Mujhey khuwabon se ab dar lagta hai

Mujhey khuwabon se ab dar lagta hai
Inn mein bassa hota hai jo
Rait per banna shehar lagta hai
Pal may sehra
To
Pal may sagar
Kaheen phoolon ki seaj hai saji
Kaheen angaron ka raqs hai jari
Kabhi aangan may utarti hai chandni saari
Kabhi teeragi ki padti hai chott kaari

Aik pal may tamer jo kartey hain
Wo mehal aksar agley pal may
Koi puraana sa khandar lagta hai
Khuwabon ki nagri bhi ajab nagri hai

Shamma aksar khuwahishon ki yahan jalti hai
Jo zara tehar jaaon may kaheen
Anjuman dar anjuman waheen sajti hai
Phir bhi janey kiyun
Mujhey ye nagar
Meray Moula ka qehar lagta hai