Iss Dil Nay Terey Baad Mohabbat Bhi Nahi Ki

Iss Dil Nay Terey Baad Mohabbat Bhi Nahi Ki
Hadd Yeh K Dharakney Ki Jisaarat Bhi Nahi Ki

Tabeer Ka Aizaaz Huwa Hai Ussay Hasil
Jis Nay Meray Khaabon Main Shiraakat Bhi Nahi Ki

Ulfat Tou Bari Baat Hai Hum Say Tou Sar-e-Shehar
Logo Nay Kabhi Dhang Say Nafrat Bhi Nahi Ki

Aadaab-e-Safar Aab Woh Sikhaatay Hain Jinho Nay
Dou Chaar Qadam Ki Yeh Musaafat Bhi Nahi Ki

Kiya Apni Safaayi Main Bayain Detay K Hum Nay
Na Kerda Gunaahi Ki Wazaahat Bhi Nahi Ki

Khaamosh Tamashaayi Ki Maanind Sar-e-Bazm
So Zakham Sahey Dil Pay , Shikaayet Bhi Nahi Ki

Iss Ghar K Sabhi Log Mujhay Chornay Aaye
Dehleez Talak Uss Nay Yeh Zehmat Bhi Nahi Ki

Uss Nay Bhi Ghulaamo Ki Safo Main Hamay Rakha
Iss Dil Pay Kabhi Jis Nay Hakoomat Bhi Nahi Ki