shehr kee raat aur maiN naashaad o naakaara phirooN

shehr kee raat aur maiN naashaad o naakaara phirooN

jagmagaati, jaagti saRkoN pe aavaara phirooN

Ghair kee basti he kab tak darbadar maaraa phirooN

aye Gham e dil kyaa karooN aye vehshat e dil kyaa karooN

jhilmilaate qumqamon kee raah maiN zangeer see

raat ke haathoN maiN din kee mohni tasveer see

mere seene per magar dhakee huee shamsheer see

aye Gham e dil kyaa karooN aye vehshat e dil kyaa karooN

ye ropehlee chaaooN ye aakaash per taaroN ka jaal

jaise soofi ka tasavvur jaise aashiq ka Khyaal

aah lekin kon jaane kon samjhe jee ka haal

aye Gham e dil kyaa karooN aye vehshat e dil kyaa karooN

phir voh toota ik sitaara phir voh chooti phuljhaRee

jaane kis kee god maiN ayee ye moti kee laRee

hook see seene maiN uTThee, *** see dil per paRee

aye Gham e dil kyaa karooN aye vehshat e dil kyaa karooN

raat hans hans kar ye kehtee he ke maiKhaane maiN chal

phir kisi shehnaaz lala ruKh ke kaashaane maiN chal

ye naheeN lekin to phir aye dost veeraane maiN chal

aye Gham e dil kyaa karooN aye vehshat e dil kyaa karooN

har taraf bikhree huee rangeeniyaaN, raanaayiaaN

har qadam per ishrataiN leti huee angRayiaaN

baRh rahee haiN god phelaae hue rusvaaiaaN

aye Gham e dil kyaa karooN aye vehshat e dil kyaa karooN

raaste maiN ruk ke dam looN ye meri aadat naheeN

lout ka vapis chalaa jaaooN meri fitrat naheeN

aur koi hamnavaa mil jaye yeh qismat naheeN

aye Gham e dil kyaa karooN aye vehshat e dil kyaa karooN

muntazir he aik toofaan e balaa mere liye

ab bhee jaane kitne darvaaze haiN vaa mere liye

per museebar he meraa ahd e vafaa mere liye

aye Gham e dil kyaa karooN aye vehshat e dil kyaa karooN

jee maiN aata he ke ab ahd e vafaa bhee toR dooN

un ko paa saktaa hooN maiN ye aasraa bhee toR dooN

haaN munaasib he, ye zanjeer e havaa bhee toR dooN

aye Gham e dil kyaa karooN aye vehshat e dil kyaa karooN

ik mehal kee aaR se niklaa voh peela mahtaab

jaise mulla kaa amaama jaise banye kee kitaab

jaise muflis kee javaani jaise bevaa ka shabaab

aye Gham e dil kyaa karooN aye vehshat e dil kyaa karooN

dil maiN ik sholaa bhaRak uTThaa he aaKhir kyaa karooN

meraa paimaana chalak uTThaa he aaKhir kyaa karooN

zaKhm seene kaa mahak uTThaa he aaKhir kyaa karooN

aye Gham e dil kyaa karooN aye vehshat e dil kyaa karooN

jee maiN aata he ye murdaa chand taare noch looN

is kinaare noch looN aur us kinaare noch looN

aik do ka zikr kyaa, saare ke saare noch looN

aye Gham e dil kyaa karooN aye vehshat dil kyaa karooN

muflisi aur ye mazaahir haiN nazar ke saamne

saiNkaRoN sultaan o jaabir haiN nazar ke saamne

saiNkaRoN changaiz o naadir haiN nazar ke saamne

aye Gham e dil kyaa karooN, aye vehshat e dil kyaa karooN

le ke ik changaiz ke haathoN se Khanjar toR dooN

taaj per us ke damaktaa he jo pathar toR dooN

koi toRe ya na toRe maiN hee baRh kar toR dooN

aye Gham e dil kyaa karooN aye vehshat e dil kyaa karooN

baRh ke is andar sabhaa ka saaz o samaaN phoonk dooN

is kaa gulshan phoonk dooN, us ka shabistaaN phoonk dooN

taKht e sultaaN kyaa, maiN saara qisr e sultaaN phooNk dooN

aye Gham e dil kyaa karooN aye vehshat e dil kyaa karooN