ye tabiyat hai to khud azar ban jayenge ham
charagar royenge aur gamkhvar ban jayenge ham
ham sar-e-chak-e-vafa hain aur tera dast-e-hunar
jo bana dega hamain ai yar ban jayenge ham
kya khabar thi ai nigar-e-sher tere ishq main
dilbaran-e-shahar k dildar ban jayenge ham
sakht jan hain par hamari ustavari par na ja
aise tutenge tera iqarar ban jayenge ham
aur kuch din baithane do ku-e-janan main hamain
rafta rafta saya-e-divar ban jayenge ham
is qadar asan na hogi har kisi se dosti
ashnai main tera mayar ban jayenge ham
mir-o-galib kya k ban paye nahin faiz-o-firaq
zam ye tha rumi-o-atar ban jayenge ham
dekhane main shakh-e-gul lagate hain lekin dekhana
dast-e-gulchin k liye talvar ban jayenge ham
ham chiragon ko to tariki se larana hai 'Faraz'
gul hue par subah k aasaar ban jayenge ham
No comments:
Post a Comment