Friday, May 14, 2010

tum aj hanste ho hans lo mujh par

tum aj hanste ho hans lo mujh par ye aamaish na bar bar hogi 
main janta hun mujhe khabar hai k kal faza khushgawar hogi 

rahe muhabbat main zindagi bhar rahegi ye kashamakash barabar 
na tumko qurbat main jit hogi na mujhko furqat main har hogi 

hazar ulfat sataye lekin mere iradon se hai ye mumkin 
agar sharafat ko tumne chera to zindagi tum pe war hogi

tujhi ko jo yan jalwa farma na dekha

tujhi ko jo yan jalwa farma na dekha 
barabar hai duniya ko dekha na dekha 

mera guncha-e-dil hai woh dil-girifta 
k jis ko kaso ne kabhi wa na dekha 

aziat, musibat, malamat, balayen 
tere ishq main ham ne kya kya na dekha 

kiya mujh ko dagon sarw-e-chiragan
kabho tu ne akar tamasha na dekha 

tagaful ne tere ye kuch din dikhaye 
idhar tu ne lekin na dekha, na dekha 

hijab-e-rukh-e-yar the ap hi ham 
khuli ankh jab, koi parda na dekha 

shab-o-roz aye "Dard" darapai hun us ke 
kaso ne jise yan samjha na dekha

tohmaten chand apne zimme dhar chale

tohmaten chand apne zimme dhar chale 
jis liye aye the so ham kar chale 

zindagi hai ya koi tufan hai 
ham to is jine ke hathon mar chale 

kya hamain kam is gulon se ai saba 
ek dam aye idhar udhar chale 

dosto dekha tamasha yan ka sab 
tum raho khush ham to apne ghar chale 

ah bas ji mat jala tab janiye 
jab koi afsun tera us par chale 

shama ki manind ham is bazm main 
chashm-nam aye the daman-tar chale 

dhundte hain ap se usko pare 
sheikh sahib chor ghar bahar chale 

ham jahan main aye the tanhawale 
sath apne ab use lekar chale 

jun sharar ai hasti-e-bebud yan 
bare ham bhi apni bari bhar chale 

ek main dil resh hun waisa hi dost 
zakhm kitnon ka suna hai bhar chale 

ham na jane paye bahar ap se 
wo bhi are a gaya jidhar chale 

saqiya yan lag raha hai chal chalo 
jab talak bas chal sake sagar chale 

"Dard" kuch malum hai ye log sab 
kis taraf se aye the kidhar chale

thakan to agle safar k liye bahana tha


thakan to agle safar k liye bahana tha 
use to yun bhi kisi aur simt jana tha 


wahi chirag bujha jis ki lau qayamat thi 
usi pe zarb pari jo shajar purana tha 


mata-e-jan ka badal ek pal ki sarshari 
suluk khwab ka ankhon se tazirana tha 


wahi firaq ki baten wahi hikayat-e-wasl 
nai kitab ka ek ek warq purana tha 


qaba-e-zard nigar-e-khizan pe sajti thi 
tabhi to chal ka andaz khusrowana tha

mera ji hai jab tak teri justaju hai

mera ji hai jab tak teri justaju hai 
zaban jab talak hai yahi guftagu hai 

Khuda jane kya hoga anjam is ka 
main besabar itna hun wo tund khu hai 

tamana hai teri agar hai tamana 
teri arzu hai, agar arzu hai 

kiya sair hamne gulzar-e-duniya 
gul-e-dosti main ajab rang-o-bu hai 

ganimat hai ye did wa did-e-yaran 
jahan mund gayi ankh, main hun na tu hai 

nazar mere dil ki pari "dard" kis par 
jidhar dekhta hun wahi ru-ba-ru hai

ye ab khula hai k koi bhi manzar mera na tha

ye ab khula hai k koi bhi manzar mera na tha 
main jis mein rah raha tha wahi ghar mera na tha 


main jis ko ek umr sambhale phira kiya 
mitti bata rahi wo paikar mera na tha 


mauj-e-hawa-e-shahar-e-muqaddar jawab de 
dariya mere na the k samandar mera na tha 


phir bhi to sangsar kiya ja raha hun main 
kahte hain nam tak sar-e-mahzar mera na tha 


sab log apne apne qabilon k sath the 
ek main hi tha k koi bhi lashkar mera na tha

hum tujh se kis hawas ki falak justaju karen


hum tujh se kis hawas ki falak justaju karen 
dil hi nahin raha hai jo kuch arazu karen 

mit jayen ek an main kasrat namayan 
ham aine k samne a kar jo hu karen 

tar-damani pe sheikh hamari na jaio 
daman nichor den to farishte wazu karen 

sar ta qadam zaban hai jun shama go k ham 
par ye kahan majal jo kuch guftagu karen 

har chand aina hun par itna na qabul 
mun pher le wo jiske mujhe ru-ba-ru karen 

na gul ko hai sabt na ham ko aitabar 
kis bat par chaman hawas-e-rang-o-bu karen 

hai apni ye salah k sab zahidan-e-shahar 
ai "Dard" a ke bet-e-dast-e-sabu karen

zara si der ko aye the khwab ankhon mein

zara si der ko aye the khwab ankhon mein 
phir us k bad musalsal azab ankhon mein 


wo jis k nam ki nisbat se raushan tha wujud 
khatak raha hai wahi aftab ankhon mein 


jinhen mata-e-dil-o-jan samajh rahe the ham 
wo aine bhi hue behijab ankhon mein 


ajab tarah ka hai mausam k khak urti hai 
wo din bhi the k khile the gulab ankhon mein 


mere gazal teri wahshaton ki khair ki hai 
bahut dinon se bahut iztarab ankhon mein 


na jane kaisi qayamat ka peshkhema hai 
ye uljhane teri be-intasab ankhon mein

duniya main kaun kaun na yak bar ho gaya

duniya main kaun kaun na yak bar ho gaya 
par mun phir is tarf na kiya us ne jo gaya 

phirti hai meri khak saba dar-ba-dar liye 
aye chashm-e-ashkbar ye kya tujh ko ho gaya 

