Mohabbat Mein Tamanna Kufr Hai Esa Nahi Karte,
Kisi Tajir Ki Tarha Ishq Mein Sauda Nahi Karte.
Sawal Uthne Lage Hain Phir Maseehai Ke Bare Mein,
Agar Ho Charagar To Kyon Hume Achcha Nahi Karte.
Naqab e Rukh Ulat Do Aeene Se Yun Na Sharmao,
Ke Mehram Se Kabhi Mehram Kaheen Parda Nahi Karte.
Na Ho Mayoos Ae Zoq e Junoon Too Bo’ud e Manzil Se,
Mohabbat Karne Wale Rah Mein Thera Nahi Karte.
Duhai De Rha Hai Kyon Faqeeh e Shaher Azmat Ki,
Nasab Wale Kaheen Kya Ishq Farmaya Nahi Karte.
Misaal e Mahi e Be Aab Meri Jaan Nikal Jaati,
Are Itna Taghaaful Aap Yeh Achcha Nahi Karte.
Hua Jo So Hua Manzar Miyan Khak Bhi Dalo,
Gae Waqton Ki Baten Hain Unhe Socha Nahi Karte.
No comments:
Post a Comment