Mairay pas teen cheezain hain
rait mujhay wirasatt mein milli
pattharr main nay mehnatt say kamaya
aur yeh thorri si dhoop mujhay sarrakk parr
parri hui milli
main nay rait say apni umr banayi
main nay pattharr apnay pait parr bandha
main nay dhoop say apna saya banaya
main apnay sayay mein jallta hoon
main kissi pairr ka ehsan nahin loon ga
challtay challtay aik din apnay sayay parr girr jaon ga
tumm mujhay meri rait mein dafn karrna
mera patthar mairay pait say kholl karr meri qabr ka
qatba banana
aur meri dhoop ko azad karr daina...!
No comments:
Post a Comment