agah is jahan main nahin gair be khudan 
jaga wahi idhar se jo mund ankh so gaya 

tufan-e-noah ne to dabai zamin faqat 
main nang-e-khalq sari khudai dubo gaya 

barham kahin na ho gul-o-bulbul ki ashti 
darta hun aj bag main wo tund khu gaya 

waiz kise darawe hai yom-ulhisab se 
giryan mera to nama-e-amal dho gaya 

phulenge is zaban main bhi gulzar-e-marafat 
yan main zamin-e-sher main ye tukhm bo gaya 

aya na aitadal par hargiz mazaj-e-dahar 
main garche garm-o-sard-e-zamana samo gaya 

aye "Dard" jis ki ankh khuli is jahan main 
shabnam ki tarah jan ko apni wo ro gaya

chaman main subah ye kahti thi ho kar chashm-e-tar shabnam


chaman main subah ye kahti thi ho kar chashm-e-tar shabnam 
bahar-e-bag to yun hi rahi lekin kidhar shabnam 

arq ki bund us ki zulf se rukhsar par tapki 
tajub ki hai jage ye pari khurshid par shabnam 

hamain to bag tujh bin khana-e-matam nazar aya 
idhar gul pharte the jab, roti thi udhar shabnam 

kare hai kuch na kuch tasir sohbat saf tabon ki 
hui atish se gul ke baithate rashq-e-sharar shabnam 

bhala tuk subah hone do ise bhi dekh lewenge 
kisi ashiq ke rone se nahin rakhti khabar shabnam 

nahin asbab kuch lazim subak saron ke uthne ko 
gai ur dekhte apne bagair az bal-o-par shabnam 

na paya jo gaya is bag se hargiz surag uska 
na palti phir saba idhar, na phir ai nazar shabnam 

na samjha Dard hamne bhed yan ki shadi-o-gam ka 
sahar khandan hai kyon roti hai kis ko yak kar shabnam

apne tain to har ghari gam hai, alam hai, dag hai

apne tain to har ghari gam hai, alam hai, dag hai 
yad kare hamain kabhi kab ye tujhe dimag hai 

ji ki khushi nahin giro sabz-o-gul ke hath kuch 
dil ho shagufta jis jagah wo hi chaman hai bag hai 

kis ki ye chashm-e-mast ne bazm ko yun chaka diya 
masl-e-habab sar nagun sharam se har ayag hai 

jalate hi jalte subah tak guzri use tamam shab 
dil hai k shola hai koi, shama hai ya chirag hai 

paiye kis jagah bata aye but-e-bewafa tujhe 
umr-e-guzashta ki tarah gum hi sada surag hai 

sair-e-bahar-o-bag se ham ko maf kijiye 
us k khayal-e-zulf se dard kise farag hai ?

agar yon hi ye dil satata rahega

agar yon hi ye dil satata rahega 
to ik din mera ji hi jata rahega 

main jata hun dil ko tere pas chore 
meri yad tujhko dilata rahega 

gali se teri dil ko le to chala hun 
main pahunchunga jab tak ye ata rahega 

qafas main koi tum se ai ham-safiron 
khabar kal ki hamko sunata rahega 

khafa ho k ai "Dard" mar to chala tu 
kahan tak gam apna chupata rahega

mere Khuda mujhe itna to motabar kar de

mere Khuda mujhe itna to motabar kar de 
main jis makan mein rahta hun us ko ghar kar de 


ye roshni k taqqub mein bhagta hua din 
jo thak gaya hai to ab is ko mukhtasar kar de 


main zindagi ki dua mangne laga hun bahut 
jo ho sake to duaon ko beasar kar de 


sitara-e-sahri dubne ko aya hai 
zara koi mere suraj ko ba-khabar kar de 


qabila war kamanein karakne wali hain
mere lahu ki gawahi mujhe nadar kar de


meri zamin mera akhiri hawala hai 
so main rahun na rahun us ko barawar kar de 


main apne khwab se kat kar jiyun to mere Khuda 
ujar de meri mitti ko dar-ba-dar kar de

khwab ki tarah bikhar jane ko ji chahta hai

khwab ki tarah bikhar jane ko ji chahta hai
aisi tanhai k mar jane ko ji chahta hai


ghar ki wehshat se larzta hun magar jane kyon
sham hoti hai to ghar jane ko ji chahta hai


dub jaun to koi mauj nishan tak na bataye
aisi nadi mein utar jane ko ji chahta hai


kabhi mil jaye to raste ki thakan jag pare
aisi manzil se guzar jane ko ji chahta hai


wahi paiman jo kabhi ji ko khush aya tha bahut
usi paiman se mukar jane ko ji chahta hai

dayar-e-nur mein tera shabon ka sathi ho

dayar-e-nur mein tera shabon ka sathi ho 
koi to ho jo meri wahshaton ka sathi ho 


main us se jhuth bhi bolun to mujh se sach bole 
mere mizaj k sab mosamon ka sathi ho 


wo mere nam ki nisbat se motabar thehre 
gali gali meri ruswaiyon ka sathi ho 


main us k hath na aon wo mera ho k rahe 
main gir parun to meri pastiyon ka sathi ho 


wo khwab dekhe to dekhe mere hawale se 
mere khayalon k sab manzaron ka sathi ho

ham un se agar mil baithte hain kya dosh hamara hota hai


ham un se agar mil baithte hain kya dosh hamara hota hai
kuch apni jasarat hoti hai kuch un ka ishara hota hai

katne lagin raten ankhon main dekha nahin palakon pe aksar
kabhi sham-e-gariban ka jugnu kabhi subah ka tara hota hai

ham dil ko liye har des phire is jins ka gahak mil na saka
ai banjaro ham log chale ham ko to khasara hota hai

ham apni zaban se kuch bhi kahen shayar hai khayalon se khelen
a jao to baham mil baithe kabhi hijr bhi pyara hota hai

daftar se uthe kaife main gaye kuch sher kahe kuch kafi pi
pucha jo muash ka "Inshaji" yun apna guzara hota hai

rat k khwab sunayen kis ko rat k khwab suhane the

rat k khwab sunayen kis ko rat k khwab suhane the 
dhundle dhundle chehre the par sab jane pahahane the 

