dard-e-gham ka badaa andhera tha

dard-e-gham ka badaa andhera tha
par nazar meiN kisi ka chehra tha.

un ki tabeer aur kya hoti
khwaab jo bhi tha wo adhoora tha.

aaNkheN jaise ghazal ke do misre
ik saraapa kitaab jaisa tha.

gaaoN ke ghar to chhote the lekin
chand chhat se dikhaaii deta tha.

un ke chehre kabhi na yuN bheege
koii phooloN se mil ke roya tha.

chhoR kar wo mujhe kahaaN jata
wo bhi meri tarah akela tha.

koii aawaz aa rahi thi ‘nizam’
mud ke dekha to apnaa saya tha.