Maazi kay kharabay ki

Maazi Kay Kharabay Ki
************************

Maazi kay kharabay ki
mehraab shakista par
ek naam jo kunda hay
kia naam hay kis ka hay

Na saal na san is mein
na raat na din is mein
tasveer nahi koi
tehreer nahi koi
na teer ka naqsha hay
na paan ka patta hay
ahwaal musafir ka
pinhan hay na paida hay
kia janay kab koi.........kis dais say aaya ho
apnon say woh ghamdeeda......wehshat mein paraya ho
kis haal mein rehta ho.........kia bhais banaya ho
badal ho keh bijli ho..........woh dhoop keh saya ho
jogi ho keh banjara..........raja keh riyaya ho
jis roz say dil us nay........dunya say uthaya ho
kis kis say lagaya ho
aur dard hi paya ho
maazi kay kharabay ki
mehrab shakista par
is naqsh say kia matlab
is harf kay kia maani?
ye naam mita dalo
han......ajnabi INSHA ko
aawara o ruswa ko