ziddi wahshi alhar chanchal mithe log rasile log 
honth un k gazlon k misre ankhon main afsane the 

ye larki to in galiyon main roz hi ghuma karti thi 
is se un ko milna tha to is k lakh bahane the 

ham ko sari rat jagaya jalte bujhte taron ne 
ham kyun un k dar pe utre kitne aur thikane the 

wahshat ki unwan hamari in main se jo nar bani 
dekhenge to log kahenge 'Insha' ji diiwane the

jog bijog ki baten jhuti sab ji ka bahlana ho

jog bijog ki baten jhuti sab ji ka bahlana ho
phir bhi ham se jate jate ek gazal sun jana ho

sari duniya aql ki bairi kaun yahan par sayana ho
nahaq nam dharen sab ham ko diwana diwana ho

tum ne to ik rit bana li sun lena sharmana ho
sab ka ek na ek thikana apna kaun thikana ho

nagri ngari lakhon dware har dware par lakh sukhi
lekin jab ham bhul chuk hain daman ka phailana ho

tere ye kya ji main ai khinch liye sharma kar hont
ham ko zahar pilane wali amrit bhi pilwana ho

ham bhi jhute tum bhi jhute ek isi ka sacha nam
jis se dipak jalana sikha parwana mar jana ho

sidhe man ko an daboche mithi baten sundar log
'Meer', 'Nazeer', 'kabir' aur 'Insha' sab ka ek gharana ho

us sham wo rukhsat ka saman yad rahega

us sham wo rukhsat ka saman yad rahega 
wo shahar wo kucha wo makan yad rahega 

wo tis k ubhri thi idhar yad rahegi 
wo dard k utha tha yahan yad rahega 

ham shauq k shole ki lapak bhul jayenge 
wo shama-e-fasurda ka dhuan yad rahega 

kuch mir k abyat the kuch faiz k misre 
ik dard ka tha jin main bayan yad rahega 

jan bakhsh si thi us gulbarg ki tarawat 
wo lams-e-aziz-e-do-jahan yad rahega 

ham bhul sak hain na tujhe bhul saknge 
tu yad rahega hamen han yad rahega

aur to koi bas na chalega hijr k dard k maron ka

aur to koi bas na chalega hijr k dard k maron ka 
subah ka hona dubhar kar dein rasta rok sitaron ka 

jhuthe sikon mein bhi utha dete hain aksar sacha mal 
shaklen dekh k sauda karna kam hai in banjaron ka 

apni zuban se kuch na kahenge chup hi rahenge ashiq log 
tum se to itna ho sakta hai pucho hal becharon ka 

ek zara si bat thi jis ka charcha pohuncha gali gali 
ham gumnamon ne phir bhi ehsan na mana yaron ka 

dard ka khna chikh utho dil ka taqaza waza nibhao 
sab kuchh sehna chup chup rahna kam hai izzatdaron ka

dasht parta hai miyan ishq mein ghar se pehle

chal diye uth k su-e-shahar-e-wafa ku-e-habib 
puch lena tha kisi khak basar se pehle 

ishq pehle bhi kiya hijr ka gam bhi dekha 
itne tarpe hain na ghabraye na tarse pehle 

ji bahalta hi nahin ab koi saat koi pal 
rat dhalti hi nahin char pahar se pehle 

ham kisi dar pe na thithak na kahin dastak di 
saikaron dar the meri jan tere dar se pehle 

chand se ankh mili ji ka ujala jaga 
ham ko so bar hui subah sahar se pehle

kal chaudhwin ki rat thi shab bhar raha charcha tera

kal chaudhwin ki rat thi shab bhar raha charcha tera 
kuch ne kaha ye chand hai kuch ne kaha chehra tera 


ham bhi wahin maujud the ham se bhi sab pucha kiye 
ham hans diye ham chup rahe manzur tha parda tera 


is sheahr mein kis se milen ham se to chuti mahfilen 
har shakhs tera nam le har shakhs diwana tera 


kuche ko tere chor kar jogi hi ban jayen magar 
jangal tere parbat tere basti teri sahra tera 


ham aur rasm-e-bandagi ashuftagi uftadagi
ehsan hai kya kya tera ai husn-e-beparwa tera


do ashk jane kis liye palkon pe a kar tik gaye
altaf ki barish teri ikram ka darya tera


ai bedarg-o-beaman ham ne kabhi ki hai fugan
ham ko teri wahshat sahi ham ko sahi sauda tera


tu bewafa tu mahraban ham aur tujh se bad-guman 
ham ne to pucha tha zara ye waqt kyun thehra tera 


ham par ye sakhti ki nazar ham hain faqir-e-rahguzar 
rasta kabhi roka tera daman kabhi thama tera 


han han teri surat hasin lekin tu aisa bhi nahin 
is shakhs k ashar se shohra hua kya kya tera 


beshak usi ka dosh hai kahta nahin khamosh hai 
tu ap kar aisi dawa bimar ho acha tera 


bedard sunani ho to chal kahta hai kya achhi gazal 
ashiq tera ruswa tera shayar tera "Insha" tera

chahat ka ek mitha mitha dard jagane sham dhale

chahat ka ek mitha mitha dard jagane sham dhale 
teri yadein a jati hain mujhko rulane sham dhale 

teri zulfein in kandhon par tera chehra hathon mein 
main ne bhi dekhe hain kitne khwab suhane sham dhale 

har din ham se wada kar k yun hi agar tarpaoge 
ik din yun hi ho jayeinge ham bhi diwane shaam dhale 

din k ujale mein to mana lun lakh yatan se bahla lun 
lekin dil ka pagal panchi ek na mane shaam dhale

age bare na qissa-e-ishq-e-butan se ham

age bare na qissa-e-ishq-e-butan se ham 
sab kuch kaha magar na khule razdan se ham 


ab bhagte hain saya-e-ishq-e-butan se ham 
kuch dil se hain dare hue kuch asman se ham 


hanste hain us k giriya-e-beikhtiyar par 
bhule hain bat kah k koi razadan se ham 


ab shauq se bigar k baten kiya karo 
kuch pa gaye hain ap ki tarz-e-bayan se ham 


jannat mein tu nahin agar ye zakhm-e-teg-e-ishq 
badlenge tujhko zindagi-e-jawidan se ham

