kab talak pyaas ke saharaa me.n jhulasate jaayein
ab ye baadal jo uThe hai.n to barasate jaayein
kaun batalaaye tumhe.n kaise vo mausam hai.n ki jo
mujh se hii duur rahe.n mujh me.n hii basate jaayein
haaye kyaa log ye aabaad huye hai.n mujh me.n
pyaar ke lafz likhe.n lahaje se Dasate jaayein
aa_iinaa dekhuu.N to ik chehare ke be-rang nuquush
ek naadiiddaa-sii zanjiir me.n kasate jaayein
juz muhabbat kise aayaa hai mayassar ummiid
aisaa lamhaa ki jidhar sadiyo.n ke raste jaayein
No comments:
Post a Comment