wo apne ishq mai kaisa kamal rakhta hai

Woh Apney Ishq Mein Kaisa Kamaal Rakhta Hai
Kay Be-Rukhi Mein Bhi Mera Khayaal Rakhta Hai...


Jo Aaj Mera Nahien Hai Woh Kal Mera Ho Gaa
Kay Har Zamaana Uroj-o-Zawaal Rakhta Hai...

Ajab Nahien Woh Jahaan Bhar Ko Beywafa Samjhe
Nazar Mein Meri Wafa Ki Misaal Rakhta Hai...

Kahaan Talak Koi Dast-e-Karam Ko Zehmat Dey
Tamaam Shaher Hi Dast-e-Sawaal Rakhta Hai...

Meri UrDaan Kay Aagay Hai Kis Qadar Bey-Bas
Yeh Aasmaan Jo Sitaaroon Ka Jaal Rakhta Hai...

Tera Khayaal Hi Kuch Meherbaan Hai Warnaa
Jahaan Mein Koun Kisi Ka Khayaal Rakhta Hai...