tu bhi kisi ka pyar na paye Khuda kare

tu bhi kisi ka pyar na paye Khuda kare 
tujh ko tera nasib rulaye Khuda kare 

raton mein tujh ko nind na aye Khuda kare 
tu dar-ba-dar ki thokren khaye Khuda kare 

aye bahar tere gulistan mein bar bar 
tujh par kabhi nikhar na aye Khuda kare 

meri tarah tujhe bhi jawani mein gam mile 
tera na koi sath nibhaye Khuda kare 

manzil kabhi bhi pyar ki tujh ko na mil sake 
tu bhi dua ko hath uthaye Khuda kare 

tujh par shab-e-wisal ki raten haram hon 
shammein jala jala k bujhaye Khuda kare 

ho jayen bad-duayen meri dosto galat 
ab un pe koi harf na aye Khuda kare

koi dawa na de sake, mashwara dua diya

koi dawa na de sake, mashwara dua diya 
charagaron ne aur bhi dil ka dard barha diya 

zauq-e-nigah k siwa shauq-e-gunah k siwa 
mujhko Khuda se kya mila mujhko buton ne kya diya 

thi na khizan ki rok-tham daman-e-ikhtiyar mein 
hamne bhari bahar mein apna chaman luta diya 

husn-e-nazar ki abaru sanat-e-brahaman se hai 
jisko sanam samajh liya usko Khuda bana diya 

dag hai mujhpe ishq ka mera gunah bhi to dekh 
uski nigah bhi to dekh jisne ye gul khila diya

koi chara nahin dua k siwa

koi chara nahin dua k siwa 
koi sunta nahin Khuda k siwa 

mujh se kya ho saka wafa k siwa 
mujh ko milta bhi kya saza k siwa 

dil sabhi kuch zaban par laya
ik faqat arz-e-mudda k siwa 

barsar-e-sahil-e-muqam yahan 
kaun ubhra hai nakhuda k siwa 

dil sabhi kuch zuban par laya 
ik faqat arz-e-mudda k siwa 

doston k ye mukhali sana tir 
kuch nahin meri hi khata k siwa 

ye "Hafeez" ah ah par akhir 
kya kahen dost wah wah k siwa

hum hi mein thi na koi bat, yad na tum ko a sake

hum hi mein thi na koi bat, yad na tum ko a sake 
tumne hamein bhula diya, ham na tumhen bhula sake 

tum hi na sun sake agar, qissa-e-gam sunega kaun 
kis ki zuban khulegi phir, ham na agar suna sake 

hosh mein a chuke the ham josh mein a chuke the ham 
bazm ka rang dekh kar sar na magar utha sake 

shauq-e-wisal hai yahan, lab pe sawal hai yahan 
kis ki majal hai yahan, ham se nazar mila sake 

raunaq-e-bazm ban gae lab pe hikayaten rahin 
dil mein shikayaten rahin lab na magar hila sake 

aisa bhi koi namabar bat pe kan dhar sake 
sun kar yakin kar sake ja ke unhen suna sake 

ahl-e-zaban to hain bahut koi nahin hai ahal-e-dil 
kaun teri tarah "Hafeez" dard ke geet ga sake

dil abhi tak jawan hai pyare

dil abhi tak jawan hai pyare
kis musibat mein jan hai pyare

tu mere hal ka khayal na kar
is mein bhi ek shan hai pyare

rat kam hai na cher hijr ki bat
ye bari dastan hai pyare

talkh kar di hai zindagi jis ne
kitni mithi zaban hai pyare

jane kya kah diya tha roz-e-azal
aj tak imtihan hai pyare

main tujhe bewafa nahin kahta
dushmanon ka bayan hai pyare

sari dunya ko hai galatfahmi
mujh pe tu mehraban hai pyare

ai dost mit gaya hun fana ho gaya hun main

ai dost mit gaya hun fana ho gaya hun main 
is daur-e-dosti ki dawa ho gaya hun main 

qayam kiya hai maine adam k wajud ko 
dunya samajh rahi hai fana ho gaya hun main 

himmat buland thi magar uftad dekhna 
chupchap aj mahw-e-dua ho gaya hun main 

ye zindagi fareb-e-musalsal na ho kahin 
shayad asir-e-dam-e-bala ho gaya hun main 

han kaif-e-bekhudi ki wo saat bhi yad hai 
mahsus kar raha tha Khuda ho gaya hun main

agar mauj hai bich dhare chala chal

agar mauj hai bich dhare chala chal
wagarna kinare kinare chala chal 

isi chal se mere pyare chala chal
guzarti hai jaise guzare chala chal 

tujhe sath dena hai bahrupiyon ka
naye se naya rup dhare chala chal 

musalsal buton ki tamanna kiye ja
musalsal Khuda ko pukare chala chal 

tujhe to abhi der tak khelna hai
isi mein to hai jit hare chala chal

teri talash mein ham jab kabhi nikalte hain

teri talash mein ham jab kabhi nikalte hain
ik ajnabi ki tarah raste badalte hain


daraz ho gam-e-hijran k hasil-e-hijran
wo hausale hain jo agosh-e-gam mein palte hain


rawa nahin hai gam-e-ishq is qadar bhi garur
tere bagair bhi dunya k kam chalte hain


kabhi jo had se barhi un ki yad to samjhe
k un k dil mein bhi kuch walwale machalte hain


shab-e-firaq kuch aisi bhi tiragi to nahin
kabhi kabhi sar-e-mizgan charag jalte hain


ab un ke gam se bhi mahrum ho na jayen kabhi
wo jante hain k is gam se dil bahalte hain

