Kehne Ko Wo Pehli Chahat Thi

Kehne Ko Wo Pehli Chahat Thi, 

Wo Jis Mein Junoon Tha, Shiddat Thi, 

Pakeeza Thi, Anmol Thi Wo, 

Khwabon Ke Jahan Ki Ulfat Thi, 

Mehboob Ko Bhi Malum Na Tha, 

Aisi Khamosh Mohabbat Thi, 

Khamosh Rahi Bekaar Hui, 

Na Jeet Hui Na Haar Hui, 

Phir WaQt Ne Apni Chaal Chali, 

Wo FurQat Se Do-Chaar Hui, 

Kaisi Khamosh Mohabbat Thi, 

Gulzaar Se Phir Wo Khaar Hui, 

FurQat Se Junoon Mein Aag Lagi, 

Is Dilke Sukoon Mein Aag Lagi, 

AshQon Ki Ladi Aankhon Se Bandhi, 

Is Jism Ke Khoon Mein Aag Lagi, 

Phir WaQt Ne Apni Chaal Chali, 

Dilse Wo Khumaar-E-Preet Gaya, 

Honthon Se Wafa Ka Geet Gaya, 

Kehne Ko Wo Pehli Chahat Thi, 

Uska Bhi Zamana Beet Gaya, 

Hijraan Ki Shabon Se Lad Lad Kar, 

Dil Haar Gaya, Gam Jeet Gaya...