Dilki Siyaahiyon Mein Tujhe Dhundta Hua

Dilki Siyaahiyon Mein Tujhe Dhundta Hua,
Palkon Pe Aa Ruka Hai Sitaron Ka Qaafila,

Khalwat Mein Muddaton Main Jise Pujta Raha,
Dekha Qareeb Se To Wo Ek Sang-E-Surkh Tha,

Kuch Is Tarah Sabaa Se Kahi Teri Dastan,
Har Phool Muskura Ke Mujhe Dekhne Laga,

Lao Kahin Se Dhundhke Yaadonki Roshni,
TaareeQ Ho Gaya Hai Mohabbat Ka Raasta,

Haan Meri Zindagi Ki Haraarat Inhi Se Hai,
Tutega Kis Tarah Teri Yaadon Ka Silsila,

Jaise Koi Chirag Andhere Mein Jal Uthe,
Dilke Qareeb Aake Koi Yun Theher Gaya,

Daaman Mein Aansuon Ke Sharare Liye Hue,
Aankhein Mana Rahi Hai Shab-E-Gam Ka Ratjaga,

Jisne Bade Khulus Se Thukra Diya Mujhe,
IQbal Sochta Hoon Ke Wo Shakhs Kaun Tha...