ab to kuch aur bhi andhera hai

ab to kuch aur bhi andhera hai
ye meri rat ka sawera hai 

rahzanon se to bhag nikla tha
ab mujhe rahbaron ne ghera hai 

age age chalo tabar walo
abhi jangal bahut ghanera hai 

qafila kis ki pairawi mein chale
kaun sab se bara lutera hai 

so raho ab "Hafeez"ji tum bhi 
ye nai zindagi ka dera hai

mohabbat karnewale kam na honge

mohabbat karnewale kam na honge 
teri mahfil mein lekin ham na honge 


zamane bhar k gam ya ik tera gam 
ye gam hoga to kitne gam na honge 


dilon ki uljhanen barti rahengi 
agar kuch mashware baham na honge 


agar tu ittefaqan mil bhi jaye 
teri furqat k sadmein kam na honge 


'Hafeez' un se main jitna badguman hun 
wo mujh se is qadar barham na honge

kuch is tarah se nazar se guzar gaya koi

kuch is tarah se nazar se guzar gaya koi 
k dil ko gam ka sazawar kar gaya koi 


dil-sitam-zada ko jaise kuch hua hi nahin 
khud apne husn se yun bekhabar gaya koi 


nigah-e-shauq ki mahrumiyon se nawaqif 
nigah-e-shauq pe ilzam dhar gaya koi 


ab unke husn mein husn-e-nazar bhi shamil hai 
kuch aur meri nazar se sanwar gaya koi 


kisi k paon ki ahat, k dil ki dharkan thi 
hazar bar utha su-e-dar gaya koi 


nasib-e-ahl-e-wafa ye sukun-e-dil to na tha 
zarur nala-e-dil be-asar gaya koi

kahin dekhi hai shayad teri surat is se pahle bhi

kahin dekhi hai shayad teri surat is se pahle bhi 
k guzri hai mere dil pe ye halat is se pahle bhi 


na jane kitne jalwe pesh-rau the tere jalwon k 
tujhi se barha ki hai mohabbat is se pahle bhi 


sunati hain koi afsana teri sahmagin nazaren 
hui hai mujhse gustakhana jurat is se pahle bhi 


meri qismat k main is daur mein badnam hun warna 
wafadari thi shart-e-admiyat is se pahle bhi

dipak rag hai chahat apni kahe sunayen tumhen

dipak rag hai chahat apni kahe sunayen tumhen 
ham to sulagte hi rahte hain kyon sulgayen tumhen 


tark-e-muhabbat, tark-e-tamanna kar chukne k bad 
ham pe ye mushkil an pari hai kaise bulayen tumhen 


sannata jab tanhai k zahar mein bujhta hai 
wo ghariyan kyon kar katti hain kaise batayen tumhen 


jin baton ne pyar tumhara nafrat mein badla 
dar lagta hai wo baten bhi bhul na jayen tumhen

aj unhen kuch is tarah ji khol kar dekha kiye

aj unhen kuch is tarah ji khol kar dekha kiye
ek hi lamhe mein jaise umr bhar dekha kiye


dil agar betab hai dil ka muqaddar hai yahi
jis qadar thi ham ko taufiq-e-nazar dekha kiye


khudfaroshana ada thi meri surat dekhna
apne hi jalwe ba-andaz-e-digar dekha kiye


nashanas-e-gam faqat dad-e-hunar dete rahe
ham mata-e-gam ko ruswa-e-hunar dekha kiye


dekhne ka ab ye alam hai koi ho ya na ho
ham jidhar dekha kiye pehron udhar dekha kiye


husn ko dekha hai main ne husn ki khatir 'Hafeez'
warna sab apna hi mear-e-nazar dekha kiye

ye aur bat teri gali mein na ayen ham

ye aur bat teri gali mein na ayen ham
lekin ye kya k shahar tera chor jayen ham


muddat hui hai ku-e-butan ki taraf gaye
awargi se dil ko kahan tak bachayen ham


shayad baqaid-e-zist ye saat na a sake
tum dastan-e-shauq suno aur sunayen ham


benur ho chuki hai bahut shahar ki faza
tarik raston mein kahin kho na jayen ham


us k bagair aj bahut ji udas hai
'Jalib' chalo kahin se use dhund layen ham

is shahar-e-kharabi mein gam-e-ishq k mare

is shahar-e-kharabi mein gam-e-ishq k mare
zinda hain yahi bat bari bat hai pyare


ye hansta hua chand ye purnur sitare
tabinda-o-painda hain zarron k sahare


hasrat hai koi guncha hamein pyar se dekhe
arman hai koi phul hamein dil se pukare


har subah meri subah pe roti rahi shabnam
har rat meri rat pe hanste rahe tare


kuch aur bhi hain kam hamein ai gam-e-janan
kab tak koi uljhi hui zulfon ko sanware

dil ki bat labon par lakar ab tak ham dukh sahte hain

dil ki bat labon par lakar ab tak ham dukh sahte hain 
ham ne suna tha is basti mein dil wale bhi rahte hain 


bit gaya sawan ka mahina mausam ne nazren badli 
lekin in pyasi ankhon mein ab tak ansu bahte hain 


ek hamein awara kahna koi bara ilzam nahin 
dunya wale dil walon ko aur bahut kuch kahte hain 


jis ki khatir shahar bhi chora jis k liye badnam hue 
aj wahi ham se begane begane se rahte hain 


wo jo abhi rahguzar se chak-e-gareban guzra tha 
us awara diwane ko 'Jalib'-'Jalib' kahte hain

aur sab bhul gaye harf-e-sadaqat likhna

aur sab bhul gaye harf-e-sadaqat likhna
rah gaya kam hamara hi bagawat likhna


lakh kahte rahen zulmat ko na zulmat likhna
ham ne sikha hi nahin pyare baijazat likhna


na sile ki na sitaish ki tamanna ham ko
haq mein logon k hamari to hai adat likhna


ham ne jo bhul k bhi shah ka qasida na likha
shayad aya isi khubi ki badolat likhna


us se barh kar meri tahsin bhala kya hogi
parh k nakhush hain mera sahab-e-sarwat likhna


dahar k gam se hua rabt to ham bhul gaye
sarw qamat ki jawani ko qayamat likhna


kuch bhi kahte hain kahen shah k masahib 'Jalib'
rang rakhna yahi apna isi surat likhna

zulmatkade mein mere shab-e-gam ka josh hai

zulmatkade mein mere shab-e-gam ka josh hai 
ik shamma hai dalil-e-sahar, so khamosh hai 

na muzda-e-wisal na nazara-e-jamal 
muddat hui k ashti-e-chashm-o-gosh hai 

mai ne kiya hai husn-e-khudara ko behijab 
ae shauq yan ijazat-e-taslim-e-hosh hai 

