Saturday, May 15, 2010

jis sar ko garur aj hai yan tajawari ka

jis sar ko garur aj hai yan tajawari ka 
kal us pe yahin shor hai phir nauhagari ka 

afaq ki manzil se gaya kaun salamat 
asbab luta rah mein yan ham safri ka 

zindan mein bhi shorish na gai apne junun ki 
ab sang madawa hai is ashuftasari ka 

har zakhm-e-jigar dawar-e-mahshar se hamara 
insaf talab hai teri bedadgari ka 

is rang se jhamke hai palak par ke kahe tu 
tukra hai mera ashk aqiq-e-jigari ka 

le sans bhi nazuk ke ahista hai bahut kam 
afaq ki is karagah-e-shishagari ka 

tuk mir-e-jigar-sokhta ki jald khabar le 
kya yar bharosa hai chirag-e-sahri ka

No comments:

Popular Posts