Ab'r malboos-e-aab tha jaise

Ab'r malboos-e-aab tha jaise'
Chaand ko kuch hijaab tha jaise'

Kal achaanak wo yoon mila mujh ko
Koi pinhaan jawaab tha jaise'

Safha safha safar tha yaadon ka
Jalti bujhti kitaab tha jaise'

Adh'khili raat, an'kahe manzar
Raasta neem'taab tha jaise'

Chaandni ma' tuloo' hota hua
Raat ka aaftaab tha jaise'

Gehri taareekiyon ma' behta hua
Aik raushan gulaab tha jaise'

Raat bhar maire aariz-o-lab par
Bosa-e-maahtaab tha jaise'

Us ki aawaaz neem khwaabeeda
Phool saa zair-e-aab tha jaise'

So ke utha to mairi aankhon mein'
Us ki aankhon ka khwaab tha jaise'