gauhar ko ikd-e-gardan-e-khuban mein dekhna 
kya auj par sitara-e-gauharfarosh hai 

didar, wada, hosla, saqi, nigah-e-mast 
bazm-e-khayal maikada-e-bekharosh hai 

ae taza waridan-e-bisat-e-hawa-e-dil 
zinhar gar tumhen hawas-e-nao-nosh hai 

dekho mujhe jo dida-e-ibaratnigah ho 
meri suno jo gosh-e-nasihat niyosh hai 

saqi bajalwa dushman-e-iman-o-agahi 
mutarib banagma rahzan-e-tamkin-o-hosh hai 

ya shab ko dekhte the ki har gosha-e-bisat 
daman-e-bagban-o-kaf-e-gulfarosh hai 

lutf-e-khiram-e-saqi-o-zauq-e-sada-e-chang 
ye jannat-e-nigah wo firdus-e-gosh hai 

ya subh dam jo dekhiye akar to bazm mein 
na wo surur-o-soz na josh-o-khrosh hai 

dag-e-firaq-e-sohbat-e-shab ki jali hui 
ik shamma rah gai hai so wo bhi khamosh hai 

ate hain gaib se ye mazamin khayal mein 
'Ghalib', sarir-e-khama nawa-e-sarosh hai

zikr us pariwish ka, aur phir bayan apna

zikr us pariwish ka, aur phir bayan apna 
ban gaya raqib akhir tha jo razdan apna 

mai wo kyon bahut pite bazm-e-gair mein yarab 
aj hi hua manzur un ko imtihan apna 

manzar ik bulandi par aur ham bana sakte 
arsh se idhar hota kash k makan apna 

de wo jis qadar zillat ham hansi mein talenge 
bare ashna nikla unka pasban apna 

dard-e-dil likhun kab tak? Jaun un ko dikhla dun 
ungliyan figar apni khamakhunchakan apna 

ghiste ghiste mit jata ap ne abas badla 
nang-e-sajda se mere sang-e-astan apna 

ta kare na gamazi, kar liya hai dushman ko 
dost ki shikayat mein ham ne ham-zaban apna 

ham kahan k dana the kis hunar mein yakta the 
besabab hua 'Ghalib' dushman asman apna

kab wo sunta hai kahani meri

kab wo sunta hai kahani meri 
aur phir wo bhi zabani meri 

khalish-e-gamza-e-khunrez na puch 
dekh khunbafishani meri 

kya bayan kar k mera royege yar 
magar ashufta-bayani meri 

hun zikhud rafta-e-baida-e-khayal 
bhul jana hai nishani meri 

mutaqabil hai muqabil mera 
ruk gaya dekh rawani meri 

qadr-e-sang-e-sar-e-rah rakhta hun 
sakht arzan hai girani meri 

dahan us ka jo na malum hua 
khul gai hao chamandani meri 

kar diya zof ne ajiz "Ghalib" 
nang-e-piri hai jawani meri

Zaur se baz aye par baz ayen kya

Zaur se baz aye par baz ayen kya 
kahte hain ham tum ko munh dikhlayen kya 

rat din gardish mein hain sat asman 
ho rahega kuch na kuch ghabrayen kya 

lag ho to us ko ham samjhen lagao 
jab na ho kuch bhi to dhoka khayen kya 

ho liye kyon namabar k sath-sath 
ya rab apne khat ko ham pahunchayen kya 

mauj-e-khun sar se guzar hi kyon na jaye 
astan-e-yar se uth jayen kya 

umr bhar dekha kiye marne ki rah 
mar gae par dekhiye dikhlayen kya 

puchte hain wo k "Ghalib" kaun hai 
koi batlao k ham batlayen kya

ye na thi hamari qismat k wisal-e-yar hota

ye na thi hamari qismat k wisal-e-yar hota 
agar aur jite rahte yahi intzar hota 

tere wade par jiye ham to ye jan jhuth jana 
k khushi se mar na jate agar aitbar hota 

teri nazuki se jana k bandha tha ahdboda 
kabhi tu na tor sakta agar ustawar hota 

koi mere dil se puche tere tir-e-nimakash ko 
ye khalish kahan se hoti jo jigar k par hota 

ye kahan ki dosti hai k bane hain dost naseh 
koi charasaz hota, koi gamgusar hota 

rag-e-sang se tapakta wo lahu k phir na thamta 
jise gam samajh rahe ho ye agar sharar hota 

gam agarche jangusil hai, pe kahan bachen k dil hai 
gam-e-ishq gar na hota, gam-e-rozgar hota 

kahun kis se main k kya hai, shab-e-gam buri bala hai 
mujhe kya bura tha marna agar ek bar hota 

hue mar k ham jo ruswa, hue kyon na garq-e-dariya 
na kabhi janaza uthta, na kahin mazar hota 

use kiun dekh sakta ki yagana hai wo yakta 
jo dui ki bu bhi hoti to kahin do char hota 

ye masail-e-tasawuf, ye tera bayan 'Ghalib' 
tujhe ham wali samajhte, jo na badkhwar hota

ye jo ham hijr mein diwar-o-dar ko dekhte hain

ye jo ham hijr mein diwar-o-dar ko dekhte hain 
kabhi saba ko kabhi namabar ko dekhte hain 

wo aye ghar mein hamare Khuda ki kudrat hai 
kabhi ham un ko kabhi apne ghar ko dekhte hain 

nazar lage na kahin us k dast-o-bazu ko 
ye log kyon mere zakhm-e-jigar ko dekhte hain 

tere jawahir-e-tarf-e-kulah ko kya dekhen 
ham auj-e-tala-e-lal-o-guhar ko dekhte hain

