nishat se fuzun rasm-e-wafa aziz hai 

mera rafiq-e-shab raha ek diya bujha hua 

dard ki kainat main mujh se bhi raushani rahi 

waise meri bisat kya ek diya bujha hua 

sab meri raushani-e-jan harf-e-sukhan main dhal gai 

aur main jaise rah gaya ek diya bujha hua

ik saza aur asiron ko suna di jaye

ik saza aur asiron ko suna di jaye 

yani ab jurm-e-asire ki saza di jaye 

uski khwahish hai k ab log na roen na hansen 

behisi waqt ki awaz bana di jaye 

dasht-e-nadida ki tahqiq zaruri hai magar 

pahle jo ag lagi hai wo bujha di jaye 

sirf jalna hi nahin hamko bharakna bhi to hai 

ishq ki ag ko lazim hai hawa di jaye 

sirf suraj ka nikalna hai agar subah to phir 

ik shab aur meri shab se mila di jaye 

aur ik taza sitam usne kiya ijad 

usko is bar zara khul ke dua di jaye

ham se bahal rahe hain ap ap bahut ajib hain

ham se bahal rahe hain ap ap bahut ajib hain

dard main dhal rahe hain ap ap bahut ajib hain

saya-e-wasl kab se hai ap ka muntazir magar

hijr main dhal rahe hain ap ap bahut ajib hain

apne khilaf faisla khud hi likha hai ap ne

hath bhi mal rahe hain ap ap bahut ajib hain

waqt ne arazu ki lau der hui bujha bhi di

ab bhi pighal rahe hain ap ap bahut ajib hain

zahmat-e-zarbat-e-digar dost ko dijiye nahin

gir k sambhal rahe hain ap ap bahut ajib hain

dayarawar hi to hain ishq ke raste tamam

rah badal rahe hain ap ap bahut ajib hain

dasht ki sari raunaqen khair se ghar main hain to kyun

ghar se nikal rahe hain ap ap bahut ajib hain

apni talash ka safar khatm bhi kijiye kabhi

khwab main chal rahe hain ap ap bahut ajib hain

ek se silsile hain sab hijr ki rut bata gai

ek se silsile hain sab hijr ki rut bata gai 

phir wahi subah ayegi phir wahi sham a gai

mere lahu main jal uthe utne hi taza dam chirag 

waqt ki sazishi hawa jitne diye bujha gai

main bhi ba-pas-e-dostan apne khilaf ho gaya 

ab yahi rasm-e-dosti mujhko bhi ras a gai

tund hawa k jashn main log gaye to the magar 

tan se koi qaba chini sar se koi rida gai

dil-zadgan k qafile dur nikal chuke tamam 

un ki talash main nigah ab jo gai to kya gai

akhir-e-shab ki dastan aur karen bhi kya bayan 

ek hi ah-e-sard thi sare diye bujha gai

bedili se hansne ko khush-dili na samjha jaye

bedili se hansne ko khush-dili na samjha jaye 

gam se jalte chehre ko raushni na samjha jaye 

gaha gaha wahshat main ghar ki simt jata hun 

isko dasht-e-hairat se wapsi na samjha jaye 

lakh khushguman duniya bahimi talluq ko 

dosti kahen lekin dosti na samjha jaye 

ham to bas ye kahte hain roz jine marne ko 

ap chahen kuch samjhen zindagi na samjha jaye 

khak karne walon ki kya ajib khwahish thi 

khak hone walon ko khak hi na samjha jaye

kamal-e-zabt ko khud bhi to azmaungi

kamal-e-zabt ko khud bhi to azmaungi 

main apne hath se us ki dulhan sajaungi 

supurd kar k use chandni k hathon 

main apne ghar k andheron ko laut aungi 

badan k karb ko wo bhi samajh na payega 

main dil main roungi ankhon main muskuraungi 

wo kya gaya k rafaqat k sare lutf gaye 

main kis se ruth sakungi kise manaungi

wo ik rishta-e-benam bhi nahin lekin 

main ab bhi us k isharon pe sar jhukaungi 

bicha diya tha gulabon k sath apna wajud 

wo so k uthe to khwabon ki rakh uthaungi 

ab us ka fan to kisi aur se mansub hua 

main kis ki nazm akele main gungunaungi 

jawaz dhundh raha tha nai muhabbat ka 

wo kah raha tha k main us ko bhul jaungi 

samaaton main ghane jangalon ki sansen hain

main ab kabhi teri awaz sun na paungi

hamare darmiyan aisa koi rishta nahin tha

hamare darmiyan aisa koi rishta nahin tha 

tere shanon pe koi chat nahin thi 

mere zimme koi angan nahin tha 

koi wada teri zanjir-e-pa banane nahin paya 

kisi iqrar ne meri kalai ko nahin thama 

hawa-e-dasht ki manind 

tu azad tha 

raste teri marzi k tabe the 

mujhe bhi apni tanhai pe 

dekha jaye to 

pura tasarruf tha 

magar jab aj tu ne 

rasta badla 

to kuch aisa laga mujh ko 

k jaise tu ne mujh se bewafai ki

dil ka kya hai wo to chahega musalsal milana

dil ka kya hai wo to chahega musalsal milana 

wo sitamgar bhi magar soche kisi pal milna 

wan nahin waqt to ham bhi hain adim-ul-fursat 

us se kya kahiye jo har roz kahe kal milna 

ishq ki rah k musafir ka muqaddar malum 

dasht-e-ummid main andeshe ka badal milna 

daman-e-shab ko agar chak bhi kar len to kahan 

nur main duba hua subah ka anchal milna

dasht-e-shab par dikhai kya dengi

dasht-e-shab par dikhai kya dengi

silawaten roshani main ubhrengi

ghar ki diwaren mere jane par

apni tanhaiyon ko sochengi

ungaliyon ko tarash dun phir bhi

adatan us ka nam likkhengi

rang-o-bu se kahin panah nahin

khwahishen bhi kahan aman dengi

ek khushbu se bach bhi jaun agar

dusari nikahaten jakar lengi

khirkiyon par dabiz parde hon

barishen phir bhi dastaken deng

apni ruswai tere nam ka charcha dekhun

apni ruswai tere nam ka charcha dekhun 

ek zara sher kahun aur main kya kya dekhun 

nind a jaye to kya mahfilen barpa dekhun 

ankh khul jaye to tanhai ka sahra dekhun 

sham bhi ho gai dhundhala gai ankhen bhi meri 

bhulnewale main kab tak tera rasta dekhun 

sab ziden us ki main puri karun har bat sunun 

ek bache ki tarah se use hansta dekhun 

mujh pe cha jaye wo barsat ki khushbu ki tarah 

ang ang apna usi rut main mahakta dekhun 

tu meri tarah se yakta hai magar mere habib 

ji main ata hai koi aur bhi tujh sa dekhun 

main ne jis lamhe ko puja hai use bas ek bar 

khwab ban kar teri ankhon main utarta dekhun 

tu mera kuch nahin lagta hai magar jan-e-hayat 

jane kyon tere liye dil ko dharakta dekhun