kabhi jee chahata hai

کبھی جی چاہتا ہے


ہم اپنی ماہیت پر
سوچ کے حیران ہوتے ہیں

کبھی پربت کا قامت
ہیچ لگتا ہے نگاہوں کو
کبھی ذرّے کے سائے میں
پناہیں ڈھونڈتا ہے جسم
کبھی مٹھی میں ہفت افلاک کو ہم قید کرتے ہیں
کبھی اک پھول کا سایہ اٹھائے سے نہیں اٹھتا
کبھی سینے کا طوفاں
روند دیتا ہے سمندر کو
کبھی اک بوند پانی میں
سراپا ڈوب جاتا ہے

کبھی دن کے اُجالے میں نظر آتا نہیں کچھ بھی
کبھی گھُپ تیرگی میں
نور بکھراتا ہے یہ عالم
کبھی چہرہ بہ چہرہ عکسِ تیرہ رقص کرتا ہے
کبھی منظر بہ منظر حُسن کی رعنائی ہوتی ہے

کبھی یہ خارجی دنیا
بڑی خوش رنگ لگتی ہے
کبھی ہم چاہتے ہیں
کاش یہ آنکھیں نہیں ہوتیں
یہ کافر دل نہیں ہوتا

کبھی ارمان کی نکہت دلوں کو گدگداتی ہے
اَنی بن کر کبھی قلب و نظر میں خواب چبھتے ہیں
کبھی صحنِ چمن کے نام سے وحشت سے ہوتی ہے
کبھی صر صر تکلم کرتی ہے خوشبو کے لہجے میں
کبھی پاتے ہیں خود کو
وسعتِ امکاں سے بھی آگے
کبھی جیسے مقّید ہوں
کسی چھوٹے سے زنداں میں

کبھی اک ہلکی آہٹ پر سراپا کانپ اُٹھتا ہے
کبھی جی چاہتا ہے
بارشِ سنگِ ملامت ٹوٹ کے برسے
اور اس بارش میں ہم تا دیر
گھنگھرو باندھ کے ناچیں
٭٭٭