wo firaq aur wo wisal kahan

wo firaq aur wo wisal kahan 
wo shab-o-roz-o-mah-o-sal kahan 

fursat-e-karobar-e-shauq kise 
zauq-e-nazara-e-jamal kahan 

dil to dil wo dimag bhi na raha 
shor-e-sauda-e-khat-o-khal kahan 

thi wo ik shakhs k tasawur se 
ab wo ranai-e-khayal kahan 

aisa asan nahi lahu rona 
dil mein taqat jigar mein hal kahan 

hamse chuta qomarkhana-e-ishq 
wan jo jayen girah mein mal kahan 

fikr-e-dunya mein sar khpata hun 
main kahan aur ye wabal kahan 

muzmahil ho gaye quwe 'Ghalib' 
wo anasir mein aitadal kahan

kab wo sunta hai kahani meri


kab wo sunta hai kahani meri 
aur phir wo bhi zabani meri 

khalish-e-gamza-e-khunrez na puch 
dekh khunbafishani meri 

kya bayan kar k mera royege yar 
magar ashufta-bayani meri 

hun zikhud rafta-e-baida-e-khayal 
bhul jana hai nishani meri 

mutaqabil hai muqabil mera 
ruk gaya dekh rawani meri 

qadr-e-sang-e-sar-e-rah rakhta hun 
sakht arzan hai girani meri 

dahan us ka jo na malum hua 
khul gai hao chamandani meri 

kar diya zof ne ajiz "Ghalib" 
nang-e-piri hai jawani meri

kahte ho na denge ham dil agar para paya

kahte ho na denge ham dil agar para paya
dil kahan k gum kije hamne muddaa paya

ishq se tabiat ne zist ka maza paya
dard ki dawa pai dard-e-bedawa paya

dostdar-e-dushman hai etimad-e-dil malum
ah beasar dekhi nala narasa paya

sadagi-o-purkari bekhudi-o-hoshiyari
husn ko tagaful main juraat azama paya

guncha phir laga khilne aj ham ne apna dil
khun kiya hua dekha gum kiya hua paya

hal-e-dil nahin malum lekin is qadar yani
ham ne bara dhunda tum ne bara paya

shor-e-pand-e-naseh ne zakhm par namak chirka
ap se koi puche tum ne kya maza paya

koi din gar zindagani aur hai

koi din gar zindagani aur hai 
apne ji mein hamne thani aur hai 

atish-e-dozakh mein ye garmi kahan 
soz-e-gam hai nihani aur hai 

barha dekhin hain un ki ranjishen 
par kuch ab k sargirani aur hai 

dek khat munh dekhta hai namabar 
kuch to paigam-e-zabani aur hai 

qata-e-amar hai aksar nujum 
wo bala-e-asmani aur hai 

ho chukin "Ghalib" balayen sab tamam 
ek marg-e-nagahani aur hai

lazim tha k dekho mera rasta koi din aur

lazim tha k dekho mera rasta koi din aur 
tanha gaye kyon ab raho tanha koi din aur 

mit jayega sar, gar tera paththar na ghisega 
hun dar pe tere nasiyafarsa koi din aur 

aye ho kal aur aj hi kahte ho k jaun 
mana k hamesha nahi acha koi din aur 

jate hue kahte ho qayamat ko milenge 
kya khub! qayamat ka hai goya koi din aur 

han ae falak-e-pir, jawan tha abhi arif 
kya tera bigarta jo na marta koi din aur 

tum mah-e-shab-e-charduhum the mere ghar k 
phir kyon na raha ghar ka wo naqsha koi din aur 

tum kaun se aise the khare dad-o-sitad k 
karta malikulmaut taqaza koi din aur 

mujhse tumhen nafrat sahi, nayyar se ladai 
bachon ka bhi dekha na tamasha koi din aur 

guzri na baharhal ya muddat khushi-nakhush 
karna tha jawanmarg! guzara koi din aur 

nadan ho jo kahte ho k kyon jite ho 'Ghalib' 
qismat main hai marne ki tamanna koi din aur

na hui gar mere marne se tasalli na sahi

na hui gar mere marne se tasalli na sahi 
imtihan aur bhi baqi ho to ye bhi na sahi 

khar-khar-e-alam-e-hasrat-e-didar to hai 
shauq gulshin-e-gulistan-e-tasalli na sahi 

may parastan khum-e-may munh se lagaye hi bane 
ek din gar na hua bazm mein saqi na sahi 

nafaz-e-qais k hai chashm-o-charag-e-sahra 
gar nahi shama-e-siyahakhana-e-laila na sahi 

ek hangame pe maukuf hai ghar ki raunak 
noh-e-gam hi sahi, nagma-e-shadi na sahi 

na sataish ki tamanna na sile ki parwah 
gar nahi hai mere ashar mein mane na sahi 

ishrat-e-sohabat-e-khuban hi ganimat samjho 
na hui "Ghalib" agar umr-e-tabii na sahi

nahi k mujhko qayamat ka etiqad nahi

nahi k mujhko qayamat ka etiqad nahi 
shab-e-firaq se roz-e-jaza ziyad nahi 

koi kahe k shab-e-mah mein kya burai hai 
bala se aj agar din ko abr-o-bad nahi 

jo aun samne un k to marhaba na kahen 
jo jaun wan se kahin ko, to khairabad nahi 

kabhi jo yad bhi ata hun main to kahte hain 
k aj bazm mein kuch fitna-o-fasad nahi 

alawa eid k milti hai aur din bhi sharab 
gada-e-kucha-e-maikhana namurad nahi 

jahan mein ho gam-o-shadi baham, hamein kya kam 
diya hai hamko Khuda ne wo dil k shad nahi 

tum un k wade zikr un se kyun karo "Ghalib" 
ye kya k tum kaho aur wo kahen k yad nahi

naqsh faryadi hai kis ki shokhi-e-tahrir ka

naqsh faryadi hai kis ki shokhi-e-tahrir ka 
kagzi hai pairahan har paikar-e-taswir ka 

kawe-kawe sakhtjani haye tanhai na puch 
subah karna sham ka lana hai ju-e-shir ka 

jazba-e-beikhtiyar-e-shauq dekha chahiye 
sina-e-shamshir se bahar hai dam shamshir ka 

agahi dam-e-shunidan jis qadar chahe bichaye 
mudda anqa hai apne alam-e-taqrir ka 

bas k hun 'Ghalib' asiri mein bhi atish zar-e-pa 
mu-e-atishdida hai halqa meri zanjir ka

wo a k khwab mein taskin-e-iztirab to de

wo a k khwab mein taskin-e-iztirab to de 
wale mujhe tapish-e-dil majal-e-khwab to de 

