Hansi ki baat ke us ne wahan bula ke mujhey

Hansi ki baat ke us ne wahan bula ke mujhey
Bahut rulaya kahani meri suna ke mujhey

Har aik lamha mera khauf ki giraft mai hai
Muhafizon se bachayega kon aa ke mujhey

Kammale fun se liya kaam us ne mujh se bhi
Tabah apne udoo ko kiya bacha ke mujhey

Wo baagh baagh hua hai to besabab bhi nahee
Mila hai kuchh to usey khak mai mila ke mujhey

Usey banaya tha maine badi muhabbat se
Khuda gawaah ke wo bhi chala sake na mujhey

Usey kaho ke mai hazir mazeeed dukh de de
Bahut sukoon mila hai agar sata ke mujhey