Saturday, June 26, 2010

koi nagmaa muhabbat kaa gayeN chalo


koi nagmaa muhabbat kaa gayeN chalo
sare shikwe gile bhool jayeN chalo

tanha tanha chale der tak door tak
ab kadam se kadam phir milayeN chalo

ek muddat hui ek dooje se hum
roothe roothe se haiN man jayeN chalo

manzileN thak gayeeN rastaa dekhti
raaste de rahe haiN sadaa'eN chalo

pyar ki raushani baaNtne ke liye
hum diyoN ki tarah jhilmilayeN chalo

khar nafart ke chun kar sabhi rah se
pyar ke gul chaman meiN khilayeN chalo

haath se haath humne milye bahut
ab diloN se diloN ko milaayeN chalo

No comments:

Popular Posts