kare hai qatl lagawat mein tera ro dena 
teri tarah koi teg-e-nigah ko ab to de 

di khak jumbash-e-lab hi tamam kar hamko 
na de jo bosa to munh se kahin jawab to de 

pila de oak se saqi jo hamse nafrat hai 
pyala gar nahi deta na de, sharab to de 

'Asad' khushi se mere hath paon phul gae 
kaha jo us ne zara mere paon dab to de

phir is andaz se bahar ai

phir is andaz se bahar ai 
k huye mehar-o-mah tamashai 

dekho ai sakinan-e-khita-e-khak 
is ko kahte hain alam-arai 

k zamin ho gai hai sar ta sar 
ruksh-e-sathe charkhe minai 

sabze ko jab kahin jagah na mili 
ban gaya ru-e-ab par kai 

sabz-o-gul k dekhne k liye 
chashm-e-nargis ko di hai binai 

hai hawa main sharab ki tasir 
badnoshi hai bad paimai 

kyun na duniya ko ho khushi "Ghalib" 
shah-e-dindar ne shifa pai

ishq tasir se naumed nahi


ishq tasir se naumed nahi 
jan supari shajr-e-bed nahi 

sultnat dast-ba-dast ai hai 
jam-e-mai khatam-e-jamshed nahi 

hai tajalli teri samne wajud 
jara be partawe khurshid nahi 

raz-e-mashuq na ruswa ho jaye 
warna mar jane mein kuch bhed nahi 

gardish-e-rang-e-tarab se dar hai 
gam-e-mahrumi-e-jawed nahi 

kahte hain jite hain ummid pe log 
ham ko jine ki bhi ummid nahi

ishq mujhko nahi wahshat hi sahi

ishq mujhko nahi wahshat hi sahi 
meri wahshat teri shohrat hi sahi 

qata kije na talluq ham se 
kuch nahi hai to adawat hi sahi 

mere hone mein hai kya ruswai 
ye wo majlis nahi khalwat hi sahi 

ham bhi dushman to nahi hain apne 
gair ko tujh se mohabbat hi sahi 

apni hasti hi se ho jo kuch ho 
agahi gar nahi gaflat hi sahi 

umr har chand ki hai barq-e-khiram 
dil k khun karne ki fursat hi sahi 

ham koi tarq-e-wafa karte hain 
na sahi ishq musibat hi sahi 

kuch to de ai falak-e-nainsaf 
ah-o-fariyad ki rukhsat hi sahi 

ham bhi taslim ki khu dalenge 
beniyazi teri adat hi sahi 

yar se cheda chali jaye "" 
gar nahi wasl to hasrat hi sahi

husn gamze k kashakash se chuta mere bad

husn gamze k kashakash se chuta mere bad 
bare aram se hai ahl-e-jafa mere bad 

mansab-e-sheftagi k koi qabil na raha 
hui mazuli-e-andaz-o-ada mere bad 

shama bujhti hai to us mein se dhuan uthta hai 
shola-e-ishq siyahposh hua mere bad 

khun hai dil khak mein ahwal-e-butan par, yani 
unk nakhun hue mohtaj-e-hina mere bad 

darkhur-e-arz nahi jauhar-e-bedad ko ja 
nigah-e-naz hai surme se khafa mere bad 

hai junun ahl-e-junun k liye agosh-e-wida 
chaq hota hai gareban se juda mere bad 

kaun hota hai harif-e-mai-e-mard-afgan-e-ishq 
hai mukarrar lab-e-saqi pe sala mere bad 

gam se mata hun k itna nahi dunya mein koi 
k kare taziyat-e-mehar-o-wafa mere bad 

aye hai bekasi-e-ishq pe rona 'Ghalib' 
kisk ghar jayega sailab-e-bala mere bad

ki wafa hamse to gair use jafa kahte hain

ki wafa hamse to gair use jafa kahte hain 
hoti ai hai k achon ko bura kahte hain 

aj ham apni pareshani-e-khatir un se 
kahne jate to hain, par dekhiye kya kahte hain 

agle waqton k hain ye log, inhen kuch na kaho 
jo may-o-nagmein ko andohruba kahte hain 

dil mein a jae hai, hoti hai jo fursat gash se 
aur phir kaun se nale ko rasa kahte hain? 

hai par-e-sarhad-e-idrak se apna masjud 
qible ko, ahal-e-nazar, qiblanuma kahte hain 

pa-e-afgar pe jab se tujhe raham aya hai 
khar-e-rah ko tere ham mehr-e-giya kahte hain

ik sharar dil mein hai, us se koi ghabrayga kya 
ag matalub hai hamako, jo hawa kahate hain 

dekhiye lati hai us shokh ki nakhwat kya rang 
us ki har bat pe ham nam-e-Khuda khate hain 

wehshat-o-shefta ab marsiya kahwen shayad 
mar gaya "Ghalib"-e-ashuftanawa kahte hain

husn-e-mah garche bahangam-e-kamal acha hai

husn-e-mah garche bahangam-e-kamal acha hai 
us se mera mah-e-khurshid-e-jamal acha hai 

bosa dete nahi aur dil pe hai har lahja nigah 
ji mein kahte hain muft aye to mal acha hai 

aur bazar se le ayen agar tut gaya 
sagar-e-jam se mera jam-e-sifal acha hai 

betalab den to maza usmen siwa milta hai 
wo gada jisko na ho khu-e-sawal acha hai 

un k dekhe se jo a jati hai munh par raunaq 
wo samajhte hain k bimar ka hal acha hai 

dekhiye pate hain ushshaq buton se kya faiz 
ik birahman ne kaha hai k ye sal acha hai 

hamsukhan teshe ne farhad ko shirin se kiya 
jis tarah ka bhi kisi mein ho kamal acha hai 

qatra darya mein jo mil jaye to darya ho jaye 
kam acha hai wo jiska maal acha hai 

khijr sultan ko rakhe khaliq-e-akbar sarsabz 
shah k bag main ye taza nihal acha hai 

hamko malum hai jannat ki haqiqat lekin 
dil k khush rakhne ko Ghalib ye khayal acha hai

Popular Posts