Darwaza koi ghar se nikalne ke liye de

Darwaza koi ghar se nikalne ke liye de
Bekhauf koii raasta chalne ke liye de.

AaNkhoN ko ataa khwaab kiye shukriya, lekin
Paikar bhi koii khwaaboN mein dhalne ke liye de.

Pani ka hi paikar kisi parbat ko ataa kar
Ik booNd hi naddi ko uchhlane ke liye de.

Sahmi hui shakhoN ko zara-si, koi muhlat
Sooraj ki savari ko nigalne ke liye de.

Sab waqt ki deewaar se sir phod rahe hain
Rozan hi koi bhag nikalne ke liye de.

Sailab mein sa_at ki mujhe phenkne wale
Toota hua ik pal hi sambhalne ke liye de.

Mehfooz jo tarteebe-anasir se hain asrar
To khol ko ik aaNch pighalne ke liye de.

Takh_iil ko takhleeq ki taufeeq ataa kar
Phir pehlU se ik cheez nikalne ke liye de.