Khizaan Ke Aakhri Din The Bahar Aayi Na Thi Lekin

Khizaan Ke Aakhri Din The,
Bahar Aayi Na Thi Lekin,
Hawa Ke Lams Mein Ek Bhi Sada Si,
Nagmagi Mehsoos Hoti Hai,

Darakhton Ke Tahyaer Mein,
Kisi Bhi Aasra Ummid Ki Lau Thartharati Thi,

Guzargaon Mein Udte Khushk Patte,
Ajnabi Logon Ke Qadmon Se Lipatte Aur Ulajhte The,
To Ek Bhooli Hui Tasveer Jaise Kond Jaati Thi,

Har Ek Manzar Ke Chehre Par,
Larazti Bekali Si Reshmi Chilman Kasheeda Thi,
Nazar Rasta Na Paati Thi,

Kuch Aisahi Sama Tha Jab
Wo Mere Bakht Ke Sehra Mein Sawan Ki Tarah Utri,
Meri Saanso Mein Mehki,

Nigahon Ke Sitare Aarzu Ke Istaare
Tamannaon Ke Seil Shauq Mein Behne Lagi Thi,

Mere Seene Pe Sar Rakh Kar Achanak Muskurayi
Aur Kuch Kehne Lagi Wo.....

Na Jane Kya Tha Wo Jumla,
Aur Uska Adh Kaha Jumla,
Jo Gunche Ki Tarah Un Kaanpte Hothon Pe Khila Tha,

Usi Lamhe Koi Koyal Bade Dard Se Kooki Thi,
Wo Jaise Achanak Neend Se Jaagi Thi,
Aur Usne Bade Dukh Se Falaq Ki Taraf Dekha Tha,
Wo Boli Thi.....

"Sitara Shaam Ka Roshan Hua Hai, Ab Main Chalti Hoon"
Khazaan Ke Aakhri Din The,
Hawa Ke Lams Mein Ek Besdaa Si Nagmagi Mehsoos Hoti Hai,
Koi Maanoos Si Khushbu Mere Kaano Mein Kehti Hai,
Phir Uske Husn Ka Mehram Tera Dil Hone Wala Hai,
Wo Uska Adh Kaha Jumla
Mukammal Hone Wala Hai...